على قيادة الجيش ان تعلم انها ان اعادت حمدوك للحكم فقد حكمت على نفسها بالموت وضياع السودان

والله انا بستغرب من كلام البعض ومن طريقة تعاطيه مع الأوضاع ومن انه شعب يحتقر في جيشه ليل نهار. كأنه العساكر ديلا ما ابناء هذا البلد وجاين من كوكب تاني وفقط اعداء للشعب ويترقبو الفرص للتنكيل به. ياخ فتحو زهنكم ده شويه وقيسو الأمور بحكمه وبمقياس أوسع من كده. العسكر ديلا من صلب الوطن ده وهم الفدوه بأرواحهم في كل الأزمان والحقب المرت. يكاد كل بيت سوداني فيهو عسكري أو ضابط زي مافيهو قحاطي. المشكله وين لو حكمو في الوقت الراهن ده وفي ظل الانشقاق الحاصل ده لو بتتصلح الأمور والبلد تستقر وبعد سنتين يعملو الانتخابات عامه الوعدو بيها!؟؟ نحن يا اخوانا جربنا طول الحقب الفاتت ديمقراطيات كتيره. قسما بالله الأحزاب طوال حقبها خور واحد ما حفرته. خليك من أنها تبني ليكم بلد. غير المشاكل والحفر لبعضهم والمناطحه والكرسي ما عندهم شي. ولا بهمهم وضع البلد ولا المواطن ولا معيشته.مافي نضج سياسي ابدا مع الأسف للنخب السياسية في السودان بس لديهم التنظير والجعجعه الفارغه. وده حالها من السودان استقل.غالبية الدول فيها أحزاب ومعارضه وبينهم خلافات في الرؤى ولاكن لما يكون في مهدد حقيقي للبلاد تلقاهم اتحدو وركنو كل الخلافات جمب. إلا السودان ده. فجووور في الخصومه وتصلب حاد في الرأي وكل زول عايز ينفذ ألفي راسه بس. حتى لو البلد تخرب ويعمها الدمار والموت للشباب ما عنده اي مشكله ولا ذرة احساس بي مسؤولية!!! يا اخوانا فوقو شويه. اتعظو وشوفو الحصل في اليمن وسوريا والعراق وليبيا وبالأمس جارتكم إثيوبيا القريبه دي. نسأل الله السلامه من الشرور والفتن ونستودع الله السودان من شر بعض أبنائه.