إمرأة أعمال سودانية حسناء تبيع الفحم واليخوت ، واللوحات

قفزت سيرتها .. وصارت ذكراً على لسان العالمين .. بعد حكاية اليخت الرئاسي .. فمنى قاسم قبل ذلك كانت تتفرغ للرسم وإدارة شركة للنظافة ، محدودة الشهرة .. كلما كان اليخت يقترب من الخرطوم وهو يمتطي الطريق القومي من بورتسودان الي الخرطوم يسير في بطء شديد ، كان الحديث ينساب أكثر عن منى قاسم ،، إنبسط اليخت على سطح ماءه وصار يمخر في العباب وما سكت الحديث . صحيفة حكايات أجرت هذا الحوار السريع مع منى قاسم
** منى قاسم .. لنبدأ من عصر ما قبل اليخت ؟
منى .. بنت عادية لها أحلامها وطموحاتها في الحياة .. والدتي اسهمت كثيرا في التأثير على مكونات شخصيتي اسمها ( مسكة ) شوف الإسم دا جميل كيف ؟
– أمي كانت معلمة أجيال تنقلت في كثير من مدارس الخرطوم والاقاليم .. مدياني حريتي .. ما كنت زي الأطفال العاديين بتوبخ وانضرب .
** ميلادك كان وين ؟
– في بحري .. لكن من عمري خمسة سنين تنقلت بين جدة والقاهرة بحكم عمل والدي .. لكن صلتنا بالسودان متصلة
** الدراسة ؟
– درست هندسة ديكور في القاهرة وديكور بالممارسة من امريكا .
** الديكور .. بيأكل عيش ؟
– المسألة ما كده .. أنا بحب الرسم من بدري .. لذا إتجهت للديكور .. فالديكور علم وفن
** الحشرك في مسألة التجارة دي شنو ؟
– لمن كنته في ثالثة ثانوي بجدة .. عقدت أول صفقة في حياتي عبارة عن فحم
** كنتي بتبيعي فحم ؟
– أيوا بس بكميات تجارية .. والصفقة كانت مجزية شديد ، شجعتني على المداومة في التجارة .. وبفهم كويس في فحم المسكيت والسنط .. والفحم دا ما هو اول طاقة في الحياة عيبو لي ؟؟
** ما كدا … بس من فحم لي يخت ؟؟
– قبل اليخت حيث استقريت في السودان .. عملت شركة نظافة . . ولي حسي شغاله ، بعدين ناس بن لادن والشيخ صالح كامل بتاع ( ايه ار تي) رغم انهم اثرياء جدا .. عندهم شركات نظافة بقت علي أنا ..!!
** الشغل دا على السودان مش صعب ؟
– صعب كيف .. المرأة عندها قوة تحمل اكثر من كدا .. فهي تحمل في بطنها تسعة اشهر وعشرة ايام ما تقدر تشيل ليها مسؤولية شغل
** واليخت ؟
– صفقة إضافية لي إعلامياً أكثر من مادياً .. القريشات المرقت بيها ما قدر البقولوا .
** بقولوا شنو ؟؟
– أنها صفقة ملياردية .. واليخت غالي .. هم عرفوه غالي كيف .. في بخت أوناسيس سعره 37 مليون دولار ، قاسوهو بيهو ..
** جبتيهو من وين ؟
– دخلت في عطاء وفزت .. تلكفتو ما كتيره مبلغ معقول .. لكن طموحاتي اكبر من اليخت .. عندي شغل قريب حا تسمعوا بيهو .. روقوا بس
** الرسم ؟
– هواية منذ طفولتي .. فزت بجوائز كثيرة بمصر على مستوى الجمهورية
** أغلي لوحة بعتيها ؟
– ما بوريك .. لاني ما ببيع بطاطس