منوعات
صلاح أحمد عبد الله : نعاين نحن للتاريخ وما عارفين.. وحاتكم إنتو ماشين وين..؟
أحب النيل
أحب ناساً (تجقلب) فوق ظهور الخيل
تشيل الخوف
تمسح دمعة الملهوف
من الولد.. الوجيهو حزين
نعاين نحن للتاريخ
وما عارفين.. وحاتكم إنتو
ماشين وين..؟
…..
( ۲)
نعاين في قطار الهم
يسوقو رجال
ملوهو سجم
نشفوا حتى موية النيل
لا شجر يضل الناس
ولا يرتاحو تحتو مقيل
……
( ۳)
منو القال يوم
تعال يا وليدي سد الدين
برانا بنمشي في الشارع
نقيف كم يوم
ونرقد في التراب.. كم يوم
وما بنخاف من الساساقا
ولا بنخاف نعيق البوم
وحاتكم إنتو ما بنخاف
ولا في يوم نشيل الهم
من الوسخ.. الملأ الخرتوم
…..
( ٤)
منو اليحرمنا موية النيل
منو اليقدر يداري الشمس باليدين
منو البمنع ولادنا
ينططوا في المطر .. والطين
وحاتكم إنتو يا أولاد
بيجي اليوم
ونعرف نحن ماشين وين
ودايرين مين..
….
( ٥)
يا الخرتوم
حليلك إنتي يا الخرتوم
حليل زمن النضارة الزين
زمن ناساً حنان حلوين
زمن ضحكة بتجلجل شاقة نص الليل
وما خايفين.. وديمة علينا فرحانين
وكل الناس
بتستنى العديل والزين
ودرب الشمس عارفنو
نشقو عديل
وما خايفين زماناً شين
….
( ٦)
يا الخرتوم
حليل الحق
تعرفي زمانو.. روح وين؟
نفتش ليهو
في وسط الخبوب.. والطين
نساكك في كلاب الحر
شمال ويمين
لا بنخاف من (الجلاد)
ولا ناس الزمان الشين
….
( ۷)
عشان كده
نحن يا الخرتوم
نحب النيل
ونحب ناساً تجقلب فوق ظهور الخيل
صحيفة الجريدة
ع.ش
شعرك باااااااايخ .. وكلامك ثقيييييييل
يا حليل الشعب السودانى دا ممثلوا عامل وبدافع عنو اوافق الاخ الذى علق شعر بايخ ودمو بارد ياخى شوف حاجة تانية اكتب فيها سلة طائرة ولا اقول ليك بطل تكتب قرفتنا