وين (حنبني) وما (حنشحد)؟ وبكرة يا سودانا تكبر؟
يوم طلعنا
كنا قايلين بكرة أجمل
وكنا فاكرين
انو بالتغيير حنوصل
يوم طلعنا
كنا شايلين الاماني
للوطن مستقبل افضل
واعتصمنا
وما انهزمنا
ولا انقسمنا
وقلنا يرحل الا يرحل الا يرحل!
وقام رحل
جيتونا انتو
جيتو يا خيبة رجانا
جيتو من وين لي اذانا
ولي عذابنا ولي شقانا؟
وين كلامك يا (سنعبر)؟
يا (سنصمد) يا (سنصبر)؟
ووين وعودك بالتقدم
ولا قاصد بالتأخر؟
ووين (حنبني) وما (حنشحد)؟
وبكرة يا سودانا تكبر؟
وموية مافي
وغازنا مافي
وكهربتنا الجيت لقيتها
هسة مافي
وجازنا مافي
لا في بنزين في الطلمبات
لا المصافي
عيشنا مافي
امنِ مافي
وانت شغال لينا سينات
(سوف نفعل) و(سوف نترك)
ياخي قوم لف
وانت اصلاً كنت لافي
يا الخبير الاحترافي
كنا عايشين نعمة قبلك
كهربا وموية ومشافي
مواصلاتنا كتيرة وافرة
وكلو بالدعم الاضافي
كانت الاسعار رخييييصة
والزمن بسام وصافي
والبشير يعرض يبشِّر
ويفتتح شارع /ومصنع
وجامعة /كبري/
وحالنا والله زيو مافي
ناس بتزرع
وناس بترعى
وناس بتصنع
وناس بتحصد وياااا عوافي
وجيتو يا وجع المنافي
جيتو هدمتو البنينا
وزدتو وجعتنا العلينا
جيتو جوعتونا اكتر
وما قدرتو على البدينا
جيتو خربتو اللقيتو
ويا شماتة الناس علينا
#جنو
بل العفن