رأي ومقالات

هل الحظر في السودان مفيد حقا؟


الكلام الجاي دا حار ومؤلم جدا!
لو ما بتستحمل ما تقرا!
حالات الاصابه ب covid-19 ارتفعت بشكل ملحوظ في الأسبوعين الاخيرات ودونكم احصاءات النشرة اليومية لوزارة الصحة الاتحادية..!
نسب الوفيات مخيفه!
طيب دا كلو ما الموضوع طبعا..
الموضوع هو جدوى الاغلاق أو الحظر!
هل الحظر في السودان مفيد حقا؟
طيب اصلا الحظر دا بيتعمل كيف؟
مدارس جامعات منشآت خدمات عامه.. الخ الخ كلو يقفل!
كلو جوه البيت مافي جيران مافي دافوري مافي دكان وتموينك عندك وحاجاتك عندك والدوله مسؤوله توفر ليك غذاء ودواء في فترة الاغلاق.. وبيتك بيتك!
بنسبه كم في الميه ممكن يحصل حظر بالطريقه دي في السودان؟
صفر! اكبر صفر في العالم!
نرجع بالذاكرة شويه للحظر الفات؟
كم زول طلع تصريح؟ نص الشعب الخرطومي!
تقريبا اي زول بعرفو كان عندو تصريح!
البوستات في فيسبوك كلها كانت :العساكر منعونا نمر.. العساكر حدروا لينا.. مرتي كانت حامل.. ما اكلنا الا شعيريه!
طبعا لمن تكون مترسه بلجان المقاومه وزول يشتكي بتلقى الناس عايزه تاكلك لانك ما متضامن مع قضيتهم العادله!
لكن الدوله تقفل الشوارع والكباري عشان في فيروس في شكل نيزك حا يكتلنا كلنا الناس ديلاك زاتهم يقولو ليك نحن اتعطلنا من معايشنا وكيف الحكومه تقفل الشوارع!
ما علينا!
اصحاب الاعمال اليوميه + الحرفيين + ستات الشاي وبائعات الاطعمه وغيرهم وغيرهم الناس ديل اكتر فئات اتضررت من الحظر وما قدروا يتحملوا لفترة طويله ورجعوا يشتغلوا من جديد في فترة قصيرة رغم الخطورة عليهم هم شخصيا.. وما عليهم لوم والله..
هل اتعملت خطه عشان تحل مشكله الفئات دي بعد تجربه الحظر السابق ولا لا؟!
مشاكل مراكز العزل والمستشفيات..
دي عايزه ليها بوستات وبوستات.. مآسي حقيقيه من تمويل واعاشه ومعدات وترحيل للأطباء والفنيين والكوادر المساعدة! في اي خطه جديدة للمشاكل دي ولا تاني حا نخش في صراعات دقشو رماهو الفاتت؟!
مشاكل الترحيل الفاتت مع انعدام المواصلات في فترة الحظر؟ كيف وكيف؟ نفس المشكله الفاتت؟
تلاته حاجات اعملوها :
البسوا كمامه.. وما تقول لي الكمامات معدومه كمامه قماش طبقتين تتغسل كل يوم وتتشر في الشمس والبسها تاني..
غسلوا يديكم ب استمرار..
وما تسلموا على بعض!
وانسونا من موضوع الحظر والاغلاق دا لانو شعر ما عندنا ليهو رقبه!
التشغيله الناتجه من الحظر اكتر من جدوى الحظر نفسو والله!
#الموجه_الثانيه_السودان

Dalia Kabashy



تعليق واحد

  1. كلام موضوعي جدا..

    الناس تلتزم بالكمامة و التباعد الاجتماعي وعيشوا حياتكم عادية ..كلمة عادية فيها مغالطة كبيره…
    تقصد في البلدان التي حكومتها تتحمل اعباء المواطن..مش زي ما عندنا.

    نحن دخلناا الحيره الكبري..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *