يا عزيزي الشاب.. انت حالياً جزء من معركة بين جناحين من اجنحة السلطة

عزيزي الشاب، خروجك في موكب/مظاهرة داعي ليها التجمّع أو أي اسم تاني زي ” تنسيقيات لجان المقاومة” ..الخ مهما كان عنوانها رنّان و شعارها فيو بريق = فخروجك يعني إقرار منّك بي كامل إرادتك إنك تخوض معركة بالوكالة، يعني خايضين بيك معركة لي اغراض غير الكتبوها ليك في البوست الحدد مسارات الموكب.

– عزيزي الشاب .. ماف جسم على الارض اسمو ” تجمع المهنيين السودانيين”؛ في صفحة فيسبوك اتصنعت رمزيتها و عدد متابعينها ايام الثورة الحقيقية على نظام البشير = الصفحة الفيسبوكية دي حالياً ماسكنها شلّة حزبية و هم امتداد لي جناج في السلطة القائمة حالياً؛ الجناح دا خايض ليو معركة ضد جناح تاني داخل نفس السلطة، فجناح الصفحة الاسمها ” تجمع المهنيين السودانيين” بقوم بستخدم الصفحة العندها وصول عالي للناس و عبر المواكب = بضغط على الجناح التاني عشان يمرر أجندته، و عايز يفرتك التحالف القائم و يتشكل تحالف جديد يكون هو برضو جزء منو.

– طيب ليه يفرتك التحالف دا و هو جزء منو ؟ لأنه معروف للمتابعين تحت تحت انو.في تحالف جديد قعد يتشكّل = و الجناح بتاع الصفحة دا ما جزء من التحالف الجديد القعد يتشكل تحت تحت دا = اها جناح الصفحة قام عمل اتفاق مع الحلو و قعد يضغط بالصفحة و.المواكب عشان يعرقل الحاجة دي.

– بي اختصار يا عزيزي الشاب .. انت حالياً جزء من معركة بين جناحين من اجنحة السلطة، الشيوعين و.اليسار الماسكين الصفحة و عندهم.كدايسهم جوا اغلب لجان المقاومة، و.الليبرالين و اشباههم زي الاتحاديين و حزب الامة و الى حدّ ما المؤتمر السوداني. فما تسمع تصحيح المسار و جرد الحساب و الكلام الفارغ دا .. دي معركة انت ما عندك بيها علاقة و مستخدمنك فيها ككرت ضغط بس.
إن كنتم لابد فاعلين و.خارجين في مواكب = فافرزوا عيشتكم و مواكبكم من صفحة الفيسبوك الاسمها التجمع دي و من كل اجنحة السلطة العندها امتداد في الجهاز التنفيذي او امتداد داخل لجان.المقاومة، لو زعلان من الوضع و.عايز تضغط، فاضغط بي مطالب و مواكب نابعة منك و من صميم المواطن، مش تكون تحركات عبارة عن حرب بالإنابة و.تم شغل و.امتداد لي خطاب السلطة.
الله يعين.

Ali Abuidress