رأي ومقالات

حراك ديسمبر هشم الدولة السودانية نهائيا وخلق حالة سيولة سياسية وأمنية


انا على المستوى الشخصي معجب جدآ بناصر .. و لكني اعرف أن ناصر تسرع في الأعلان عن نواياه في خوض الحرب .. تسرع في الإعلان عن مشروعه .. خصوصآ و هو يعلم ان تكلفة هذا التصريح عالية و أنه أن دخل هذه الحرب فسيخسرها لا ريب ..
في المقابل معجب جدا بنموذج الصين .. الصعود بهدوء و دون شوشرة ..
الصين اليوم بتصرف أكتر من ٢٥٠ مليار دولار سنويآ على جيشها و تسليحه .. و بتجلس في المرتبة الثانية في الأقتصاد العالمي و تمضي بخطوات ثابتة نحو الأطاحة بامريكا ..
الكلام ده كله في صمت شديد .. و طوال المسيرة دي الصين دي قدمت تنازلات تاريخية .. و أنحنت للعاصفة مرات و مرات .. عشان تصل لنقطة معينة تقدر فيها تقول (لا) بدون ما تهدد وجودها كدولة و تهدد مصالحها ..
ما مهم الشعارات بقدر ما مهم ايمان الاشخاص البيقودوا البلد بيها .. أننا عندنا مشروع وطني كبير .. عنوانه الأنكفاء على الذات و بناء علاقات جيدة مع العالم و مع الدول العظمي .. و العمل في صمت ..
نحن محتاجين نعرف حدود قدرتنا و حدود تأثيرنا .. الشعب السوداني ما مجموعة من الاولياء .. الشعب ده عاوز يأكل و يشرب و يتعلم .. ما يقيف في صف .. و تتوفر ليهو كهرباء و مدرسة و مركز صحي .. و مؤسسات تحفظ كرامته ..
الانقاذ دي ما كانت فاسدة للدرجة البيروج ليها .. لكن العقوبات دي قادرة على اقعاد أي دولة و تحويلها لدولة متخلفة ..
يعني أتخيل دولة زي فنزويلا او ايران بكميات النفط و الثروات الطبيعية الهائلة دي شعوبهم بالكاد بتأكل .. و ده بيعنى عاجلآ أم أجلآ الدولتين ديل حينهاروا .. و حيصلوا مرحلة تحكمهم جماعات تدين بالولاء الكامل للغرب ..
الخلاصة البقولها نحن أمريكا دي بعيدة جدآ و اسرائيل ما عندنا معاها حدود مباشرة .. نحن و ان كنا بنرى فيها دول هيمنة و استكبار و لكن حاليا ما في يدنا ما يمكننا من النهوض .. خلينا أقول ليك بوضوح أنه هاتين الدولتين صنعوا حلف اقليمي هو الاقوى تاريخيا في المنطقة مع دول عندها امكانيات .. و الحلف ده بيعيد ترتيب الاقليم ..
الانقاذ دي سقطت عبر العقوبات من جهة و عبر الحروب الأسفيرية البتحرك كتل كبيرة من الشباب ضدها و ضد توجهاتها و عبر شراء جنرالات للانقلاب علي النظام ..
الخلاصة انو في ظل دولة هشة لهذا الحد .. و اوضاع اقتصادية سيئة .. ممكن تخلق ضدك عشرات المليشيات الحتنهك الدولة .. ممكن تصنع ضدك احتجاجات يومية مستغلة الخنق الأقتصادي الحتتعرض ليهو .. ممكن توظف مئات النشطاء كجزء من حملتهم ضدك .. و في النهاية حتسقط زي ما سقطت الأنقاذ و القذافي .. زي ما اتحطم العراق و قسمت سوريا و افلست لبنان .. المشكلة حيسقطك شعبك ذاتو ..
النقطة دي وصلنا ليها حراك ديسمبر .. لانو هشم الدولة نهائيا و خلق حالة سيولة سياسية و أمنية جعلت البلد تدار من السفارات .. الأثار السياسية و الاقتصادية للحراك وده خلت حتى مساحة المناورة الضيقة الكانت متوفرة للأنقاذ تنعدم ..
حاليا نحن مسلوبي الارادة و السيادة ، و قاعدين في السهلة بلا امن قومي و لا اقتصاد و لا بنقدر نقول نحن في دولة ..
حقو نعرف نرتب اولوياتنا شوية شوية .. و ندي نفسنا فرصة نشيل نفس ..
#التطبيع_العادل
#وهكذا
عبد الرحمن عمسيب



‫2 تعليقات

  1. الإنقاذ دي ماكانت فاسدة للدرجة البروجوا ليها دي..فساد الإنقاذ يادغمسيب روج عن نفسه براهو بيت جالوص فجأة يبقى عمارة ده شنو ياجماعه ده مؤتمر وطني.المدرسة الجديدةمؤتمروطني المصنع ده كوز,,الإتزوج الخامسةده شنو حركةإسلامية.الزول البنا نص ميدان الكورة ده شنو ده ألإتزوج بنت أخت الوزير صدقوها ليه.يادغمسيب إنت ماعايش في البلد دي ولا بتكابر ساي اهو نكتب وخلاص.!

  2. يا عمسيب،، إنت عندك ملاريا خبيثة؟؟ يعنى الحمى طالعة ليك فى راسك،، وللا شنو؟؟؟!!
    هسة عليك الله، دا كلام يكتبوا زول عاقل؟؟؟!!!
    ياخ ما تضيع زمننا،،، أمشى شوف ليك موضوع يفيدك,,,,,

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *