كل شئ ينهار بسرعة.. الناس والحياة والقدرة علي الاحتمال.. انفلاتات امنية ونهب في الشوارع
البلد بتغرق وهو يقول ليك سنعبر
تدهشنا هذه الحكومة كل يوم.. وتحبطنا.. من الذي يفكر لها وهل تفكر اصلا.. الا يعتقد هؤلاء اننا امام ازمة حكم حقيقية.. احيانا تسعر ان السؤال المنطقي هو ان تسالهم عن اسم الدولة التي يحكمونها.. هل يعرفون اسمها دع عنك التاريخ والجغرافيا وكيمياء مواطنيها.. هل يدركون اننا وصلنا الان الي مرحلة بتنا نخشي معها ان نصحو فلا نجد بلادنا..
كل شئ ينهار بسرعة.. الناس والحياة والقدرة علي الاحتمال.. مامن ضؤ في اخر النفق.. الاقتصاد ينهار بسرعة والحياة من حولنا تنهار وهم ولا هنا.. تستمع الي احاديثهم تتعجب منها ومنهم.. الكيزان الكيزان.. يا اخي الكيزان تطير عيشتهم وعيشتنا معاهم.. ديل شلناهم يا عالم ليهم سنة وقلنا حاكموهم وسلمناكم البلد..
جبتو خبراءكم واستلمتو.. البلد ماشة لي وراء سكتنا.. الدولة العميقة سكتنا.. قلنا نديهم وقت اكيد عندهم خطط وبرامج خصوصا في الاقتصاد والحكومة علي راسها اقتصادي.. لكن الاحوال مشت لي وراء.. محاصصات ومطاعنات وخلافات ولافي خطة ولابرنامج ولا يحزنون.. شوية دراويش لافين صينية.. البلد بتغرق وهو يقول ليك سنعبر..
تعبر كيف وانت من استلمت حتي الان كل الملفات العندك ماشة لي وراء.. معايش الناس شهدت تدهور خلال هذا العام غير مشهود.. الدولار سعرو زاد واتضاعف وماشي.. الكهرباء مافي.. غاز مافي.. بنزين جاز مافي.. خبز مافي.. دواء مافي.. كل السلع سعرها اتضاعف مرتين وتلاتة.. مواصلات مافي ولو لقيت السعر مضاعف مرتين وتلاتة واربعة..
انفلاتات امنية ونهب في الشوارع.. وحروب قبلية كلاشاته بره.. والحكومة التي فشلت في علاج الملفات وبشرتنا برفع العقوبات الامريكية والاوربية لم تجد في النهاية حل سوي رفع الدعم عن المحروقات والكهرباء ورفع الدولار الجمركي لتزيد معاناة المواطن.. تخبط وارتباك وهروب من المسؤولية ومن مواجهة هذا الفشل والاغرب انو بعد سنة لسه ماسكين في لبانة الكيزان والدولة العميقة وماعايزين يواجهوا حقيقة انو حصادهم بائس وبضاعتهم رديئة. قتلوا الاعلام واغلقوا الصحف والثقافة والفن والرياضة.. وقتلوا حياة الناس.
وحتي عندما خرج من صنعوا الثورة بدمائهم ووصلوا حمدوك امام مجلس الوزراء تمنع عليهم.. ابتعث لهم احد موظفيه ليخاطبهم ويستلم المذكرة لانو سيادتو مشغول.. اضحك مع حمدوك.. مشغول بي شنو.. البلد بتنهار وانت قاعد تتفرج.. شنو الاهم من انك تسمع صوت الناس الجابوك قايلنك حاتجيب الرايحة .. الناس الكان عندها ثقة انك الشخص المناسب للمرحلة دي.. صحيح انت سطتها بي عود.. واحبطتنا.. لكن حركة اليوم ماعندها معني.. كان ممكن تطلع تقابل الناس بدل ترسل موظف وترسل ليهم البمبان.. ده لو بنفع كان نفع البشير.. الان المظاهرات شغالة والبلد حاتولع.. وكالعادة حاتقعد انت والوزراء تناقشوا ملف السلام والتوقيع مع ياسر عرمان والمناصب الحاتدوها ليهو هو وجماعتو وتناقشو ترامب حايجي والا بايدن حايشيلو.. لاعيش لابنزين لاحروب اهلية لاعندكم شغلة بالكهرباء القاطعة ولا صفوف الوقود ولا الدواء ولا التضخم ولا المظاهرات..
اعتقد ان لجان المقاومة ادركت الان ان ماظللنا نقوله منذ البداية صحيح.. حمدوك هو علة هذه الحكومة ولن تستقيم الامور بوجوده.. هو الان ومنذ قيام الثورة حجر عثرة في طريق اكتمال التغيير وانجاز الاصلاح.. لا تثقلوا عليه.. الرجل اقل قامة من طموحات السودانيين.. والوثيقة الدستورية اقل قامة من طموحات السودانيين.. دفع الشباب ثمنا باهظا واطاحوا بديكتاتورية باطشة لكنهم سلموها للاسف لسراب يكاد يذهب ريحنا الان.
امير عبدالماجد
يا زول انت كده زعلت جميل بثينة(زول ساي..جون..نمر..الأستاذ..الشاعر…الخ الخ.. مش مهم كلو في النهاية علي)
وفقعت مرارتو
هسع يطلع ليك رافع في وشك الكرت الاحمر بتاع جماعتو الشيوعيين ومكتوب عليهو كوز كوز كوز
انت ما عارف انو الزول ما بنوم من كترة الهموم والحقد
ههههههههههههههههههههههههههههههههههههههههنههن
سنعبر … سنقفز … سنطير
عبارات لن تجدي أمام واقع مخيف
والمضحك أن هناك من يقول ” ليس بالخبز وحده يحيا الإنسان ” عبارة عفا عليها الزمن ، وأكل قيمتها الدهر
واضح إنه في ترف من العيش ، يجعله يظن أن البطون الجائعة ستتبنى أفكارا لا معنى لها
الخبز أطاح بالإنقاذ
الناس لم تخرج من أجل الشعارات الفارغة التي يرفعها اليساريون
وسنرى ماذا سيفعل الخبز من جديد
وخبز خبز براهو ..اسا سرقة بالنهار …تليب عدييل تتصل بالنججدة لمن تصل يحلك الله …..الله يحلنا منك ياسجموك ..والله ما كوزة …بس عاملين زي الاميرة التركية وهي واقفة في البلكونة لمن شافت المظهارات قالت قالوا ليها جعانين قالت ما ياكلوا بسكويت
ياسجموك لودامت لغيرك لما وصلت اليك …اتنازل سرييييييع..قبل يلحقك اللحق الكيزان …..
أيها الثوار لا تكرروا نفس شغل الدروشة الذي أطاح بالبشير ولما ذهب أكتشفنا أننا بلا قيادة فظهرت قيادة من تلقاء نفسها وتولت الأمر وأكتشفنا أنه ليس لديها برنامج ثم تكاثر حول السلطة الذباب السياسي من المقاطيع وعطالة السودانيين في الدول الغربية والأحزاب الكسيحة والنطيحة والمنخنقة وظلو ا يعوسوا حتى وصلنا هذه المرحلة من تفكك الدولة وتحلل مؤسساتها واصبحنا نرى الإنهيار بأم أعيننا ولكننا عاجزين عن أننحرك ساكنا. هذه المرة لابد من أختيار القيادة أولا وأن تضع القيادة البرنامج الذي يلتف حوله الشعب والتحرك في يوم واحد وفي ساعة واحدة في جميع مدن وقرى السودان وتكون الضربة القاضية لتكمل ما تبقى من الفترة الانتقالية. الخيار الثاني إذا ترك الوضع لحمدوك فإننا غارقون غارقون. لا تستعجلوا تسقطوهم الإ بعد ترتيب البديل وببرنامج محدد بمواقيت زمنية محددة. لا نريد أن نكرر وحدس ما حدس.
نحنا نستاهل.. لأنو نحنا شعب عاطفي بس.. بيقودونا بالمظاهرات والشعارات والشنشنة ومداعبة العواطف.. ولما يغلبنا التفكير بنترس الشوارع!!!!
نسيء للجيش ولما نتزنق بنجي جارين عليه، بننتهك أعراض الناس وحرماتهم وبنوزع التهم جزافا، شبابنا يترصوا تحت الشجر أو يطلعوا يشقوا حلاقيمهم بكلام ماعارفين ثلاثة أرباعه بيعني شنو لكن زول يشيل طورية يزرع لا حاشاهم الملوك.. ديننا بينتهك ليل نهار ولسه راجين رحمة ربنا تلحقنا.. السودان في عظمه زهجان ونكدان من البشر العجيبين البرتعوا فوقوا ديل… ناس عقيمة بشكل
عظمة الثورة السودانية لا تليق بمن تولو امر البلد وقد أثبتوا انهم ليسو بمستوى عظمة وحجم الثورة لذلك لابد من ابعادهم عن هذا الوطن العملاق حتى تكتمل أركان ثورته وينهض كما بقية الدول أمثال روندا نريد رجل بقوة وحزم وارادة رئيس روندا