من حسن حظنا

> عشرين سنة نتحدث عن البناء > عن بناء فريق البطولات > ونلت ونلخ ونعجن > نبني ونفرتق > نفك الطوبة النصيحة عشان نخت محلها طوبة معطوبة > وهكذا دواليك > السنة الوحيدة التي تطاولنا فيها بالبنيان المتين حتى وصلنا مرحلة السقف > كانت مرحلة المعلم غرزة > الراجل خت السقالة وبدأ في رص الطوب > شايل السليم والمعطوب > فات بيم النص > وطلب طوب بمواصفات محددة لانو ماشي علي بيم السقف > كان داير يسقف المعلم > لكن الطوب الطالب بيهو لم يوفروهو ليهو > الجماعة البرسلهم المقاول قالوا طوب زي ده مافي > طوب بالمواصفات دي مافي > قام المعلم غرزة جاب العينة > قال ليهم زي ده > عينتين ماعينه واحدة > قاموا الجماعة البرسلهم المقاول قالوا يودوا الطوب الجابو غرزة ده للكشف والفحص في المواصفات ولدي الشؤون الهندسية > وهناك طبعاً الاجهزة بتشتغل حسب طلب طالب الخدمة > سبحان الله بتديك التقرير الفي نفسك > بتعرف نيتك > والجماعة البرسلهم المقاول ديل نيتهم معروووفة > نيتهم غلبت > ودائماً نيتهم غالبانا > طلعوا الطوب كعب وفاو ساي وما نجيض > ضحك المعلم غرزة وهو علي السقالة ممسكاً بالمسطرينة > وايقن اننا لا نريد ان نسقف > لا نريد ظلاً يظلنا > وتحسر على المجهود الكبير الذي قام به من اجل بناء الصرح > المهم > الجماعة البجيبو الطوب المعطوب > كعادتهم قدروا علي المقاول > وابعدوا المعلم غرزة عن سقالة البناء والتشييد المريخية > ليبدأ انهيار اعظم بنيان مريخي في العشرين سنة الاخيرة > ثم أصاب المباني تلك التصدع بسبب الاهمال > المقاول الجديد بآخر الصرفيات > تمرد الطلب > وبعضهم تعلل بالمرض > وواحدين قالوا نجيب المونة كيف والموية قاطعة > وبدأ طوب المعلم غرزة يتساقط ويسقط > طوبة طوبة… واحدة… واحدة > الي ان اصبحت تلك القلعة الرائعة اطلال وذكريات ونفوساً > اطلال قلعة مريخ 2015 > من منا لم يشارك في هدم ذلك البناء الجميل؟ > من المقاول وحتى الواقف يتفرج معجب بتلك القلعة التي خططها وبناها المعلم غرزة. > المقاول القديم شارك بفسخه للعقد من طرف واحد في تلك المرحلة > الناس البتجيب الطوب المعطوب شاركت > المقاول الجديد شارك في ذلك ايضاً > يجي يقيف بي عربيتو ويسأل > الناقص شنو؟ > يقولوا ليهو طوب جيد ومعلم فلتة ورملة واسمنت > يقول بكرة بنزلهم ليكم > وفووووو > بكرة دي اصلها ما بتجي تاني ولاهو بجي > حتي الطلب شاركوا > يجوا يلقوا مافي مويه يكسحوا طوالي > مابكلفوا انفسهم عناء الصبر على نقيط الماسورة الجابها القدر عشان يمشوا حال البنيان > وهكذا سقط البنيان علينا اهمالا > والآن نعود لنفس السيرة > اننا في مرحلة بناء > بناء بالبا؟ > بناء كيف ونحنا بنجيب اتنين طلب قدام نسلمهم المباني على اساس انهم معلمين > ياخ قول ملاحظين عمال > ياخ قول مشرفين > لكن معلمين!!! > يادوبك الحيطه حاتقوم مايلة > تقول ليهو يا معلم الحيطة مايلة > يقول ليك بجيبها البياض > بعد البياض لسه مايلة > المعلم محسن يقول ليك بجيبها الجير > وتظل مايلة خير برهان علي عشوائية العمل عندنا لاننا ادمنا علوق الشدة > ولاننا اصبحنا زي الاطفال > نفرح ونفتخر جابوا لينا وجابوا لينا > يهمنا الكم ولا نهتم بالكيف > ولأن الكم نفسه لا يهتم بالكيف > في شهر شهرين تبوظ كل الملابس الجابوها لينا وتبهت الوانها > ثم نفرح من جديد بي جابوا لينا وجابوا لينا > لنواجه بنفس الطوب المعطوب > ايها الناس > ما وصل اليه حال المريخ من سوء يشارك فيه الجميع > التسيير ون سبب كبير في ذلك > ولكن قبل ذلك هناك اسباب كبيرة وكثيرة > يجب ان نعترف بذلك > ويجب ان تعترف تلك الاسباب بذلك > اذا لم نعترف بعيوبنا لن نتطور ولن نتقدم > سنظل نفرح بي جابوا لينا كماً > وننهار لاننا لم نهتم بالجابوهوا لينا كيفا > ونقعد طول العمر لاخين طيننا > كان سألونا نقول بنبني > المهم > كنا محظوظين لأننا بذلك المستوى وتلك المعطيات قابلنا فريقاً هلكان جداً > نحن في أسوأ حالاتنا > وهم في احسن حالاتهم > ويفوزون علينا بخطأ مصعب وصهينة الحكم > احتساب ركلة جزاء بدون تردد > والتغاضي عن اخريات والصهينة > واذا استمر التحكيم في بلادي طوالي يخطئ > صدقوني كورتنا تاني حاتبقي نسياً منسياً > ايها الناس > كم ركنية في المباراه لينا وكم ركنية للهلال؟ > موش قلت ليكم فريق ضعيف > ايها الناس > كلام المعلم غرزة كلو مشي وجا > وطالما نعيش اياماً للتلاقي والتصافي بين الغرماء > ما احلي التصافي مع غرزة من بعد التجافي > لانو الكان بينا حاصل اسباب ليهو مافي غير النميمه والكذب والمصالح الشخصية > فليهنأ الغلابى بفرحتهم هذه الايام > وليسعدوا بالفطرة التي اخرجناها لهم قبل مواعيدها > وليستمروا في فرحهم طالما نحنا لسه بنخرمج ونعتمد علي جابوا لينا كما ولا نهتم بكيفا > ونقعد كلو سنه نبني لاخين طيننا حتي ظننا اننا نشجع لخويا > شكراً جماهير المريخ الوفية > العيب ما في الارض التي نبني عليها > العيب في الطوب المعطوب > ايها الناس > ان تنصروا الله ينصركم > اها > نجي لي شمارات والي الخرتوم > كان شفت يا والينا > يوم الاتنين كان يوم معجزات بالنسبه لينا > اليوم كلو الكهربا ما قطعت يا والينا > والماسورة كبت لينا > عشان كده الهلال غلب يا والينا سلك كهربا ننساك كيف والكلب قال كلب وقلب الفرق ما كبير والى لقاء سلك