يا صقر الجديان

> منتخبنا
> صقرنا
> جدياننا
> أملنا وحلمنا الكبير
> أمس الأول كان كبيراً
> بس تحكيم حقر حرمنا من نصر كبير
> يظلمنا التحكيم الإفريقي في بلدنا
> في قلبا
> ورئيس لجنة الحكام بالكاف هو مجدي
> حقارة أكتر من دي قابلتكم؟
> أيها الناس
> قدم أولادنا مجهوداً مقدراً
> ذلك المجهود المقدر جعلنا نتحسر على إهمال المنتخب
> فمنتخب يؤدي أمام الأفيال بهذا المستوى وهو يقبع في آخر قائمة النسيان في رأس دولتنا البقت نساية دي
> نتحسر على إهماله لما نشوفوا قادر على المضي قدماً في المنافسات
> لكن تقول شنو
> ست الريد بقت نساية
> بلدنا فاقدة ذاكرة هموم المواطن
> فاقدة حسن ترتيب الأولويات
> لأن قائمة أولوياتها يقبع في مؤخرتها جوز اللوز
> الرياضة والثقافة
> أيها الناس
> من مظاهر الجمال أمس
> أثبت المنتخب إنه يتمتع بجمهور قوي وكبير ومحب ومثير
> وده في حد ذاتو مكسب كبير
> أجاد الصقور فساندهم الجمهور
> التحكيم ظلم الصقور
> فكانت ثورة الجمهور
> ولكنها جاءت متأخرة
> كعادتنا بالنا طويل
> ونؤجل الثورة فينا سنينا وسنينا
> نصبر على الظلم لما الظلم يتمحن والظالم يخت يدو على خدو
> المهم
> برغم أن التفلت ما حبابو
> لكن ثورة الجمهور آتت أكلها بس بعد فوات الأوان
> لو كنا بنثور أول بأول
> ونتدفق زي الشاي لما يفور
> مافي كفتيرة بتحقر بينا
> المهم
> لسه فيها لكن باحتمالات تجعل الظرف ضيقاً
> وطوالي الظرف ضيق
> وبدأ مازدا بداية فيها من التوفيق الكثير
> ولكن اذا تخلى مازدا عن اللعب بطريقة واحد وخمسة خمسة دي بنمشي لي قدام
> خمسة من كل فريق من القمة وواحد غريب
> وفي التبديل يطلع واحد من الخمسة ديل لازم يدخل بدلو واحد ينتمي لنفس الفريق ليكمل الخمسة
> أمس الأول بدون مجاملة وبدون تحيز ولأن المجال لا يسمح بذلك
> أمس الأول كان أولاد المنتخب فرع الهلال في الواطة دي
> وده طبيعي
> لأن معنوياتهم بعد الخروج الأفريقي المبكر
> الخروج البدري زي الخروج لصلاة الفجر ده
> معنوياتهم في واطات الله دي
> ولياقتهم البدنية تحت الصفر
> كيف لا وهم غيروا ليهم تلاتة مدربين في تلاتة شهور
> على كل
> الوضع النفسي والبدني للطير المهاجر جعلهم يفتقدون للياقة الذهنية والتركيز
> فكان ضياع هدف محقق من نزار هدية من بكري
> ومثله من بشة الذي أراد أن يحتفل قبل أن يحرز الهدف
> وللأمانة ابو عاقلة وأطهر كانا جيدين
> ولن ننسى الفرصة التي أضاعها كاريكا وسط دهشة منه قبل دهشة الجمهور
> لذا ولذلك
> في المنتخب ده الجمهور مقتنع بوجوب ذوبان كل الألوان عشان يسود علم السودان يا مازدا
> أترك خطة واحد خمسة خمسة دي
> صدقني بنمشي لي قدام لأنك مؤهل لذلك يا كوتش
> المهم
> تحية شخصية لكل الجماهير التي حضرت وشجعت وثارت في وجه الظلم
> وتحية كبيرة جداً لأكرم الهادي البطل
> ولو عرف أكرم قدر نفسه
> لوصل للعالمية من العباسية دون أن يمر عبر المطار
> عليك الله يا أكرم خليك مهتم شديد لأنك نجم موهوب
> أيها الناس
> ماذا لو اهتمت الدولة بالمنتخب؟!!
> ماذا لو سلحناهو كما نقوم بتسليح الجند؟!!
> ماذا لو أعددناهو بقناعة كبيرة لأن الرياضة خير سفير؟
> وخير وزير
> وخير.. خير كتير
> التحية للجهاز الفني وللصقور
> ولننتظر الحظ الطيب لنتأهل
> أيها الناس
> أيكون كردنة محقاً في الاستغناء عن كاريكا ونزار وبشة والشغيل وبويا؟
> الزول ده قالوا ينوم يقوم من النوم يشطب اتنين
> غايتو نومة أمس دي الله يستر على كاريكا من صحية الليلة
> أيها الناس
> إن تنصروا الله ينصركم
> آها
> نجي لي شمارات والي الخرتوم
> لا دايرين نقسم ثروة ولا سلطة ولا نعمل جنينة
> لا دايرين دعم ولا دايرنكم للأسعار تراعوا لينا
> وسيلة الترفيه الوحيدة الفضلت لينا
> الكورة يا والينا
> عليكم الله وعليكم الله بالمنتخب بس اهتموا لينا
سلك كهربا
ننساك كيف والكلب زعلان زعلان لمن عضى ود الجيران
والي لقاء
سلك