ناس البحر مالهم؟!!

[JUSTIFY]> الأهلة لي أسي فرحانين بالتعادل.
> وليهم حق.
> وقالوا خرجوا بمكاسب كتيرة.
> منها.
> إنو الهلال كسب كيبي وبوتاكو وماكسيم.
> وتغزَّل محمد عبدالماجد في التسجيلات الهلالية الجديدة.
> ورجع محمد عبدالماجد ليوصي المجلس بتنفيذ ما يشير به المدرب في التكميلية.
> قال دايرين لاعبين يحققوا الفارق.
> من وين نجاح تسجيلات.
> ومن وين كايسين لاعبين يحققوا الفارق
> فارقة معاكم ولاَّ شنو يا محمد؟؟؟
> التناقض ده بوري مدى فرحة الأهلة بالتعادل مع العالمي.
> يا أبو حميد.
> بطِّل هضربة.
> إنت قايل بكري جاري لي أسي ولاَّ شنو؟؟؟
> أيها الناس.
> جميع كُتَّاب الهلال يتفقون في عبارات محددة.
> الهلال كان كويس وأبدع.
> ويرجعوا ينتقدوا نزار ما كان في يومو، والشغيل بطيئ، وسلبية بشة، وتواضع كاريكا، وتوهان الطرف اليمين بتاعهم، وشرود أتير، وسلبية سيدي بيه.
> طبعاً ده غير الحارس الكاميروني سرحان عبدالبصير.
> بمناسبة الحارس سرحان عبدالبصير دي.
> طبعاً بعض الأهلة بقول إنو الحارس كويس لكن في قون علولو كان سارح.
> وفي ناس بقولوا إنو ما كان سارح لكن الشوتة باغتتو.
> وفي ناس بقولوا هي ما باغتتو.
> هو قام معاها لكن قام متأخر.
> قام متأخر ؟؟؟؟ سودانير يعني !!
> إنتوا وييييييييين الاسم ده؟؟؟؟
> أوع بس تكون هاجرت مع الطير.
> باقي الطير لاقي الجو ده يهاجر ساااااي زي ما داير.
> ما بقعد في بلداً ريق شجرها نشف.
> طوالي يطير فووووووق ويكشِّف.
> يشوف محل الخضار.
> البقعِّدوا شنو في الجهجهة دي.
> المهم..
> ناس قالوا قام لكن قام سودانير.
> متأخر. وفي ناس قالوا في أيادٍ خفية لفت الكورة من الحارس الكمروني.
> الكلام كتيييييييييييييير.
> هو البقولوه الناس شويه !!!!
> بتاع بحر قاااعد في الإستاد.
> لما جات لي جونسون وختاها في صدرو.
> صاحبنا كان فاتح خيال ويتبسم سااي.
> جونسون أداها لي علولو.
> دردقها ليهو.. أريتو ما دردقها.
> لما علولو أطلق الصاروخ.
> بتاع البحر نطه.
> وقال إنتوا الأمريكان ديل ما دايرين يبطلوا حركاتهم دي !!!!
> قدر ما قالوا ليهو دي شوتة.
> ما صدق أصلو.
> قال مالنا يعني ما بنعرف الفرق بين الشوتة والصاروخ!!!!
> هو نحنا كان بنشوت زي دي كان السودان لي أسي قاعد في أفريقيا دي.
> يا أخوانا ما تدقسوني.
> ده صاروخ.
> مناظر زي دي شفتها كتير في جمب كافوري وقريب جبرة.
> الشوتة بتولع أول؟؟؟
> تولع بنننننننننق. كبييييييرة أول ؟
> أسي الحكاية دي ولعت أول.
> حتى سمعنا ليك روووووووو.
> يا زول شوتة شنو؟؟؟؟
> أيها الناس.
> أعجبني إسلام كليتشي.
> نحمد الله على ذلك.. دعوناهو للإسلام.
> لا بالخطب الحماسية ولا بالتعبيرات الرنانة ولا بي (أحسب أن) وناس تحسب وناس تحتسب.
> شاف عاداتنا المستمدة أساساً من الإسلام.
> اللهم وفقه وفقهه واجعله من المقيمين للدين.
> وانصره اللهم بالذات الليلة.
> أنصره نصراً كان هبشها ساي تدخل قون.
> ووفقه اللهم لأداء العبادات وحفظ القرآن.
> وانصره اللهم شديد.
> الليلة بالذات أنصره اللهم لينعم برضاك عنه.
> ليتفاءل بالدين الذي اعتنقه يا أرحم الراحمين.
> وما النصر إلا من عند الله.
> المهم..
> بمناسبة إسلام كليتشي.
> عندنا صاحبنا بتاع بحر.
> بحر أحمر.
> إسمو وائل.
> سمع بدخول كليتشي للإسلام.
> قالوا ليهو كليتشي دخل الإسلام.
> قال ليهم بدل منو؟؟؟؟
> المهم..
> أكتب قبل لقاء الزعيم والرابطة
> أُمني النفس بسهرة كروية من أمها.
> فالزعيم يمضي للأمام.
> والرابطة ما هينة.
> وعلى الشفوت مسؤولية النقاط.
> أيها الناس.
> الليله نار المك نمر مولعة في شندي.
> برغم إنو ما بخصنا الما بجدع الكدوس في وشنا.
> إلا إننا.
> ما بنرضى الحقارة لغيرنا.
> طولتوا لسانكم يا روشا.
> وجدعتوا الكدوس على وجه سيدا الصبوح.
> الليلة للصباح.
> كان الحكم نهاها.
> الأقوان ما بتنتهي.
> وكمان كليتشي أسلم !!!!!
> اللهم أنصر المسلمين نصراً عزيزاً من عندك.
> أيها الناس..
> إتوقع بنهاية مباراة الهلال في شندي.
> يكون روليت الدوري قد أعلن أن أبو الهل الطيش في الأسبوع الأول.
> بدون نقاط.. وأكتر فريق دخلن فيهو أهداف.
> كليتشي..
> قول بسم الله وخلي الباقي على الله.
> أيها الناس
> في شركة أمريكية بتاعت قروض في الإمارات.
> إسمها أظنو (اتش تي سي).
> صاح الاسم ده يا فطومة ؟؟؟
> باقي إنتي كنتي في الإمارات قريب ده.
> الشركة دي قالوا عادي بتديك قرض عشرة ملايين دولار.
> واتقرضي.
> أدت زول كده.
> قامن صور المستندات شالن الهواء.
> وجابن عندنا.
> أتاريها الناس دي بالدين تسوي الزين !!!!!
> أيها الناس.
> إن تنصروا الله ينصركم.
> آها
> نجي لي شمارات والي الخرتوم.
> كان شفت يا والينا.
> نائب الرئيس أمس التقى بينا.
> الاقتصاد السوداني يتعافى بسرعه قال لينا.
> نططنا يا والينا.
> جد لينا جد لينا جد لينا.
> لو اتعافي تمام يا والينا.
> أمرقوهوا لينا.
> نشوفوا كي تقر عينينا.
> ليه خاتنوا في الانعاش والزيارة ممنوعة علينا.
> وكلو دقيقة يجينا زول ينظر إلينا.
> النبض كويس وانخفضت البولينا.
> الكلى ما محتاجه غسيل وممكن تقسم وتشتغل لينا.
> الكبد برغم إنو اتليَّف علينا.
> إلا إننا قدرنا نمرق الليفة بإيدينا.
> التنفس ما مشكلة لينا.
> الأوكسجين متوفر لدينا.
> والسكتة الدماغية عادية وممكن تمر بأي واحد فينا.
> الكانسر قدرنا نثبتوا قبل ينتشر في البيشن وفينا.
> القلب متضخم وورمان ونبضاتو حزينه.
> إلا إننا ممكن باللسعات الكهربية ندوروا من جديد فينا.
> لزوموا شنو التنظير ده كلو يا والينا؟؟؟
> الناس ديل كلمهم قول ليهم الشعب قال لينا.
> الاقتصاد ده لو ما شفناهوا ماشي بي رجلينوا في السوق وفي المستشفى وفي المدارس وفي المصانع وفي سعر الدولار.
> ما في زول يجينا ويقول لينا إتعافي يا والينا.
> المتعافي بنعرفوا والمامتعافي بنعرفوا يا والينا.
سلك كهربا
ننساك كيف واقتصادنا زي البتعالج بره البلد يدونا أخبارو وما شايفنوا!
والي لقاء
سلك[/JUSTIFY]