أشهر 5 قصص إخبارية مفبركة إنتشرت خلال شهر رمضان عبر مواقع التواصل في السودان

الفبركة Fake News
من بداية رمضان كمية كبيرة من الأخبار والقصص المفبركة تم تداولها في مواقعنا في معظمها تهاجم الحكومة أو تنتقص منها ، وواضح إنها أنطلت على كتير من الشباب بدليل كمية المشاركات و التفاعل فيها ، الشغلانة دي أظن وراها جهة تقصد ضرب مصداقيتنا وعلى سبيل المثال :

1- الفيديو المفبرك للوزير جادين ..جاب فيديو أو مؤتمر وخته شعار سودانية 24 ، وعمل مؤتمر صحفي بدون مايظهر صورة صحفي واحد بيتكلم

2- حكاية كان عندنا في سكة حديد سنة 1994 حوالي 3 مليون كلم قضبان وفلنكة .. إذا كان محيط الكرة الأرضية 40ألف كيلومتر نحن معناتا كنا ممكن نوصل من الخرطوم 80 أو 90 خطوط سكك حديد تلف الكرة الأرضية بالبحر زاتو

3- حكاية محمد ابراهيم مو المليارير السوداني قال حا يدعم المعارضة في الإنتخابات بي 1.5مليون أسترليني ، الكلام ده ما من سياسة منظمة مو فاونديشن .. وحتى اللقاء المشار إليه في الخبر كان الحوكمة والحكم الرشيد في كيجالي في أخر ابريل الفات أنا شفتو ما جاب طاري السودان واللقاء ده كان عن التغيير الجذري Deep Reform وأثره على على حفز الإقتصاد ، بحاول أشارك من اللقاء ده في الايام الجاية بوست أو أتنين

4- حكاية مهاتير استعاد للخزينة 50 مليار في 4 أيام ، الكلام ده بتنافى مع أساسيات الدولة الحديثة وفصل السلطات الشغلانة دي مشوار طويل من التقاضي ، ولو الفساد داخلي على الأقل بتاخد شهور ، ولو خارجي تاخد سنين، حتى أعتى الدكتاتوريات لو عايز تصادر حقك بتحتاج لفترة لأكتر من 4 ايام ، زي ما عمل نميري في التأميم في 1970 ، على العموم موضوع ماليزيا ده هم أكبر شيء بتكلمو عن صندوق سيادي اصوله موزعة بين امريكيا وسويسرا قيمته بحدود 4.5مليار ويادااااب عينو ليه زول يتابع موضوعو

5- برضو فيديو قديم لاسود البراري في ميدان الشهيد صلاح سنهوري بيصدرا فيه بيان رقم واحد ، تم تداوله بشكل كثييف كانه حصل الاسبوع الماضي .

صح قد يكون الـ Fake Nesws جزء من الشبكة وساعدت رؤساء زي ترامب في الوصول للسلطة وهسه معذباه زي ما بيقول، لكن لمن تزيد بتضرب مصداقيتنا كلنا وده بالزبط البتسعى ليهو السلطة وجدادها
. كتير من الشباب البديرو صفحات مؤثرة ما بينتبهو لمشاركات الأعضاء الذي دي .. لو عايز تتأكد ما صعبة دقيقة أو أتنين في قوقل حا تعرف الحاصل

بقلم
هادي بورتسودان