بطانية كلوب

> الناس خشوم بيوت
> ناس احتفلت بالاستقلال لكن قلال
> وناس تظاهرت بالاحتفال بالاستقلال وديل كتار
> الغريبه فيهم ناس كبار
> كلو زول حر يحتفل بي شنو
> في ناس احتفلوا بي رأس السنه
> وفي ناس ما سمعوا اصلا بالسنه
> طول السنه واقفين هنا
> وفي ناس عندهم رأي واضح في الاحتفال بي رأس السنه
> والغريبه في ناس احتفلوا بالاستقلال وتظاهروا بالاحتفال بالاستقلال واحتفلوا بي رأس السنه
> حتوهوا بالليل
> والصباح رباح يا عمك
> رحله من امها
> المهم
> وما مشكله لو مشينا لي رأس السنه
> طلعه تفرق علينا كلنا
> نمرق كأسره محترمه من الضنك من البلي القرب يخمنا
> بس نمشي بأدبنا ونشرب ببسي حلال بي حقنا
> نكون قاعدين محترمين نفسنا
> لا شادين سيستم متر تحت وسطنا
> ولا لابسات متر فوق للركب البتتوسط رجلنا
> ونفرق هم السنين وجور الزمن انت وانا
> وممكن برضك ندعو ربنا
> يمكن يفكنا
> من الضنك من العدم من طول السنه نقعد نردد في المنى
> المهم
> كل النوادي والخيم اقامت حفلات رأس السنه
> كل المزارع كان فيها رحلة يوم الاستقلال تلمنا
> واعلانات رأس السنه ملت شوارعنا الرئيسيه والفي حينا
> الفنان فلان الفلاني
> مع العشاء تربيزه اربعه كراسي بمليار
> سنه يا انا
> فلان الفلتكاني بالنادي الفلاني
> وعلانه الفلانيه
> تذكرة بدون عشاء مليون
> وفلتكان وفلانه في حفل الموسم دويتو
> للحجز تلفون صفر واحد اتنين تلاته تسعات والباقي جري
> لكن الملاحظ انو معظم الحفلات بارن
> النادي الوحيد التذاكرو كملت من عصراً بدري
> ولأني روست فيهو وكنت قاطع تذكرتني من قبل اسبوع
> هو بطانيه كلوب
> حفله من امها
> احيتها احلام
> تغني احلام للصباح ونحنا نشخر
> اقصد نرقص
> ولما ننقلب
> تتقلب اغاني احلامنا معانا
> ولما ننطرب بنضطرب
> بطانيه كلوب
> من اسي
> احجزوا في بطانيه كلوب قبال تذاكر رأس سنة 2017م يجيكم
> ده كان لقاكم
> وكان ما لقاكم اهو تكون التذكرة تذكرة جاريه تنزل في ميزان اولادكم
> لا تنسوا
> بطانيه كلوب
> يا قوم
> في ناس روسوا لكن ما مشوا لي رأس السنه
> رأس السنه جاهم في بيوتهم
> جابوا رأس السنه في حدائق فللهم
> جابو العشا الما خمج
> وجابوا الناس البوزعوا العشا
> معاهم ناسات
> بوزعن العشا والبسمات
> حتى الناس البياكلوا العشا جابوهم
> وجابوا الساوند والعازفين
> وجابوا الفنان
> رأس السنه كلو جابوهو في بيوتهم
> العندو الحنه عاد بقعد املط ؟؟؟
> موش بنقش ؟؟؟
> وبراي يا حنه انا من عيني النوم قله
> الفنان بدأ بيها
> وحتوهو
> حتوهو بالدولار
> يلا ما حدش حوش منها حاجه
> المهم
> معرض المريخ بمعرض ولاية الخرطوم جناح وزارة الشباب والرياضه
> احتفالاً بأعياد الاستقلال
> وطبعاً بإشراف الرائعه سعديه عبد السلام والصادق نور الدائم
> عشان كده طلع رائع
> وكالعاده ابو الهل انسحب
> انسحب من المعرض
> سحاب كبير يا ابو كسكته
> طوالي منسحب ؟؟؟؟
> نادي الحركة الوطنيه ينسحب من احتفالات البلاد بالاستقلال
> كلارك سرو باتع يا خالد عز الدين
> اسي الحركة العملتوها دي برضو حركه وطنيه يا رمضان؟
> نادي الهلال للتربيه الانسحابيه
> دي عبارة لازم تعلقوها على سقف طابق الجوهره الشعبي
> طابق غريب شديد
> ما لافي الاستاد كلو زي طابق شاخور
> ولا بشبه طابق شاخور بتاع استاد الخطوم
> حته كده اظنها اربعه في اربعه
> ونطوا اربعه واربعه وبعدها اربعه
> وعملوا تاني حته اربعه في اربعه
> قالوا طابق
> يجوز
> متحف الخليفه عبد الله برضك فيهو غرفه فوق
> وبرضو طابق
> هو الطابق ده الا يكون اربعه شقق؟
> غرفة السلم ممكن تبقي طابق
> برج الحمام في رأس البيت طابق
> وفي طابق مستور
> موش بقولوا ليك خلي الطابق مستور
> المهم
> الحقيقه اننا عندنا طابق شاخور
> والجماعه عندهم الطابق مستور
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> ما مهم نمشي لي رأس السنه او رأس السنه يجينا
> المهم لما البعدو يجينا
> ما يلقى كملت المعدوده علينا
> الخوف يلقانا قبل نمشي لي رأس السنه مشينا
سلك كهربا
ننساك كيف وحلمان الكلب قال لي الاحتفال الحقيقي هو البنبع من وجدانك ولو تحت البطانيه
والى لقاء
سلك