البشير : السفيرة البريطانية السابقة تدعم نداء السودان

اتهم رئيس الجمهورية المشير “عمر البشير” السفيرة البريطانية الأسبق بالخرطوم “روزاليند مارسدن” بدعم قوى تحالف السودان خلال اجتماعاتهم الأخيرة في العاصمة الفرنسية باريس، وقال الرئيس خلال مخاطبته مساء أمس (الأربعاء)، الحشد الجماهيري لافتتاح إستاد مدينة ربك بولاية النيل الأبيض.
السفيرة البريطانية عندما انتهت مهمتها بالخرطوم جات تودعني وتعطيني توجيهات وتعليمات، لكن صرفت ليها وندمتها على اليوم الذي ولدت فيه، السفيرة دي هي الجمعت في باريس ناس المعارضة وهي البتدي ناس باريس – تحالف قوى نداء السودان – التعليمات وتدعمهم.

وأشار الرئيس إلى أن السودان سبق له طرد السفير البريطاني مرتين من البلاد، مؤكداً بأنه لن يخذل أهل السودان في عزتهم وكرامتهم طالما هو رئيسهم.
وأضاف “البشير”: “نحن عملنا حواراً وطنياً وما في سبب تاني يخلي زول قاعد برا، قاعدين مع الخواجات يصرفوا عليهم بيركبوا طائرات من وين؟ وساكنين في الفنادق من وين؟ بياكلوا في مال الحرام والسحت وأهلهم تجاوزوهم.”

جدد الرئيس عدم سماح الدولة بممارسة النشاط السياسي في إطار التحالف مع الحركات المسلحة وقال:” عمل سياسي وعسكري مابتلموا، دايرين العمل العسكري ناس الجيش والأمن والشرطة والدعم السريع جاهزين لتأديب كل دخيل ومرتزق يأكل في أموال الخواجات.”
وأشار “البشير” إلى استمرار الحرب على الفساد، وقال الأكل مال زول وأكل مال الشعب السوداني بنطلعو من عيونو لأنو دي أمانة، سنرد كل أموال الشعب السوداني، الخان الأمانة ما بنخليه، أعلنا الحرب على الفساد والمفسدين والعندو معلومة يجي يورينا ويملكها للأجهزة.”

وأضاف الرئيس: “عصايتي البتكل عليها جماهير بحر أبيض، بحر أبيض جمعت كل أهل السودان فرحتونا بمشروعاتكم التي تتحدث عن تنمية حقيقية، والوالي “عبد الحميد كاشا” ما محتاج يقدم لي تقرير لأني تلقيت التقرير من الجماهير البتهتف وتطالب “بكاشا”، نحن عايزين نحسن معاش الناس وواجبنا ننفذ رغباتكم وطلباتكم ونوفر لكم العيش الكريم، نحن عايزين عدالة في كل شيء وسنوفر لكل الناس احتياجاتهم الضرورية، البلد حقت الناس كلها وأي مواطن عندو حق.

الخرطوم – طلال إسماعيل
صحيفة المجهر السياسي