حكومة قحت تدعم اجندتها الأيديولوجية تحركها الروح الانتقامية والتشفي مش من الكيزان ولا المؤتمر الوطني بل من (..)

أنا خالد الفيل دا ممكن بعقلي أقعد أقول ليك الحكومة دي لو سقطت حيجو العسكر وحميدتي حيحكم البلد عشان كدا مفروض الناس تباصر الأمور وتصبر على الفشل والأخطاء بتاعتها.

لكن والله بقلبي دا لو الحكومة دي الليلة سقطت ما بقدر أقول ليك أنا حاتأثر ولا حيهمني أمرها ولا حاقوم أدافع عنها، لأنه ببساطة شايفها حكومة جاي تدعم اجندتها الأيديولوجية وبحركها الروح الانتقامية والتشفي مش من الكيزان ولا المؤتمر الوطني بل من كل ماهو إسلامي. وأنا كخالد الفيل دا بدفاعي عن دور الإسلام في الفضاء العام السياسي والاقتصادي والاجتماعي دا، الحكومة دا لا بتمثلني ولا أنا ممكن أكون جزء منها ولا شايفها لا بتعمل في حلم سوداني ولا رؤية وطنية ولا حاجة، ياها أفكار النخبة العلمانية البنعرفها دي.

وبعد الحصل دا من وقوف مجلس الوزراء مع ولاء البوشي في موضوع عبد الحي، واعتقال على الحاج، وتصريحات القراي حول المناهج، وإغلاق كل المنظمات الدعوية والإغاثية المحسوبة على التيار الاسلامي الذي شكل قادته معارضة لقحت (تيار الشريعة والقانون) = ما عندي أي كلمة أقولها عشان أرد على أي إسلامي شايف الحكومة دي ضد الإسلاميين وجاية بمشروع استئصالي ليهم.

والتبرير المستهبل بتاع انه كل المنظمات دي بتاعت كيزان ومؤتمر وطني البقول فيه تجمع المهنيين وجداد قحت دا حقو يبلو ويشربو مويته لانه دا استهبال وكذب بس، أما التبرير الأشد استهبالاً الحاولت وزارة العمل تغطى بيه الخطأ دا بتاع انه المنظمات دي فيها مخالفات تسجيل فبالله المنظمات العندها مخالفات تسجيل كلها ذات توجه اسلامي بس ومافي أيد منظمة تانية عندها اَي توجه تاني فيها مشاكل تسجيل مش كدا ؟

الكلام دا كله كان الزول ممكن يقبله ويصبر عليه ويمصر ليمونة على نفسه لو كانت دي فعلاً حكومة منتخبة واختاروها الناس، لكن الحكومة دي وقحت كلها بما فيها تجمع المهنيين السودانيين حملتهم أعناق السودانيين الساخطين على فشل الانقاذ وتحديداًً في الملفات الاقتصادية بصورة رئيسية عشان كدا دورهم الرئيسي ويشتغلوا على أهداف الثورة دي مش يشتغلوا على أجندتهم وافكارهم.

حقو ناس الحكومة ديل يركزوا في شغلتهم ويعرفو كويس تبعات الحاجات البعملو فيها دي، وحقو الاستهبال ومحاولة الاستهداف للإسلاميين ولكل ما هو إسلامي بمسميات “الثورة والكيزان” دي حقو يفكروا فيها مرتين قبال ما يستعملوها لانه حبل الكذب دا قصير، وحتي في الفترة القصيرة البقعدك ليها حبل الكذب دا بخلي اي زول عارف الحقيقة يفقد الثقة فيك.

ربنا يمسكنا بعقلنا دا بس !

Khalid Osman Alfeel