اتنين بالسعودي بالسوداني كم !!!

[JUSTIFY]> الليلة يومنا إن شاء الله
> فرحة تبدأ عصراً
> وتستمر مغرباً
> لتكتمل ليلاً
> الليلة الكتمة
> عزام ليس بالفريق الذي نقارن به
> عزام ما بخوفنا
> تاريخنا وما نديلتنا
> بالنسبة لعزام زي ام بعلو
> عزام دولياً صفر
> برغم انو عمرو تمانية سنين ما تمنين سنة
> وبرغم كل ذلك
> لن نستهين بعزام
> نحترم انه منافس
> ونتمنى ان يكون منافساً شريفاً
> وحتي ولو كان غير ذلك
> فشفتنة اولادنا تستطيع ان تكبح جماح اللامعقول
> اليوم يوم المدينة
> حايلعب ياروشا
> وحايغلب لينا
> وتشوووووف
> الفرحة لازم تبدأ من العصر وتستمر حتي منتصف الليل
> ننوم فرحانين
> الله يدينا الفي مرادنا
> غارزيتو مبسوط بالاربعمائة وستين الف دولار الطالبها للهلال
> ولازم ينبسط اكتر بالكورة
> ايها الناس
> لايخيفنا عزام ولا خلافه
> قبل ما يولد عزام
> اتينا باول جوية من تنزانيا
> من فك سيمبا الكبير والصغير والشباب التنزاني
> يبقى عزام ليس بأفضل منهم
> وبرغم اعداده واستعداده
> لن يخيفنا
> لان الصومال مع احترامنا لها
> لو استعدت عسكرياً لن تهزم امريكا
> القصة ما نقة ساااي
> القصة امكانات ومهارات وخبرات وسيرة وتاريخ
> قابلنا عزام العام قبل شهور في سيكافا 2014
> ووقتها فريقنا جديد
> واعداده ما تمام
> اقصيناهوا
> بل نلنا البطولة كمان من اصحاب الارض
> ايها الناس
> لنا افضلية في المرمى
> وفي المحاور
> وفي صناعة اللعب
> وفي قلب الدفاع
> وفي بكري المدينة
> والليلة بكري كان جرى
> تنزانيا كلها تجري ورا
> لما يحصلها ويدخلها
> تنزانيا تكون يادوبك في الخلا
> هييييع
> بلح المدينة الاصلي
> ايها الشفوت
> الزعيم يحتاج لدعواتكم اليوم
> ما تقنطوا من رحمة الله
> وما تستعجلوا النصر
> النصر حليفنا
> بالايمان والاخلاص والعمل
> وببكري المدينة
> المهم
> اكتب قبل مباراة الخرطوم ضد الزامبي
> من قلبي اتمني فوز الخرطوم
> فالخرطوم خسر بالتعادل امام الهلال موقعة كان جدير بالفوز بها
> وتاني ما مفروض يخسر
> المهم
> الفرح الليلة من العصر للساعة اطناشر بالليل
> اها
> قالوا الحكام الارتريين وصلوا
> والمراقب الاثيوبي
> العبوها في الديم
> حيرتونا زاتو
> بركة البوتاكو ما لاعب
> كان مع اهلو ديل حنك
> ونسي الكورة
> ويقوموا ناس زنزبار ديل يجروا بي خانتو
> بركة المالاعب وما حنك
> ايها الناس
> المغتربين بتاعين البوبار
> قالوا الواحد منهم يجي البلد دي
> ويقشر علي الناس
> يجي شايل ليك موبايل
> يقول ليك بتاعي ده بي سبعمائة درهم
> يعني بالسوداني زي كم كده وكسر
> كان لبست ليك جلابية
> يقول ليك المقطع ده عندنا بي مية درهم
> بالسوداني كم ماعارفو
> كان جيت شايل ليك تمباك
> يقول ليك عندنا الاصلي الكيس بي درهم
> آها
> قالوا ليك واحد من ديل
> الضهر أذَّن
> قال للناس الضهر عندنا اربعة ركعات عندكم كم؟؟؟
> آها
> خسرالهلال السعودي اتنين
> اتنين سعودي بالسوداني يعني كم يا مغتربيننا؟؟؟
> خبر بي بي قروش بكرة بي بلاش
> وكان ابيتوا تورورنا اتنين بالسعودي بتساوي كم بالسوداني
> برانا بنعرفها الليلة الساعة عشرة الا ربع
> المهم
> دعوات الشفوت لمريخ الصمود
> ومريخ الصمود حايفرح الشفوت
> كلامي ده بتعرفوهوا لما بكري يجري ويشووووووت
> براح يا بكري
> جريتك الزي السهم دي
> يوم كورة الهلال شققت علينا الشاشات
> براحة الشاشة دي جديدة يا مدينة
> المهم
> الليلة قالوا الجن الازرق زعلان شديد
> قال كييييف يقولوا تدهور المستوى ده مني ومن رتينزاتي
> وقال يعني عملتوها فيني زي ما عملوها الجماعة في الجقر
> كان الجقر سكت انا ما بسكت
> واللييييلة يا حسن محجوب
> الجن الازرق زعلان شديييد
> المهم
> اللهم انصر السودان وافرح السودانيين
> فرحتنا الوحيدة بقت في الكورة
> اللهم وفق كورتنا واجعلها منصورة
> ايها الناس
> «ان تنصروا الله ينصركم»
> وحياة اولادي
> آها
> نجي لي شمارات والي الخرتوم
> كان شفت يا والينا
> المدارس بدت تضغط فينا
> دايرين باقي الرسوم والترحيل وما شغالين بالحال الفينا
> وانتوا خاوتننا بمجانية التعليم وفي الواقع مجاني مافي طلاب بقرا لينا
> والمعلمين يا والينا
> لي قطر والسعودية كاسحينا
> ولو استمرت الحالة دي علينا
> السنة الجاية بتلقى معلميننا في الصومال يا والينا
> وفي مدارسنا ما نلقى زول يقرينا
> اخير يا والينا
> اجروها مخازن خلوها تدعم المحليات بالسمينة
> ويجي ياكلها الجقر الاكل كبرينا
سلك كهربا
ننساك كيف والشعب نصو في المقابر والنص التاني في المطار داير يغادر والقلة لسه بتكابر!!
والي لقاء
سلك[/JUSTIFY]