حكاية البنت التي قاطعها والدها بسبب صلاح ادريس .. فاطمة الصادق تحكي قابلتني (ذئاب) كثيرة وهؤلاء الرجال (…) احس نحوهم بالشفقة

كنت حرة لبعض الوقت؟
علاقتي بأهلي كانت قوية، ولحدي الآن، أي زول بيقول العندو، ولم يتدخل أي واحد منهم في لبسي، وفي علاقاتي أو دخولي الاعلام، وبالمناسبة قرأت كل كتب السلفيين مع أخوي الواثق وهو حفظ المصحف في المرحلة الثانوية، بالاضافة الى صحيح البخاري ومسلم.

وفاطمة؟
حفظت 3 أجزاء بس

تنوع واضح؟
أيوة .. الواثق أخوي سلفي، أبوي رياضي، وحمزة متصوف، ومحمد ليس له أية انتماءات.

وفاطمة؟
أنا بت سودانية وكما الواثق تزوج سلفية، بقيت قريبة منها، وأكثر من اخواتها.

غريبة انتي ليبرالية ومتحررة شوية، وهي سلفية تبقوا قراب؟
نحن كلنا لامن ندخل البيت ، نترك كل شئ عند عتبة الباب، ونكون عائلة واحدة، وثقت في لأنها جربتني، أما الواثق فهو (كبيري) ولم يلتفت نحوي سوى مرة واحدة قال فيها، أكتبي بقناعات وأبعدي عن الخاص.

نرجع لي صحباتك القداااام (ناهد ونسرين) أسحن منك بعيالهم ومسترين، وانتي حياتك كلها ازمات وتحديات ومؤامرات؟
أنا ما ندمانة على طريقي، والاعلام لم يكن حلمي، لكن هي الاقدار، حيث كان حلمي أن أدرس القانون وأبقى محامية وأنا مبسوطة وحققت نجاحي بعزيمتي واصراري لوحدي، دقيت الصخرة وشربت بكفي.

كم كان نصيبك من مشاغبات بنات المدارس؟
كنت مستمعة جيدة للبنات، وكان اسمي “فوزية سلامة” في مجلة سيدتي، وكانت وظيفتها حل المشاكل العاطفية.

ما دخلتي في أي علاقة عاطفية؟
لا لا لا، أنا بس زولة مسالمة، ولم أكن متهورة وما عندي علاقات متشابكة.

وعالم الاولاد؟
كفاية أخواني وبالمناسبة ما كنت بفرق بين الاولاد والبنات الا في المرحلة الجامعية.

فاطمة الصادق من مواليد سنة كم؟
أنا من مواليد 1979 وأمي تزوجت أول ابريل 1976م غريبة البنات ما بقولن أعمارهن؟
أي بت وامرأة تدس عمرها دا تخلف بس، والعمر الحقيقي يقاس بسلوكك وتصرفاتك واعمالك وقوة شخصيتك العمر ما بالايام والسنين.

ما فيش شئ غريب وانت بنوتة حلوة ومدلعة؟
صدقني والله أنا عشت طفولتي، وحتى الجامعة بايقاع واحد وثابت، وكانت الثانوية مجرد بداية نضج ولم أعشها بطريقتي، وكنت اخيط 5 ألوان، ولم أرتد الطرحة في حياتي الى في المرحلة الثانوية حيث كانت الزامية.

ولو لم تكن الزامية؟
ما كانت عاجباني لأني لم أتعود عليها، وبعدين غيرت شكلي.

وليه ما اتحجبت فاطمة؟
دي نعمة لم يكتبها الله لي حتى الآن.

هل فكرت في الحجاب؟
فكرت أتحجب وكنت جادة جداً، ربنا يوفقني قولوا يارب.

حسب التقاليد المرعية، لابد أن تتحجبي لتصبحي مذيعة (مثلاً)؟
أنا فصلوني من التلفزيون بسبب الحجاب.

ما كنتي مبسوطة بالجامعة الاسلامية؟
ما كنت مبسوطة، وما كنت قايلة عندي شخصية تأهلني كي أًصبح مذيعة او صحفية، ولازلت أخجل من ضلي.

كيف جئت للخرطوم؟
جئت ببص (الجيلاني) وكنت خائفة من المدينة، ومن المجهول وحريصة على ألا احتاج لأي شئ من شخص، وكنت كل يوم خميس أرجع القضارف مع العلم قعدنا في داخلية أولاد وبنات القضارف، كانت تلك أول مرة أبيت فيها خارج البيت وكنت لو عاوزة أشرب موية أنادي لوحدة تدلني.

مين الستف ليك الشنطة؟
ماما طبعاً، وهي من نصحني انو ملابسي كيف أوديها الغسال، وكيف أرتب دولابي وبأني لازم أشرب عصير طوالي.

لم تنس شئ الا وضعته؟
حاجات البنات كلها فيها.

الكريمات بأنواعها؟
والله العظيم، أنا ما عرفت الكريمات الا في تالتة جامعة، وما عملت أي مكياج

كنت فتاة جميلة وما تزالين؟
المهم خطبني رجال كثر، ومن الطرائف كان الواثق أخوي يقول: الليلة ما في زول جاء يخطب فاطمة؟ ففي فترة ما كان يومياً يأتي شخص لخطبتي.

مين عرف جوهر فاطمة خارج البيت والعائلة؟
الرشيد علي عمر

سمعتي بجوطة (مسألة المذيعات) قبل فترة؟
سمعت بيها ولم تلفت انتباهي وعموماً (أنا قافلة أبوابي من الرجل بشكل محكم)

برغم كل الهروب والانكار هناك في قلب فاطمة قصة حب كبيرة؟
بدأ في الجامعة طبعاً

أبوك كان عارف؟

لا
من الوسط؟
لا
وكان اول حب؟
كسر حواجز كثيرة للراجل عموماً في وجداني وتغير مفهوم حياتي، وشعرت بعوالم جديدة وبدينا نرسم المستقبل.
ومين دا؟
خليهو عشان اختلفنا

السبب كان شنو؟
كنت السبب

خسارة كان ممكن يكون في تنازل من الطرفين عشان تستمروا؟
حينما تصطدم أي بت بالخيانة طوالي بتشفر الحبيب دا لو لم تتحوللعداوة وكراهية وبتكون ضيعت فترة مهمة من عمرها وضياع الفترة دي رجعني للمربع الاول وبقى الراجل بالنسبة لي عالم ما عاوزة أدخلو.

الذئاب في حياتك؟
قابلوني.. وهم كتار جداً وأعرف بنات كتار جداً تحكمن نتيجة أفعال اولئك الذئاب.

كيف تعرفي (الرجل الذئب)؟
ليست نباهة ولكن تراكم التجارب والخبرات والتحولات في حياتي ومن نظرة أي رجل بعرف عاوز شنو.

هل ظلمك رجل من هذا المنطلق؟
لا

ولكن من كلامك يبدو الامر مختلف؟
أنا أشفق على بعض الرجال ومن مكانتهم الرفيعة بيكونوا مرات في وضعية محزنة وعيب.

المحزن في عالم الرجل؟
ما بيعرف الاخلاص ما عندو قدرة على الوفاء والخيانة تجري في دمه أناني وديكتاتوري وظالم دا كلو بسبب التربية الخاطئة.

وبابا؟
لا بابا استثناء وهو فارس أحلامي الحقيقي وطبعاً ماما محظوظة.

دمرت الرجل في دواخلك؟
اذا كان الدمار يعني الابتعاد (نعم دمرته).

صحيفة حكايات