بالصورة.. (سيلفي) شيخ الأمين وحيرانه يشعل مواقع التواصل الاجتماعي ويتصدر قائمة الصور الأكثر رواجاً في العيد

شباب حلوين .. خلونا ناخد الموضوع بالمنطق .. افرض مثلاً مثلاً يعني إنو الأمين دة زول ولي وزول شيخ وما فيهو كلام .. أنا بستفيد منو شنو .. كويس لي نفسو .. ربنا عز وجل قال : (من عمل صالحاً فلنفسه) ..

أبوبكر الصديق رضي الله عنه اللي هو خير البشر بعد الأنبياء والرسل .. ما ورد بالجد ولا بالكضب إنو قال أنا ولي وأنا شيخ تعالو عندي ابقو حيران .. ولا قال أنا بشفي وبعالج وبطير وعندي كرامات .. ولا عمر ولا عثمان ولا علي رضي الله عنهم جميعاً .. والصحابة زاتهم مافي واحد مشى لي واحد فيهم قال ليهو اعمل لي كدة ولا سوي لي كدة .. مع إنو هم بالجد اولياء ونزل فيهم قرآن ومبشرين بالجنة .. لكن محل ما هم شالو قاعدين يشيلو .. القرآن والسنة.

بعدين ياخي شيخك دة في النهاية بشر .. يصيب ويخطئ .. والقلوب بين اصبعين من اصابع الرحمن يقلبها كيف يشاء .. وما معروف الزول يختم ليهو بشنو .. يعني لو شيخك ربنا ازاغ قلبو إنت بتمسك ماسورة جد وبتروح فيها ..

قول أنا مسلم وبس .. لا صوفي ولا انصار سنة ولا انصار المهدي ولا غيرو .. ما تتبع لي أي جماعة أو أي جهة ..عندك كتاب وسنة .. وعندك اربعة مذاهب .. والفيلم انتهى .. يوم القيامة كان ربنا سألك بتقول يارب اتبعت كتابك ونبيك ويكون عندك حجة .. مش تمشي تقول اتبعت الشيخ الفلاني ولا الجماعة الفلانية واضلوني .. زي ما قالو اهل النار : (وقالوا ربنا إنا أطعنا سادتنا وكبراءنا فأضلونا السبيل) .. والآية القبلها قالو : (يوم تقلب وجوههم في النار يقولون يا ليتنا أطعنا الله وأطعنا الرسول) اطعنا الله واطعنا الرسول وهم الكتاب والسنة .. وآسف على الإطالة 🙂