بابكر سلك
بواب ما بعملا
> كان بكون زول بسيط وامي
> ترفع ليك ورقة من الواطة
> تشخبت فيها تديها ليهو
> يفتح ليك الباب تدخل
> الناس كانوا طيبين شديد
> اسي البواب اتطور واتعلم وقشر وانتشر
> تطلع البطاقة او الاذن يقراهو
> ويتفحصو ويتمحصو
> وعشان يوريك انو هو زول قاري لكن الظروف صعبة
> يقوم يرجع ليك البطاقة ويقول ليك اتفضل يا الصادق عادل عبدالرحمن
> وبمناسبة بواب دي
> قالوا افقر واشرس بواب في تاريخ السودان
> بتاع مستشفى عطبرة في السبعينيات
> قال ليك الزول ده مسيخ مساخة الترمس
> مسيخ مساخة مسؤولين من بتاعين اليومين دي
> مسيخ مساخة تسجيلات الهلال
> ولو جيت اول السودان
> ودخلت طب الخرطوم
> ما ممكن تدخل مستشفى عطبرة
> زول لئيم لدرجة ما عادية
> ياخ ده قال ليك مرات تهف ليهو
> العيان ما بديهو فرصة يدخل
> لو يموت في خشم باب المستشفى
> ما بخليهو يدخل
> قبل كده قال ليك جابوا زول انقلب بيهو لوري
> الراجل مدشدش حتة حتة
> لما وصلوا باب مستشفى عطبرة
> البواب ابى يدخلهم اصلو
> قدر ما شالوهوا وختوهوا
> حلف بالتقطعو حتت ما يدخلو
> واحد قال ليهو الزول ده مكسر وبنزف
> الزول ده من حقو يدخل يتعالج
> البواب قال ليهم
> ختواالزول ده هنا
> واشر ليهم على المساحة البعد الباب طوالي
> الجماعة ختوهوا
> قال ليهم امرقوا
> وقفل الباب و
> قال للمكسر وبنزف
> قوم امشي الدكتور في البرندة دييييييييييييك
> المرافقين ما بدخلوا عشان ما عندهم كرت مرافقة
> بواب مفتح لي بهناك
> الزول ده قالوا كان عندو عين كاجيها
> واحد داير يلحق الزيارة عشان محصل القطر
> منعو يدخل كلو كلو
> قدر ما الزول شكرو
> البواب ابى
> لما مواعيد القطر قربت
> الزول كتر الجرسة
> البواب قال ليهو والله تدخل في عيني دي ما تدخل المستشفى
> واشر لي عينو الما كاجيها
> الزول قال للبواب عينك دي مالها
> واشر على عين البواب الكاجيها
> البواب قال ليهو خلاص قنعت !!!!
> قال ليك مره في باب مستشفى
> جا مهندس طلع بطاقتو للبواب
> البواب عاين ليها كده ورجعها ليهو
> المهندس قل للبواب افتح
> البواب قال ليهو ما عندك اذن دخول
> المهندس قال ليهو انا وريتك بطاقتي اسي انا مهندس
> البواب قال ليهو عندكم سيخة راقدة جوه ولا شوال اسمنت مورود ؟
> مهندس هناك في الموقع ما عندنا هنا
> دخول ممنوع
> يقوم المهندس يطلع ليهو بطاقة تانية
> إن شاء الله بطاقة صراف آلي
> البواب يقول ليهو ايواااااااا
> كده ممكن تدخل
> طبعا لانو السيد البواب ما فهم دي بطاقة شنو
> عشان يطلع من الحرج عمل فيها فاهم وفتح الباب
> بواب الحيرة
> طبعاً اسي حكاية البواب اتطورت
> وبقت ازياء وشركات
> يوقفوهم ليك في الباب
> ككو ما يدخل
> كل البعرفوهوا ممنوع الدخول
> لو عندك مصلحة جوه تضيع
> ما بتفاهموا
> الشغل بس ممنوع
> طيب موش كان احسن يفكوا الباب ويطوبوهوا وكت اصلو ممنوع الدخول على طول !!!!
> البواب بقى مفتح
> واتحادنا لسه داقس
> زول يطلع ليك مستند يبين فيهو انو من ابيي
> ويديك مستند يوضح ويثبت فيهو انو سوداني
> وانت ترفض المستندين
> يطلع ليك جنسية كمجنس تقبلها ؟؟؟؟
> والله دي بواب الحيرة ما يعملا
> يعني الاتحاد لو رفض موضوع الجنسية ده تأسيساً على العلم العام
> كان جمعة طلع بطاقة الصراف
> وعشان الاتحاد يعمل انو فاهم حاجة
> كان قال لي جمعة ايوااااااااااا
> كده ممكن تسجل
> ايها الناس
> هل لدينا في قوانيننا ما ينص على الحرمان من جنسيتنا وعدم منحها تاني للزول الذي اتنازل عنها بارادته ؟؟؟
> وهل تنازل الاخوة الجنوبيين عن جنسيتنا بمحض ارادتهم بالتصويت من طرف واحد الذي اختاروا من خلاله الانفصال؟؟؟
> وهل يستحق جمعة بعد كل ذلك ان نمنحه جنسيتنا كمجنس ؟؟؟؟؟
> الاجابة على هذه الاسئلة التلاتة بتورينا الى اين تذهب هذه الدولة
> ايها الناس
> سمعتوا بي جنينة وغفيرها نايم ؟؟؟؟؟؟
> ايها الناس
> والله العظيم تلاتة
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> جامع امدرمان العتيق
> قال عيييييييييييييييييك
> ضل الطريق
> فقد الصديق
> ضاق الضيق
> لا مروحة تهبهب علينا
> لا مكيف يرطب بينا
> لا نظافة تسر عينينا
> لا قيافة ترقى لمكانة المسجد فينا
> والغريبة لو شفت الحيطة يا والينا
> وايه الحاصل حولينا
> منو المسؤول منو يا والينا
> منو المفروض يقبل ويتقبل شكاوينا
> منو المفروض يحافظ على مساجدنا ويحفظ للناس دينا
سلك كهربا
ننساك كيف ولو سجدنا الا نقفل نخريننا ولو ركعنا نقرب نمرق الفينا.
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
دحين يا سلك انت مسجد أمدرمان دا بتمشيهو شحاد ؟ ما أظنك بتدخلو ……
ﻻ والله يا سلك .. يمين مستشفى مروي كان فيها بواب لو بقيت هواء ما تخش .. فى وليه لمن قنعت منو ومن الدخول قالت ليهو : حالفى وقاسمى اكان بقيت كلبى على اشيل لى منك جرو .