الله يجازيك يا الركشة

> أكتب وأنا بين ضغط الجبص وألم الضلوع
> لمت ليك فيني ركشة ورتني الطفى النور منو
> أول مرة في حياتي أشوف شارع العرضة من فوق
> ياخ الشارع ده جميل جداً
> لو محافظ ام درمان اهتم بالشارع ده شوية
> لو على الأقل اعتبرو جزءاً من مكاتب المحافظة التي تطل على نفس الشارع
> كان أصبح شارعاً سياحياً مهماً
> بالذات وهو شارع سياسي
> كان الخليفة عبدالله يستعرض فيه جيش الأنصار
> وحضر بنفس الشارع المرتزقة
> وخليل إبراهيم
> وحتي نميري تحرك من خور عمر لكن جا بالعرضة في طريقه للإذاعة
> شارع سياسي قدر ده
> مفروض يبقى شارع سياحي عشان ما يرجع سياسي يا محافظنا
> المهم
> الركشة بالغت
> لا قالت الزول ده كبير
> و لا قالت الزول ده كان وقع على صلعتو دي بتتفقش
> بس تووووش جاتني ليك
> لكن ماحرقتني
> ولا حارة
> أكلتها ليك في حناني
> ومشيت حوادث السلاح الطبي
> أيها الناس
> حوادث السلاح الطبي الله يسترها من العين
> نظافة وقيافة وكوادر مؤهلة كلو زول عارف شغلو شنو
> وجوه تقابلك باسمة
> تمشي عليك قبل تصلها
> الكرسي ده بجيبوهوا ليك قبل تطلبو عشان ما تمشي بي رجلينك
> مستشفى لا يشبه مستشفياتنا
> السلاح الطبي ده تبع حميدة ؟؟؟
> سؤال بريء جداً
> المهم
> عافي للركشة
> لأنها كانت سبباً جمعني بالأحبة
> من وصل ومن اتصل
> وصدقاً قال من قال
> أكنز الرجال ما تكنز المال
> شكراً لكل الأحبة
> من وصل ومن اتصل
> شكراً لكل من سأل
> وشكراً للركشة التي جمعتني بالأحبة
> المهم
> الركشة ما عشان دقشتني
> لكن بصراحة ضارة جداً
> وهي إحدى أهم الأسباب الضارة بالبيئة
> سرطانات سااااي بتطلع من عوادمها
> وعلى الرغم من ذلك
> استيرادها فاااااتح
> وسمعنا تحت تحت عن أذونات تعطي لأصحاب الحظوة لاستيرادها
> وصاحب الحظوة ولا بستوردها
> ببيع الإذن ويقبض حقو والشعب يقبض في مستشفى الذرة قوي
> الركشة من ناحية ضارة ضارة
> ومن ناحية نافعة فيها منافع للناس
> فهي ولي نعمة سيدها
> وسواقها
> ومكنيكيها
> وصاحب دكان إسبيراتها
> فوق على ذلك تناسب حالة المواطن التي لاتسمح له بامتطاء الأمجاد
> يمتطي الخطوب مجبراً
> يا قوم
> الركشة تحتاج لمؤتمر حوار كبير
> عشان نعرف كيف نتفادى شرورها
> بدون أن نحرم من تعولهم من فوائدها
> أيها الناس
> الركشة ما معاها أمان
> لا للسايق ولا للماشي جمبها ولا للراكب فيها
> بل ما ليها أمان بالنسبة للرايق المابركبها
> لأنو الرايق ده بتنفس وين عاد؟؟؟
> موش من عوادمها ؟؟؟؟
> المهم
> مباراة جادة ورائعة أديناها ضد سانت جورج
> تجربة حقيقية خضناها
> أربعين ألف متفرج حضروا
> موش في ميدان بلدية تونس
> التيحا والفضيحة متباريات
> ولكن التجارب القوية هي التي خضناها
> ومعسكر قطر لسه
> طالما في رابطة قطر يبقى المريخ مافي خطر
> وقالوا راجع
> إلا تطيروا
> بدل شيبوب حايكون التمن كلو يوم تمشوا بالمقلوب
> وجع وجع
> الزول أيام ونلقاهو رجع
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> الركشة دي يوم بتودينا
> يا بي حادث يا بي قلبة يا من عادمها البنفخ الدخان فينا
> مشكلة الركشة حلوها لينا
> ولي سيدها والسايقها والبصلحها يا والينا
> ركشة واحدة بتدعم ستة بيوت لينا
> وبتكتل كلو يوم مليون فينا
> انتوا بتدعموا كم بيت يا والينا؟
سلك كهربا
ننساك كيف والكلب لو سمع زول قال ركشة بقرب يجري
والي لقاء
سلك