رأي ومقالات
حاتم أرباب : حبوبة والخضر ..!
ـ يمه: اخوي ما جي هسع ،من الخرطوم! ارجع تاني في شنو؟
ـ ارجع اشوف ليهو شغل زي الناس!
ـ يمه: اخوي ماشغال نحمدالله!
ـ يا بت: شغل اخوك دا شغل!
ـ ماهيتو دي يا بتي، ياداب حق مواصلاتو، وحق جريتو البجي داخل بيها البيت كل مره، لا كيس موز لا كيس برتكان، وحبوب ضغطي ديل اظنو اسبوع ما بفطر عشان اجيبن لي عشاي. اخوك موظف ليهو خمستاشر سنه وما قادر يلم ليهو حق عرس.
ـ يمه: اخوي دا براهو المابي العرس! اكان داير يعرس بالفاتحه بلقي عروس، وبي بيتا كمان، انا هسع يمه: كان جاني عريس بتابو لي بالغرفه القداميه دي؟
ـ والله يا بتي: اريتو يجي.. بنديك ليها تب ونسوي ليك معاها ميزره وحمام، ودولابي دا بي “عدتو” دي بديك ليهو يابتي: الله يرحم جدك، كان مستتني ومدلعني، يا حليلو ويا حليل زمنو.. امشي يابتي: صحي اخوك دا، كان الله افتحا عليهو وعلينا.
ـ يمه: شغل شنو دا، الفي الخرطوم؟
ـ يابتي: انتي ما سمعتي الخضر قال الداير شغل يجيني؟ ناس الحله كلهم مشو، صغير علي كبير.. اخوك الصغير دا هسع جي من صلاة الضهر قال لي زول في الجامع مافي لا امام ولا مامون.
ـ اها ..اها يمه: ان اقول سيد اللبن دا مالو الليله اتاخر لحدي هسع!
ـ أكيد يا بتي مشي الخرطوم! وانا ذاتي يا بتي كان ما الرطوبه دي كنت مشيت! قومي صحي اخوك؛ اكان الله يفتحي عليهو ويديهو المليارات ويركبو الفارهات، ويسكنو كافوري، ويبني العمارات، ويركب الفارهات،و يعرس ليهو بنات الزوات.
ـ يا امي دا الخضر ما نبي الله الخضر! وبعدين الخضر اشغل اخوي شنو؟
ـ ان شاءالله حرامي، انتي مالك يابت؟
ـ كيفن يامي.. نأكل الحرام؟
ـ يا بت، قالو ليك أخوك ما بعرف اتحلل؟ يمين نشوف ليهو اجدع شيخ…
النيلين – حاتم أرباب
[/JUSTIFY]
ياايها الذين امنوا يسخر قوم من قوم عسى ان يكونوا خيرا منهم …الاية
الله يجازيك يا حاتم أرباب لي زمن ما ضحكت بعدين يا اخ عز الدين انت زعلان مالك ومن قال لك انها سخرية انت قد تراه سخرية مع العلم كل الذي في المقال حاصل وبالادلة الا ان تكون معاهم وتلك هي المصيبة
[COLOR=#FF0000][COLOR=undefined][B][SIZE=5][FONT=Arial]القصة حلوه يا حاتم
ما دام بتدوا اختكم العوضة القدامية انا جاييكم تب ههههههههههه
ربنا يصلح الحال وللقصة مغزي يا عيز الدين
[/FONT][/SIZE][/B][/COLOR][/COLOR]