الفنانة ندى القلعة تخرج عن صمتها وتفتح قلبها في حوار من نار+ صورة

الفضائية لاسباب كثيرة
‭{‬ممكن نعرف الاسباب التي منعتك من الظهور مؤخرا وكما اسلفتي بان هذا الاختفاء باختيارك ؟
اولا المؤسف حقا وجعلني اختفي من هذه القنوات هنالك بعض القنوات الفضائية تقوم بتسجيل بعض الاغاني التي اقوم بادائها من خلال الحفلات التي دائما اقوم بالمشاركة فيها واتفاجا وعن طريق الصدفة ببث هذه الاغنيات والاعمال بهذه القنوات وانا لا اعلم بهذا وانا اقول أي قناة تقوم بتسجيل حلقة مع فنان من المفترض ان ترجع له وارفض هذا النوع من الاستدراج والقناة البتجيني بالدرب العديل حبابه عشرة واقوم بالتسجيل ولكن مثل هذه الاساليب ارفضها رفضا باتا .
‭{‬بكل صراحة استاذة ندى هل انت راضية عن مسيرتك الفنية وعن أي عمل قمت بتقديمه ؟
الحمد لله انا راضية كل الرضا عن مسيرتي الفنية وراضية عن أي عمل قمت بادائه ودائما اقوم باختيار اعمالي بعناية فائقة ولا اجامل في اختيار اعمالي والعمل الذي اجد فيه نفسي اقدم عليه بدون تردد وكما اسلفت في بداية حديثي راضية عما قدمته في مسيرتي الفنية.
‭{‬ما هي اكثر الاشياء التي تضايق الاستاذة ندى القلعه ؟
هنالك الكثير من الاشياء التي تسبب الضيق ومنها التدخل في خصوصياتي وانا كفنانة ما عندي مانع انو الناس تتكلم عن فني وغناي ومسيرتي الفنية ولكن التدخل في حياتي وبيتي هو من حق اسرتي وهو خط احمر ارفض التدخل فيه اتزوج اطلق ما شغلة زول دي حاجة من حقي ويا ريت الناس تخليني في حالي وانا ما شغالة باي حاجة غير فني والرسالة الفنية التي اقدمها لجمهوري واي خصوصيات حقتي وما من حق أي شخص يتدخل فيها ان شاء الله يقولوا ما بعرف اغني ده من حقهم مافي مشكلة.
‭{‬في الفترة الاخيرة ندي القلعة اصبحت ما عندها ضجه زي زمان وهنالك فنانات سحبن البساط من تحت اقدامك وهذا يعود لاسباب كثيره كما يقولون بان ابتعاد مدير اعمالك الاستاذ ايمن عفيفي هو سبب مباشر في عدم انتشارك كما كان عليه في السابق.. فماذا تقولين بكل صراحة ؟
ابتسمت قائلة: الناس ديل مساكين ما عارفين حاجة وما متابعين ندى وهنالك فنانين اساتذة بالنسبة لي عايزين يديرو اعمالهم بانفسهم وزمان ما كان لهؤلاء الفنانين مدراء اعمال وكانو يقومون بادارة اعمالهم بانفسهم ودائما مدير الاعمال ما بكون قبل الفنان والواحد يبقى فنان اول وبعدين يجيب ليهو مدير اعمال وندى القلعة هي ندى القلعة مافي شي بغيرها
‭{‬كثيرة الخلافات مع الفنانات ماذا تقولين؟
انا ما عندي خلاف مع أي فنانه واي فنانه الاقيها يكون بيني وبينها الاحترام
‭{‬في الفترة الاخيرة نلاحظ بان ندى القلعة ظهرت بشكل جديد وتريد محاكات الفنانة ام كلثوم من خلال ظهورك الاخير ماذا تقولين ؟
هذا مجرد تشبيه للذين يقولون والفنانة ام كلثوم لحد الان مافي زول وصل مكانته وانا زولة فنانة شعبية وفنانه حماسية واقوم باعمال السيره والاهتمام بعاداتنا وتقاليدنا وارتباطي الفني بالسودان اكثر من العالم وانا لا افكر بتقليد فنانة او تقمص شخصيتها .
‭{‬الشائعات تطارد الفنانة ندى القلعة الى ماذا تعزي ذلك ؟
ديل الحاسدين يقوموا بترويج الشائعات وهنالك بعض الاحاديث التي يتم تداولها عبر اجهزة التواصل الاجتماعي ويتم ترويجها باسمي وهنالك مواقع يتم فتحها باسمي من اجل التواصل عبر الفيس بوك وغيره وانا اقول أي كلام يتكتب في الفيس بوك ما حقي انا اتمنى عندما يتم نشر خبر عبر هذه المواقع يتم الرجوع لي قبل تداول الخبر وانتشاره من اجل معرفة الحقيقة والناس بقت ما عندها شغلة غير ندى القلعة اتزوجت وندى القلعة طلقوها حقيقه انا زوجوني وطلقوني اربعين مرة وانا عايزة الناس تتكلم في مسيرتي تعرفني فيها عن الخطا والصاح.
‭{‬كما اسلفتي استاذة ندى في حديثك بان مروجي الاشاعات قالوا ان ندى تزوجت او عايزة تتزوج او حتى طلقوها لماذا لم تدافعي عن نفسك وانت ساكتة والناس طوالي بتتكلم عن زواجك بتقولي شنو ؟
انا اولا ارفض أي شخص يتدخل في خصوصياتي وانا كان اتزوجت او حتى اطلقت دي ما شغلة زول والناس ديل مالهم شغالين بي شديد وحياتي الخاصة هي ملك لي ولاسرتي ما من حق أي زول يتدخل فيها وانا الان متفرغة لاسرتي والاهتمام بابنائي ورعايتهم وبقول لاي شخص يتكلم في مسيرتي وفني ويقدم لي النقد باي شكل من اشكاله ماعندي مشكلة واقبل أي شي في مسيرتي الفنية ولكن احذر عبر الدار ومن خلال هذا الحوار أي شخص يتجرأ ويتدخل في أي حاجة من خصوصياتي يكون الفيصل بيني وبينه هو القانون واكرر واقول سوف الجا للقانون مجرد تدخل شخص في خصوصياتي مرة اخرى
‭{‬لو لم تكوني فنانة ماذا كنتي تتمنى ان تكوني؟
اكون ندى محمد عثمان فقط.
‭{‬الظاهر عندك كلام في راسك عايزة تقوليه والمساحة عندك بتقولي شنو؟
حسادي ربنا يهديهم وعندما يتم ترويج اشياء ما عندي دخل فيها احمد فيها ربي وحسادي لو الف ادعو ربنا يبقوا الفين وانا كنت في اجازة خارج البلاد فترة رمضان وفترة العيد كنت في الخارج .
‭{‬ماذا تقولين لجمهورك ؟
جمهوري العزيز ليك تعظيم سلام ولك كل الاحترام.
‭{‬ما هو جديد الفنانة ندى القلعة؟ 
هنالك مجموعة من الاغاني التي اقوم بعمل البروفات لها هذه الايام من كلمات الشاعر اسحق الحلنقي وهيثم عباس وعبدو منصور وبعض من هذه الاغنيات تتحدث عن غلاء المهور والعطور الغالية ونلاحظ بان الكثير من الاسر تفضل زواج ابنتها بطريقة عشوائية ومجرد ما جاهم زول عندو قروش يوافقوا طوالي وولد الاسرة البسيط والعايش بالحلال يرفضوه.
‭{‬قالو ندي القلعة ارتدت الحجاب والصور منتشرة عبر وسائط التواصل الاجتماعي الكلام ده حقيقة؟
ما أي زول لبس طرحة ولبس طويل معناها اتحجب والناس انا ما بعرفوني .. انا كل جمعة اقوم بقراءة المصحف والناس دائما تتطرق للاشياء السيئة وينسو للانسان الاشياء الجميلة
‭{‬الناس البتجيب القوالات لندى القلعة كيف بتتعامل معاهم
أي زول يجي شايل لي قوالة طوالي بمشي معاهو للزول الجاب لي منو الكلام عشان كده الناس عاملة حسابا مني ما قاعدة تجيب لي أي قوالة
‭{‬ندى القلعة ممكن نقول محسودة من صديقاتها؟
كانت اجابتها سريعه جدا انا عندي صديقه وااحده ما عندي غيره
‭{‬ندى القلعة زعلانة من الدار الكلام ده حقيقة ؟
تحدثت قائلة انا ما زعلانة من صحيفة الدار وما عندي مشكلة معاها عشان اكون زعلانة
‭{‬كيف تتعاملين مع النقد؟
اتقبل النقد بكل رحابة صدر وافرد له مساحه في دواخلي والنقد الذي يكون من اجل اغراض شخصيه لا اهتم به
‭{‬هاهي مشارف الختام استاذه ندى ماذا انت قائله ؟
التحيه لجمهوري وايضا التحية لاهلي بالشمالية والشكر الخاص لصحيفة الدار .

صحيفة الدار
خ.ي[/JUSTIFY]