رأي ومقالاتمدارات

لأول مرة في تاريخ السودان الحديث.. لا يوجد مشتري لجلود أضاحي 2020


#وزراءالسجم_قدواالكفر
دعوة لمحاكمة وزراء التجارة والصناعة والثروة الحيوانية وتاني منو …
اولا كالعادة اطالب كتيبة ال ٣٠٠ مفسبك و ال ٥٠٠ دولار واصحاب عبارات الخم المنتهية الصلاحية ان تنظر للبوست قبل النبذ المعتاد فالقضية استراتيجية.
تخيل ٣٠٠ جلد خروف شفع جمعوها واجروا تكتك بي الف ج لفوا الدنيا ما لقوا زول يشيلها ؛ فاترمت في الكوشة لانه لم يجدوا جهة تشتريها!
جمعنا ايضا في مسجدنا مئات الجلود ، ولم نجد من ياخذها حتى مجانا !
اقسم بالله اديناها لي شفاتة عربية النظافة ملح ساي قالوا نوديها وين ؟
شحتنا عيال الشارع قالوا مااام
اخيرا قررنا نملحها و نحفظها لانها نعمة مملوكة لبيت من بيوت الله !
تمنيت ان اشاهد رئيس الوزراء حمدوك يؤدي صلاة العيد في احد المصليات الكبرى كما درج كل الرؤساء !
لكن هل صلى الرجل الجمعة في كاودا !!
مسلمو السودان ٩٨% بالمناسبة !
تعود خطباء العيد في كل عام استنهاض الهمم لجمع جلود الاضاحي لحلحلة مشكلات المساجد وتجديد المكرفونات ووو
العامين السابقين يبدو ان قرن حكومة كبير لعب عليها وخلاها بي ١٠ ج فقط للجلد وهي تباع ب ١٥ دولار تخيلوا ٢٢٠٠ ج ، ،!
وهذا العام دمرت نهائيا وستستبب في مارثة بيئية ان لم يتم حرقها !!
معقولة يا حكومة #قحت_حمدوك؛
يا حكم المحاصصات ما قدرتو تعملوا استراتيجية لاستلام مليون جلد خروف على الاقل في ٤ ايام ممكن تدخل للبلد ١٠٠ مليون دولار فاكثر!
اين وعدك يا رأس الحكومة في منع تصدير الجلود الخام ال بعد معالجتها !
اااها فاجأكم الخريف اقصد عيد الضحية !
ولا عشان دي مناسبة دينية ولازم فصل الدين عن الدولة زي ما قلتو !
كنت متوقع لجان المقاومة يكون عندها دور تستفيد منها، لكن هل توجد جهة اصدرت توجيهات ام، بجد لو عارفين نوروني لانا نعتمد عليكم كثيرا يا لجان الثورة …
معقولة يا #حكومةقحت_حمدوك ما عندكم رؤية للاستفادة من اعظم ثروات السودان الثروة الحيوانية ؟
اذهبوا للبوار يا وزراء الخسارة والسجم، دمرتم السودان كما فعل من قبلكم .
حمدوك موظف خواجات بلا رؤية ولا قدرة تخطيط او تنفيذ لا يعرف عن السودان شيئا يذكر بعد غياب ثلاث عقود
#حكومةقحت_حمدوك لا يعرفون مشاكلنا
مهتمين فقط بكيكة حزبنا،
وعدد الولاة والوزراء ومقاعد التشريعي،
ونصيب تجمعنا و الخمرة والمريسة كحق انسان ، وحق المراة في ارتداء البنطلون و حماية براءة الطفولة من #سورة_الزلزلة ، وفصل جندي اوقف وزيرة في كبري ،،
لكن شعب يجوع لا يهم،
دواء ينعدم فيهلك مرضى السرطان وغيره ؛ لايهم فاستراتيجية ابو قردة متوفرة عند الطلب
جاز بنزين كهربا موية .. لا يهم فلجنة التمكين تعمل بجدية تكفي نجاحاتها.
مليون جلد يعفن ويدمر البيئة عند حكومة حمدوك قحت في ستين،
لان حمدوك قالوا في الصحف ما عندوا فكرة عن شلة المزرعة!
ارجوكم لا تسمعونا عباراتكم المنتهيةالصلاحية بتاعة الكيزان ووو شوفوا شغلكم وتحملوا المسئولية
السودان شعب عظيم يستحق حكومة عمالقة لا اقزام.
امة ثورية تتألم
لا للمحاصصات
نعم لانتخابات حرة مبكرة تعلن خيار الشعب
من حفرة لدحديرة #قحت_حمدوك
اللهم ول امورنا خيارنا ولا تول علينا شرارنا
#محاكمةوزراءالتجارة_والثروةالحيوانية
فعلوا الهاشتاق اعلاه بالله
اين انت يا برهان ؟
محمد هاشم الحكيم



‫5 تعليقات

  1. والله سوف تدفعون .. وتبلعون كلمة تسقط بس
    فعلا سقط السودان.في هلاك سحيق سقط السودان في تحت جزم السفهاء.
    سقط السودان في شلة مزرعة وشلة كتشينة وشلة مقامرين وشلة جهلاء.

    هل تدعون لمليونية تصريف مياه الخريف.؟

  2. خليها تصل النخرة عشان الناس تعرف بقروشها من هي قحت وتجم، الفورة مليون.. تفكيك وجهوية وفوضى وإهانة للقوات النظامية وجوع وفقر ومرض وموت بالمجان ودمار شامل والحكومة ساكنة في السلام روتانا وبتاكل جاتوه وتشرب فودكا وويسكي سكرانة ما جايبة خبر نفسها كدة كويس وعديلة عليكم خموا وصروا وزول عايزها مافي.
    النفايات موجودة في الشوارع ليها سنة وجات عليها المطرة وحتبقى كوليرا وتكتل مليون نفر وقال حنبنيهو، كدي أول نضف عفنك.

  3. للأسف مازكره محمد هاشم هي عين الحقيقة لأول مره جلود الاضاحي تلقى في النفايات في ظل حكومة الفشل ممن كنا نظنهم خبرات ولكنهم لا يستحقوا ان يقودوا الأمه السودانية العظيمة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *