حوارات ولقاءات
جمال عبد الرحمن : كنت لاعب كورة فنان لكن ” باك القيامة ” طفشني
هل يسكن جمال في ملكه أم بالإيجار ؟ أسكن بالإيجار في مدينة النيل ، شوفت ليك تمثيل ببني ليهو بيت . هل مارست كرة القدم في صغرك ؟ كيف ، أخوك كان جناح طيارة عديييل كدا .
ما حاولت تلعب في نادي ؟ ألعب ، أنا قدرت أواصل من بدري خليت الكورة . خليت الكورة ليه ؟ مشيت مرة ألعب ” ماتش ” ولعبت جناح كالعادة وكان في باك شرس يلقب بـ ” باك القيامة ” ومرة جيت جاري بي كورة شالني من تحت وجابني الواطة ، ووقعت ودخلت في غيبوبة (20) دقيقة لا عارف نفسي في السما لا في الأرض وبعد قمت وفتحت إنتفضت ومشيت البيت ومن ديك ما لمست كورة في حياتي . نادي تشجعه ؟ أعشق الأزرق وأشجع الهلال من غير تعصب .
هل حدث وأن تابعت مباراة من داخل الإستاد ؟ أنا الكورة دي جوة الإستاد مابفهم فيها حاجة لكن بشجع كويس من منازلهم . ليه مابتفهم فيها حاجة ؟ لأنو فيها زحمة وأنا بكره الزحمة شديد . هل لديك علاقات في الوسط الرياضي ؟ نعم لدي علاقات عديدة مع النجوم وبصفة خاصة جدا عمر النقي واللاعب الفنان هيثم مصطفى . رأيك في البرير ؟ يعني زول شطب هيثم مصطفى حايكون رأيي فيهو شنو ؟ علاقة الأبناء بكرة القدم ؟ أبنائي يمارسون كرة القدم وبالمناسبة فيهم واحد لعاب شديد وممكن يلعب في القمة .
لو جا المريخ وقال عاوز يسجلو ، رأيك حايكون شنو ؟ والله شوف انسوا حكاية أنا هلالابي دي ، لو جمال الوالي دفع كويس ما في مشكلة . لو أصبحت رئيساً للهلال ماذا أنت فاعل ؟ شوف أنا ما ممكن أبقى رئيس لنادي الهلال ، الحكاية دي دايرة قروش كتيرة وأنا زول مفلس .
أول قرار ستتخذه لو أصبحت رئيساً لنادي الهلال ؟ سأقوم بشطب عدد من اللاعبين .
مقلب كبير شربته ؟ بيع عربة جميلة بسعر رخيص في واحد مفتح عرف كيف يمقلبني . أمنية لم تتحقق ؟ تمنيت أن أكون كابتن طيران . هل توقعت أن تصبح ممثلاً ؟ على الرغم من أن التمثيل كان يجري في دمي منذ الصغر لكني لم أتوقع أن أصبح ممثلاً . فنان تمنحه إذنك بسخاء ؟ العملاق محمد ميرغني متعه الله بالصحة والعافية . فنانة ؟ الصوت الجميل حنان بلوبلو .
وجبة مفضلة ؟ البلدي . كلمة أخيرة ؟ شكرا ليكم كتييير ياناس ( اليوم التالي ) .
صحيفة اليوم التالي
ت.إ
سلام عليكم
نرجو من الأخ جمال أن بنضم إلى مسرح قناة الشروق عشان تشرق عديل وللا تغيب عديل…