شوارعنا وجقورنا

[JUSTIFY]> الشوارعي زمان هو الشماسي بفهم اليوم
> وهذا دليل على ان الطريقة الشماسية هي طريقة راسخة وقديمة وخبرة
> وللشماسة بصمة ابداعية وثقافية واضحة
> فلن ننسى مسلسل أولاد الشوارع
> ولن ننسي رموز الشماسة المشهورين في كل المدن والمدائن والقرى بل في كل النواحي
> فالشماسة مثل الجقور
> يوجدون اينما توجد العضة
> وما مهم بعد داك ان تكون العضة من امها ام كرته
> فالعضة عندهم عضه ايا كان الطبق الذي تقدم عليه
> ووطن الشماسة هو الشارع
> والشارع له وضع ووقع في اغنياتنا
> لن ننسى اغنية البلابل نور بيتنا وشارع بيتنا
> ولا رائعة محجوب شريف التي تغني بها وردي الصغير.
> الشعب حبيبي وشرياني اداني بطاقة شخصية
> الاسم الكامل انسان والشعب الطيب والديا
> المهنة مناضل بتعلم تلميذ في مدرسة الشعب
> والمدرسه فاتحة علي الشارع
> والشارع فاتح في القلب
> والقلب مساكن شعبية
> وحتي اغنيات البنات وردت فيها سيرة الشوارع
> هناك اغنية تقول
> جيت مارة بي بيتو وقالوا الناس غشيتو الحب انا ما بديتو ومن تبيت لقيتو
> طبعا ماجات مارة بي بيتو بالواتساب
> اكيد جات مارة بالشارع
> وبما ان الشوارعي مشهور وصاحب بصمة لهذه الدرجة
> كان لا بد لمصدر تلك الشهرة ان يكون مشهوراً اكتر من الشوارعي
> الا وهو الشارع
> والشارع زمان كان اسمو الدرب
> زي درب الاربعين ذلك الطريق التجاري والشريان الذي ربط بين السودان ومصر قديماً
> واظن من حكاية الشريان الذي ربط مصر بالسودان
> جات تسمية شريان الشمال
> وشريان الغرب وشريان الشرق
> وكل الشرايين الكترت فينا والتي نضخ فيها من شرايينا
> ولعل ذلك الضخ هو ما نشف عروقنا ونزل هموقلوبينا
> وهناك درب الجمل الفاصل بين السلمانية غرب ومشروع الجموعية والبودي لي الدويم ومنها لكردفان
> وللامانة درب كان تمشي فيهو بكل طمأنينة
> تنوم فيهو ما بجيك شيء
> وان جاك شيء بكون يا اسد يا اسد
> عوجة مافي
> واسد زمان مهذب ومؤدب وما بياكل شيء ماحقو
> مازي جقور اليومين دي امات عينا طايرة
> بالله يأكلوا بدون خجلة
> كبري بالنهار يا فجرة!!!
> المهم
> الدروب كانت كتيرة بس ما شائكة
> نجي للشوارع
> من اشهر شوارع البلد دي
> شارع الاربعين بامدرمان
> ومع الزيادات الحاصلة بقي شارع الستين وحولوهوا الخرطوم
> بالرقم الجديد ده ناس امدرمان ما بنفع معاهم
> لانو البنفع معاهم من ناس امدرمان مشوا ليهو هناك وسكنوا جمبو
> وشارع الموردة
> وده ريحتو سمك سمك
> اما شارع الثورة بالنص
> حقو نسميهو شارع المعاملات المكتبية
> النص بالنص
> ايها الناس
> شارع الوالي بالحاج يوسف مشهور برضو
> ومن اسمو بتعرف حالتو
> بعد ناس الطرق عاسوهو بالقرقريبة عواسة حلو مر
> الجقور قرمتو ليك قريم عشوائي
> شيء بالطرف وشيء في النص
> لما بقت قريمات الجقور في شارع الوالي اوضح من بصمات الولاية ذاتها
> وهناك شارع القذافي بشرق النيل
> والشارع ده ارتبط بالنكتة الشهيرة البتقول
> القذافي تبرع بالشارع ودفع التكلفة كاملة
> كان مفروض يجي يحضر افتتاح الشارع
> ما استطاع كان مشغول بالبحث في الزنقات زنقه زنقه
> صوروا ليهو الشارع وفرجوهوا عليهو
> قال ليهم انا دفعت رايح جاي
> ده الرايح وين الجاي ؟؟؟
> الجاي ؟؟؟
> قرضنوا الجقور يا معمر يا اخوي
> انت وكت دفعت ما كنت عارف البلد دي فيها جقور؟؟
> مالك الجرذان ما بتعرفها !!!
> وما عملت حساب لجقور البلد دي ليه !!!!!
> تدفع ساي مواطن انت ؟؟؟؟
> الله يرحمو
> لكن موش مفروض نغير اسم الشارع من شارع القذافي لشارع كورنثيا؟!
> ولا اقول ليكم شئ !
> نخلي الشارع في اسمو شارع القذافي
> ونرجع الفندق لي اسم برج الفاتح
> كيتا على الليبيين وموقفهم الاخير مننا
> ايها الناس.
> من اشهر الشوارع في البلد دي
> شارع مساوي وشارع سيمبو وشارع بوتاكو
> ايها الناس
> شارع العرضة الشهير
> من الاحفاد والى مستشفي الوالدين
> الجقور شبعت منو
> كلو شهر صيانة
> والصيانة محمد معانا ما تغشانا
> والشهر البعدو تظهر صيانة جديدة في الميزانية الجديدة
> الجقور قرضوهوا قرض
> والغريبة قدر ما اكلوا ما شبعوا
> اما شارع النيل العريق
> فبقي شارعين نيل
> موش كان عندنا قصر وبقن قصرين ؟؟؟
> خلاص
> ما حدش احسن من حد
> كلو قصر بي شارع نيلو
> اللهم انعم على شوارعنا بالثبات امام هجمات الجقور يا رب العالمين
> اللهم وسرطن بقدرتك معدة اي جقر دخل فيها او يدخل او سيدخل زفتا من زفت الشارع يا رب العباد
> اللهم وكسر سنون الجقور ومعط «شنباتهم» صوفة صوفة يا رب العالمين
> لحقهم الزول القالوا في الصلاه
> والسلطان علي دينار اماما
> واحد قال كلام ما كويس
> قالوا السلطان همس قال ده منو القال الكلام ده ؟؟
> الزول قال ليهو انا أب شنب
> قالوا لما السلطان سلم
> الجامع كلو كان ممعط شنباتو
> اها
> معطت شنوبات زي دي يا رب العالمين
> اللهم ولو في جقر فكر في كبري لينا
> اللهم جلطه من النوع ابو كديس
> ايام الكديس كديس
> تنسيهو اسمو يا والينا
> قبل يقوم ينفذ ما فكر فيه علينا يا رب العالمين
> اللهم وانعم علينا بشوارع توفر الرعاية والحماية لشماستنا يا كريم
> اللهم والكباري الطائرة في تقاطعات شوارعنا
> ثبتها اللهم في قواعدها وقوها في اعمدتها وثبت ردمياتها وارفعها كي لا تقع علينا يا رب العالمين
> اللهم وباعد بينها وبين الجقور
> ما ظهر منها وما بطن
> لأنه إن دخلت يد الجقر فيها برميها علينا وبنموت يا رب العالمين
> ونحنا ما دايرين نموت قبل نحضر نهاية الفيلم ده يا كريم
> اها
> نجي لي شمارات والي الخرتوم
> كان شفت يا والينا
> الانتخابات جات والمويه ما جات علينا
> يبلعوها بي شنو الانتخابات دي يا والينا؟؟
> ريقنا نشفنوا الدمغات وكملن دمعات عينينا
> والينا
> وزارة الطرق والجقور شغاله لسه لينا !!!!
جقر كهربا
ننساك كيف والجقر في بلدنا وفي مدينتنا وفي حلتنا وفي شارعنا وفيييييييي بيتنا يا جحا
والي لقاء
سلك[/JUSTIFY]