بابكر سلك
نزار حامد والشلف..
> كانت في طريقة لعب من الجانبين.
> كانت في محاولات انضباط تكتيكي من اللاعبين.
> وهذا شيء لم نعهده في ملاعبنا السودانية.
> فكانت بشارات تطوُّر في المستوى المحلي لكرتنا.
> إذا استصحبنا المستوى المتطوِّر للخرطوم الوطني والأهلي شندي وبقية فُرق الممتاز.
> وإذا استصحبنا تجربة الأشبال والاهتمام بالفرق الرديفة.
> وإذا صدق توقُّعنا باهتمام الدولة بالرياض.
> ومد يدها طويلة.
> ووضعها لإستراتيجيات العمل الرياضي.
> وتكفيرها عن إهمالها الفات.
> بنطمئن نوعاً ما على عودتنا لمصاف الدول الأفريقية الرائدة في مجال كرة القدم.
> ولكن بالرجوع للمستوى التحكيمي المتردي دوماً.
> نعود لنفقد الأمل من جديد في تطورنا.
> التحكيم إذا ما أدى لكل زول حقو.
> الكرة لن تتطور.
> ومجاملة الجماهير، هي في حد ذاتها إحباط لطموحات تلك الجماهير.
> لأن المجاملة المحلية تجعل اللاعب الذي تتم مجاملته يلعب محمياً من التحكيم.
> فيؤدي بحماية تحكيمية.
> أقل حاجه تنطلق الصافرة لصالحه.
> وعندما يأتي المعترك الأفريقي.
> يجد نفسه ذلك اللاعب نفسه غير قادر على اللعب تحت الضغط.
> فتتطاير فرقنا الواحد تلو الآخر.
> إيها الناس..
> إذا أردنا أن نصلح حالنا..
> يجب أن ينصلح حال حكامنا.
> ويعملوا بنزاهة وحيادية وخوف من الله.
> عشان نتطور ونتقدم.
> غير كده.
> سنبقى الى يوم يبعثون في هرجلتنا دي.
> المهم.
> مباراة الاستقلال وضَّحت مكامن الضعف والقوة في الفريقين.
> على الرغم من أن جماهير المريخ ما مقتنعة بالتعادل.
> والبعض يرى أن الموضوع متفق عليه.
> وفي ناس ولا بتناقشوا في الحتة دي.
> إلا أن المبارة وضَّحت السلبيات والإيجابيات.
> في المريخ مثلاً السلبيات في ختام الهجمة.
> فالفرص التي وجدها بكري وعنكبة، كانت كفيلة بخروج المريخ منتصراً بأهداف كثيرة.
> برغم أن بكري بذل مجهوداً كبيراً في الفرصتين الوجدهما.
> ختف الكورة براهو.
> وانطلق كالسهم.
> وانطلقت مع انطلاقته حناجر الشفوت.
> وانطلقت حناجر الأهلة.
> بعضهم يسأل الله أن تضيع الفرصة.
> وبعضهم يداعي في كردنة وفطومة وروشا.
> وبعضهم كضم.
> والبعض منهم عمل عمايل.
> قالوا السبب السكري.
> وسيد السكري في الزنقات طبعاً ما بنستر.
> اتسكروا شديد.
> جماعات وفرادى.
> والموت وسط الجماعة عرس.
> مافي زول لام التاني.
> مدرج كامل السكري دور فيهو.
> قالوا لي أسي المدرج لين.
> الله يجازيك يا بكور.
> فحيص إنت ؟؟؟؟
> المهم..
> المباراة أفادت الهلال أيضاً.
> وأوضحت مكامن الضعف فيهو.
> يعني ضعف الحراسة وضح شديد.
> زول يشوتو ليهو الكورة من الفيحاء بتاعة بنك فيصل.
> تدخل في الكبري الطاير بتاع جامعة السودان؟؟؟
> ضعف شديد..
> وأتير ومساوي ماناسا بنستروا أفريقياً ولا شنداوياً.
> أما وليد علاء وفيصل موسى.
> فالقوة البدنية بتخليهم يكونوا عالة على الهلال الأفريقي.
> بالذات إذا وضعنا في الاعتبار بعد التحكيم الهلالي أقصد السوداني. عن إدارة مباريات الهلال الأفريقية
> وحماده ما بتلقى طواااااااالي.
> حماده جلكسي.
> أما الهجوم.
> فكيبي يلعب على الواقف.
> وكاريكا مدتو انتهت.
> العمر الافتراضي انتهى.
> راس حربة يشلِّت من بداية الكورة.
> رونالينو انطرد.
> لكن انطرد في ظل تحكيم واعي. ونزيه ولا يخطئ لصالح جهة محددة.
> وجود كاريكا في المبارا. كان إما معتدياً على لاعب اعتداءً يستحق الطرد.
> وإما تسلَّل.
> الكورة كلها سارق.
> المهم..
> إسلام بتتفرج في الكورة وبتتونس معاي.
> لاحظت إنو كاريكا الكورة كلها سارق.
> قالت لي يابا.. كاريكا ده لما يعتزل حايبقى وزير.
> قلت ليها ليه؟
> قالت لي بسرق كتير.
> دي بت منو دي ؟؟؟؟
> البت دي ما تبعي.
> يابت الدنيا انتخابات.
> أسي الدخل كاريكا في التشكيل الوزاري شنو ؟؟؟
> المهم..
> عاد علولو لمستواهو المعروف.
> وده مكسب كبير.
> فعلولو وجابسون محاور زي المحاور.
> وده بدينا فرصة توظيف أيمن سعيد في المكان البنحتاج ليهو فيهو.
> أيها الناس.
> السنة الفاتت قلت ليكم لو طلعنا بي ستة لاعبين يعتمد عليهم.
> وسجلنا تلاتة في المستوى في التكميلية
> حايعود مريخنا الأفريقي بسرعة.
> وقد كان.
> طلعنا بي جمال سالم وأمير كمال وعلاء الدين وراجي ورمضان والشبل إبراهومة.
> وجبنا عليهم أوكرا وبكري وجابسون.
> وعندنا الباشا (لو ارتفع لمستوى المسؤولية) ومصعب عمر(لو اتعلم يمشي على الكورة لما تتلعب ليهو بدل يرجاها في محلو).
> وما ننسى الشبل بخيت خميس وحسن سفاري.
> ديل ممكن براحة يوصلونا المجموعات.
> عليهم تلاتة لاعبين من العيار التقيل في التكميلية.
> المطار جاك زول.
> أيها الناس..
> جميعنا يعلم بالعرض الذي قدمه الشلف الجزائري لنزار حامد.
> الجماعة ديل داخلين بي تقلهم.
> ومُصرِّين على نزار شديد.
> ضايقونا.
> داخلين معانا في درب ضيق.
> والحشاش يملي شبكتو.
> ولا أظن أن نزار بالبساطة التي تجعله يتعهد للهلال بإعادة القيد لفترة جديدة.
> نزار في السوق.
> ويجب ألا يستعجل في القرار.
> ده أكل عيش ومستقبل، ونزار يعلم ذلك جيداً.
> ومحمد كسلا ود خالة نزار عارف كده كويس.
> وأسرة نزار عارفة كده تمام.
> على نزار أن يفكر شديد.
> وأن يعمل على إنزال وزنه الزائد.
> لأن فرصة اللعب سواء بالمريخ أم الشلف.
> تحتاج منه لمجهود ليدخل التشكيلة
> سامعني يا نزار.
> وللعلم..
> علمنا إن الشلف اتصل بخصوص نزار بكردنة.
> وكردن. قالوا قال ليهم.
> بفاوضكم في الهلال كلو إلا نزار.
> قالوا قالوا ليهو كلها باقي ستة شهور وما بنحتاج لمفاوضتك يا كردنة.
> دايرين يجيبوهوا علً طريقة رمضان من الموردة للمريخ.
> أيها الناس.
> مدرب الهلال ما شاطر.
> لأنو لو شاطر كان بدأ بي الشغيل ونلسون محاور.
> ونزار في صناعة اللعب.
> لكن فاتت على اللمبي.
> والبعض يقول بأنه نجح في شوط المدربين.
> كيف يكون ذلك والمريخ أضاع تلاتة أهداف مضمونة في شوط المدربين.
> وهدف الهلال كان صدفة
> كورة قالشة من نزار جات للماسورة.
> أيها الناس.
> بكري المدينة ذكرني أبو طيرة
> جاري على الناس.
> والناس جاريين منو.
> أيها الناس..
> إن تنصروا الله ينصركم.
> آها
> نجي لي شمارات والي الخرتوم.
> كان شفت يا والينا.
> العيب مافي الحكومة براها يا والينا.
> العيب برضو فينا.
> نحن شعب بستغل الظروف البتحصل لينا.
> الغاز يدخل في أزمة نأزِّموا برانا تاني يا والينا.
> ندسوا عشان نبيعوا سوق أسود لي بعضينا.
> بتاع الحافلة يكون مرخص أبو سعد يشحن المينا.
> يستغل الوقفة الطالت علينا.
> وأكيد التعرفة بدبلها علينا.
> نعلي أسعار السخانات لما الشتا يجينا.
> نزيد سعر المكيف لما الصيف يهرينا.
> والينا..
> محتاجين زول من جديد يربينا.
> عشان الواحد فينا.
> لما يبقى مسؤول علينا.
> أو تاجر أو محتكر دقيق الفينا.
> يخاف علينا.
> ويخاف الله فينا.
سلك كهربا..
ننساك كيف وكلنا بنستغل بعض ومافي زول هامينا.
والي لقاء..
سلك[/JUSTIFY]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
انتو يا سلك يكافي البلاء وقادر المريخ دة مايصنع ليه لعيبة براه