الحكم كان يلبس كسكتة

> أمس شفنا كيف مثل الهلال السودان
> وعلى الرغم من إنو ليبيا من زمن القذافي بقول زنقة زنقة ما ادقت فيها كورة
> إلا أن الليبيين وروا الهلال جنس زنقة
> واشفقنا على الحكم اكتر من الهلال
> يظهر عليهو كان مسخن شديد
> وفي سخانتو ديك احتمال يكون ضربو السحائي
> عشان كده كان يلبس كسكتة ويريحنا
> ومع شمسنا بتاعت اليومين دي
> وابو الهل لاعب عصر
> حقو حكم السبت الجاي يلبس الكسكت بالواضح المافاضح
> شمسنا والسخانة صعبات شديد
> ايها الناس
> من كورة قورماهيا في بورتسودان
> قلت ليكم نمره اتنين وعشرين بتاع الهلال الاسمو ابيكو ده ماسورة
> امس الليبيون مرقوا قذافي تاني من الماسورة
> مرقوا ماسورة من جوه الماسورة
> وأحرز أبيكو أول أهدافه الإفريقية مع الهلال
> المسخن أبيكو ده يا فطومة وكان أولى بالكسكتة بي سخانتو دي
> أما ابو عاقلة
> الزول ده اكيد مهند الطاهر لخبط تايمو
> الزول ده بتحاور سااااااكت
> اي زول يجي ماشي بالكورة جمبو يغسل
> مسجلين غسال يا اختي!
> غايتو قروشكم ما وقعت واطة
> جيبي ليهو ركشة بالأقساط واهو استثمار
> أيها الناس
> التحكيم طبعاً يخطئ ولا يظلم
> بالذات السوداني
> وكمان الافريقي بقى ينافس السوداني
> امس اخطأ في احتساب ضربتا جزاء للثوار
> واحدة كعبلة وقشة والتانية هاند تو بول
> ونقض حكم من زاوية نظرنا صحيح ومن وجهة نظر الحكم غير صحيح
> يمكن السخانة الفيها اثرت عليهو شديد
> قام اخطأ ولم يظلم الثوار
> لكن الدمازين ابدع
> الزول ده داير ليهو بوليس حركة ما حكم
> حقو ياروشا تأمنوا عليهو شامل كامل
> الزول حوادثو كتيرة
> المهم
> اليوم نقابل النيجيري
> لاندري إن كان الحكم الافريقي مسخن ولا مامسخن
> باقي معظم افريقيا اليومين دي سخانة
> فان كان من بلد سخانتها تلحم
> الله يستر النيجيريين ديل ما يبردوا عليهو الواطة
> لكن العشم في ربنا كبير
> واخوان العقرب جاهزين
> من لم يركب معنا
> هناك فرصة للركوب معنا بخالص الدعاء لنصرة الزعيم
> فيها ايه لو جينا من هناك متأهلين!
> المهم
> تمضي نفرة شفوت المدرجات قدماً
> أينعت لمحات الإبداع
> كأنها تقول
> لا مستحيل تحت الشمس
> وتغني
> بي إيديننا نبنيك يا بلدنا صممنا لازم نبنيك
> التحيه لبصري وجميع أركان حربه ناس مبارك ودراج وبجبج والبقية
> والتحية لشركة زروق الهندسية
> ولكل الجنود الشفوت في قوات دعم المريخ السريع
> أيها الناس
> كتيبتنا السنة الفاتت كانت مية مية
> هذا الموسم لم نفقد سوى أيمن سعيد للإصابة التي أجبرت الزعيم لعدم التجديد له
> وزدنا على أولادنا قدرات اخرى دون أن نخصم من قدرتنا القديمة
> النعسان قيمة مضافة اذا وجدت التوظيف الصحيح
> وعودة عنكبة إضافة شنكبة وعقربة
> وكلنا يقر بأننا افتقدناه بالإعاره حينما أصيب بكور
> أما الوك، فهو إضافة كبيرة
> ولكن اتحادنا في سبيل مجاملة التمرد خرج علينا بشرط جديد يؤخر إشراك ألوك
> وما عرف رفاق ونسي عملوا أيه في الحتة دي!
> المهم
> النصر سيأتي بحمد الله اذا عملنا له
> وكفاح لجنة التسيير ونضالها وهي ترفع الراية في أحلك الظروف يجبرنا على تقديم التأهل هدية لها
> أيها الناس
> للأسف فينا من يتمنى الخروج المبكر نكاية في لجنة التسيير
> مثلما كان فينا من يتمنى الخروج المبكر نكاية في جمال الوالي
> زي ديل لارجاء فيهم
> حقوا يخلونا ويمشوا يختونا
> قبل أن نسأل الله أن يفرتكهم ويريحنا
> تعلموا يا هؤلاء حب المريخ الكيان من شفوت القروبات
> اللهم نسألك نصراً كبيراً عزيزاً تعز به عبادك المريخاب
> اللهم إنا نسألك يا علام الغيوب ألا تحوجنا لشيبوب
> شيبوب أمس لو لعب الهلال كان اتعادل
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> تزيدوا الموية برضك ما بتجينا
> تزيدوا سعر النت علينا
> والشبكة في حالها بتزفت علينا
> زدتوا الغاز بقى يخرب الميزانية لينا
> أي شيء زدتوهو يا والينا
> ألا شيء واحد ثابت عندكم ولدينا
> المرتب ده ما تزيدوهو يا والينا
سلك كهربا
ننساك كيف والكلب قال الزول بتعرف مرتبو من حالة كلبو.. ورقد في الطين يهمهم… أهو عايشين
والى لقاء..
سلك