زغاريد الفرح تعم اسرة الشاب خالد محمد بعد غياب دام 17 عاماً
بعد غياب دام 17 عاما منذ عام 1998 ظلت اسرة الشاب خالد محمد حبيب الله تبحث عن ابنهم المفقود الذي غادر منزل اسرته بمنطقة الفاو القرية 31 في طريقه للجماهيرية الليبية والسنوات تمضي وحنين وشوق الوالدين يزداد يوميا لرؤية ابنهم بعدما انقطعت اخباره . وظلت اسرته تسال عنه عسي ان يجدوا طرف خيط يدلهم علي ابنهم المفقود ولكن هيهات وظلت اسرته الصابرة تترقب في اي لحظة وصول خبر سار عن ابنهم ووسط نيران الجمر وصورة ابنهم الغائب لا تفارقهم ابدا لحسن خلقه وتعامله الراقي مع كل الاهالي بالقرية 3 الفاو وقد كانت اسرته ترفع الاكف يوميا للمولى عز وجل ان يجمعهم بفلذة كبدهم المختفي وبحمد الله وتوفيقه استجاب المولي عز وجل لدعوتهم حيث تم العثور علي الشاب خالد محمد حبيب الله بعد غياب دام 17 عاما ..تم العثور عليه داخل ولاية الخرطوم في اتم الصحة والعافية وهو يقود ركشة بعد ان تعرف عليه احد ابناء المنطقة فعمت الفرحة اسرته الكبيرة بقرية الفاو 31 وبالفعل تحرك الشاب المختفي صوب اسرته بقرية الفاو وذرفت الدموع فرحا بقدومه بعد اختفاء دام طويلا ونحرت اسرته الذبائح وتم توزيع الحلوي لجميع الاهالي الذين اتوا من كل صوب لحظة سماعهم الخبر السعيد بعودة الشاب خالد لحضن اسرته معافي وبكامل صحته.
الدار: ود المسلمية
حمد لله علي السلامه ….لكن الموضوع ما واضح الزول ده مش كان في ليبيا الجاب الركشه شنو ؟
دي رول خايب قاعدًفي الخرطوم وفاتح نفسه
كلها ساعتين يمش يشوف أهلوا ويرجع.
لكن نقول شنو قلب الوالد
اوعي يكون قاعد الوقت ده كله (17 سنه) في الخرطوم.
قول قاعد 3 يوم مو اعوج منو
قال رسول الله صلى الله عليه وسلم من حسن اسلام المرء تركه ما لا يعنيه. نقول الحمد لله على عودته لاهله اما سبب غيابه فهو شأن يخصه هو
ده شنو الخبر العوير ده هههههه
خبر عوير فعلا يا محمد أحمد… لكنك لن تندهش عندما تعرف أن مصدره صحيفة الدار الغراء!
يمكن ياجماعة رجع من ليبيا يد ورا ويد قدام وخطواته أبت تمشي الناس حرينو هناك وفي يدو مافي شئ قال أحسن يسوق ليهو ركشته دي والله كريم عموماً حمدالله ع السلامة
الحمد لله اهله لموا فيه. هو لا عذر له
كلام واضح .. زول أهله فاكرنو في ليبيا .. لقوه في الخرطوم (أنت أمس متقّل و لا ّ شنو ؟؟)
معليش يا جعفر .. wrong number !!
دي يفهموها كيف
كلام واضح .. زول أهله فاكرنو في ليبيا .. لقوه في الخرطوم (أنت أمس متقّل و لا ّ شنو ؟؟)
الود ده شكلوا قاعد المدة دي كلها في الخرطوم وعامل نايم
هو ياتو اليمين وله الشمال الصورة
وإن كنت أعتقد الشمال الصورة لأنه ظاهر عليه شفت
مغمد عينو بطريقة العفاريت بركة الرجع بس
اعتقد ان الصورتين هى لنفس الشخص المذكور ولكن 17 سنة ليس بالقليلة على تغيير ملاح اى إنسان,
الصورة على اليمين قد تعود للعام 98 اما الصورة على اليسار هى صورته فى الوقت الحالى.
عموما حمدا لله على عودته سالما وبعافيته لأهله وكم تتصورون فرحة أهله به حتى ولو عاد إليهم صفر اليدين لان هنالك من علق وقال (يمكن انه رجع لأهلهيد قدام ويد ورا) فهنالك أمهات وآباء ماتوا كمدا وهم يمنون نفسهم ولو ساعة واحدة ان يروا او يأتيهم خبر سار عن شخص غاب عنهم طويلا من غير اسباب.
خجلان
في الخرطوم 17 سنه….والله فعﻻ مغترب. بس احسن حاجه ناس ديوان المغتربيين ماعندهم معاك شغله
……بالمناسبه الخرطوم ياناس والله بقت اغتراب. انا
انا كل ما ارجع السودان لي حلتنا اقابل اشكال جديده
واول سؤال الاخ جديد هنا…..اول مره نشوفك مع العلم
انو الحله كلها اهل……علي العموم حمدا لله علي السلامه ونسال الله ان يرد غربتنا من خارج السودان وفي داخل الحله….وسﻻم
للأسف الشديد هذا واحد من عدد كبير من الشباب الذين خرجوا من ديارهم طلبا للقمة العيش و بدلا من العودة الى والديهم يظل الواحد منهم غائبا بالسنين لا يفكر في عمق الجرح الذي يسببه لوالدته و لا انفطار قلب والده و معظمهم في العراق و في ليبيا ،،،، امثال هؤلاء الفاشلين لا يستحقون ان تذبح لهم دجاجة ،،، ليس فاشلين في جمع النقود و لكن فاشلين في امتحان بر الوالدين الذي من اجله رد مجاهد في سبيل الله ليخدم والديه ،،، و الله لدي احد اقربائي ظل مغتربا 27 سنة ما بين العراق و سوريا و لو لا الحرب في سوريا لما رجع للبلد و الان هائم على وجهه بعد ان توفى والديه ما فائدة رجوعه بعد هذه السنين الطويلة ،،،،،
يا ناس مافي داعي لسوء الظن بالولد .. الظروف ما معروفة …