أريت التمساح لو أكلني كملني

> الله يجازي الركشة
> حرمت حروفي من معانقة عيون الأحبة
> لكن برضك بارك الله في الركشة
> لأنها أتاحت لي فرصة لقاء الأحبة
> من وصل ومن اتصل ومن أرسل
> من وتسب ومن فستب
> وفستب هذه تعني فسبك
> الركشة بالغت
> ركشة زي الكلب
> نطت لي هنا
> في رقبتي دي
> أول حاجة كنت قايلها عضتني
> المهم
> جمعتني وطرحتني
> ولكنها بالأحباب جمعتني
> حيدر أب ستة
> الهلالابي الكبير
> زارني وقال لي
> سمعت بالركشة ضربتك في صدرك
> إنت البقعدك في شارع الزلط في الواطة شنو يا سلك ؟؟؟
> تحية لكل من سأل او اتصل
> ولكن بصراحة
> إخوتي الأهلة الشرفاء ما قصروا
> في قروبات الهلال تمنوا لي عاجل الشفاء
> في رسائلهم كفروا لي
> في بيتنا زاروني
> هذا هو مجتمع الرياضة الذي نعرفه ونريده وننشده
> شكراً إخوتي الأهله الشرفاء
> برغم إنو الركشة الضربتني قالوا مكتوب فيها بي ورا كردنة
> المهم
> السعادة غمرتني وأنا في أحضان من زارني من مجتمعنا الرياضي الراقي
> وكم تمنيت أن أطلع الشارع وأقيف للركشة تكسر كراعي التانية
> عشان أظل أسبح في تلك العيون الحبيبة الى نفسي
> آها
> قالوا في واحد اسمو الطيب كان بزرع مشى قعد جمب البحر يرتاح شوية
> رجلو فيها حبة طين دلدلها في البحر
> جا التمساح قرمها ليهو
> شالوهوا جروا بيهو المستشفى ثم البيت
> ما كان عندو تأمين
> لكن ربك أراد الشفاء
> المهم
> تقاطرت الجموع إليه
> كلما تدخل دفعة تسألوا
> الحصل شنو؟؟
> يقول ليهم
> كنت بزرع
> سخنت شوية
> قعدت جمب البحر أرتاح
> كراعي فيها طين
> دلدلتها في الموية عشان الطين يفك
> التمساح جا قرمها
> يقولوا ليهو قدر أخف من قدر
> تدخل مجموعة تانية
> الحصل شنو يا زول؟؟
> أحكي لينا يا الطيب
> يقول ليهم
> > كنت بزرع
> سخنت شوية
> قعدت جمب البحر أرتاح
> كراعي فيها طين
> دلدلتها في الموية عشان الطين يفك
> التمساح جا قرمها
> قبل ما يشيل نفسو دخل حاج أحمد
> كفارة يا زول
> الحصل شنو
> قال ليهو
> كنت بزرع
> سخنت شوية
> قعدت جمب البحر أرتاح
> كراعي فيها طين
> دلدلتها في الموية عشان الطين يفك
> التمساح جا قرمها
> الطيب داير يشيل كباية الموية يشرب
> عمك دفع الله جا داخل
> يازول..الطيب
> خير
> أحكي لي
> الطيب قال ليهو التمساح قرم كراعي أريتو لو أكلني كملني
> لكن أنا ما بقول زي الطيب
> أنا بقول الركشة مع الحبان لمتني
> أريتها لو تدقشني كلو يوم وأعيش وسط أهلي الحمر متجدع
> ووسط أحبائي مجتمع الرياضة الحنون
> المهم
> أمس بكري المدينة تاني قام على حركاتو
> جاب قون في التعاون السعودي
> خلى ليك العقالات تطاقش
> وخلى خليك الكسكتات تطاير
> المدينة ده يوم بكتل ليهو كسكتة
> المهم
> الجات من ركشة سامحتك يا روشا
> ويا فطومة يا أختي قلتي لي مقسم على الدقشم؟؟
> ما عصرتي على الدقشم يا فطومة ؟؟؟
> الدقشم هين
> قون بكري كيف ؟؟؟؟؟
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> خالنا قال لينا
> في بعثة سنة خمسة وسبعين لي روسيا مشينا
> طلع من جيبو جنيه حديد يا والينا
> ده وقتها كان بجيب تلاتة آلاف وخمسمائة دولار قال لينا
> قلنا ليهو كيف بس أشرح لينا
> قال ده في حقيقتو ألف جنيه ما يمشوها علينا
> والجنيه الواحد كان بجيب تلاتة ونص دولار لينا
> الألف في تلاتة ونص ماياها التلاتة آلاف دولار هكذا قال لينا
> خالنا أقنعنا يا والينا
> أقنعنا بس وقول لينا
> الوصلنا الحتة دي شنو ورينا ؟؟؟
سلك كهربا
ننساك كيف والكلب قال الرياضيات الحديث ما بتقدر تضرب قيمة الجنيه اللينا..وهزا ضنبو وحكي أضانو بي كراعو الورا
والي لقاء
سلك