نص خطاب السيد رئيس الجمهورية بالدمازين

بسم الله الرحمن الرحيم الحمد لله رب العالمين الصلاة والسلام على خير خلق الله اجمعين سيدنا محمد وعلى آله وصحبه المواطنين الاعزاء الاهل الاحباب في النيل الازرق السلام عليكم ورحمة الله وبركاته نحمد الله سبحانه وتعالى انو جيناكم الليلة ووجدناكم في احسن حال وجدنا الامور كلها ماشة لقدام ونحنا يا جماعة من الصباح بنفتح في مشروعات جديدة بالدمازين وعلى رأسها ضربة البداية لطريق الدمازين الكرمك ودي يا جماعة نتائج السلام لأنو أكبر انجاز عملناهو هو السلام قبل كم سنة كانت العلاقات بين هذه الحشود هي البندقية والكلاشنكوف والليلة العلاقات اصبحت كيف نعمل شارع ظلت ونعمل مستشفيات ومشروعات الموية ده يا أخوانا السلام وهو اول هدية قدمناهو للشعب السوداني ولازم نحافظ عليهو ونمسك فيهو قوي تاني مافي بندقية ومافي كلاشات تاني في زراعات وحاصدات وتركترات ومشروعات تنمية انا قته يا جماعة انو الناس البتمسكو بالتعلية جاتم ليلة القدر لانو بيوتن الجديدة ماهي بيوتن القديمة وستحصل ليهم نقلة حضارية في الموية والتعليم والصحة – هسه اخوانا ديل( يقصد ملك عقار وكرمنو) اتكلمو عن مشروعات جديدة والعافية يا اخونا درجات والحاري ولا المتعشي نحنا كل يوم نعمل طريق جديد ومركز صحي جديد ومستشفى جديدة وسندعم الزراعة لنزيد دخل الزول ونرفع مستواه المعيشي وده ما بتم يا جماعة في يوم واحد وعصايتي دي عصاية البشير ما عصاية موسى لابد من المهندسين ان يعملوا التصاميم والتخطيط وخطوة خطوة لغاية ما نعمر البلد كلها ونحنا يا جماعة دايما نقول الحساب ولد وين كانت النيل الازرق قبل الانقاذ ولانو تاريخ السودان والحكم الوطني ما بدا مع الانقاذ ولكن نحسب من الانقاذ الفات نعوضو بالحاجة البجنيه نعملها بخمسين قرش والبلمليار نعملها بنصف مليار وما نضيع الزمن في الخلافات وزي ما قال مالك عقار الناس السياسيين ديل خلوهم يتكلموا لانو الكلام ده شغلم ونحنا بهمنا انتو ديل نعمل الطرق والزراعة والصحة والموية ومافي منطقة مهمشة في السودان والليلة يا جماعة جبنا ليكم الحكومة كلها حكومة الوحدة الوطنية ستعقد اجتماعها بكرة هنا في الدمازين سندرس مشاكل الدمازين ونتخذ القرارات بشأنها في محلها مالك وكرمنو بجونا هناك وعذبونا عذاب دايرين ودايرين عشان كده نحنا جبنا الحكومة عشان نشوف الحاصل شنو- ليسمعوا كلام الناس ويلفوا في المدينة ويعرفوا الحاصل شنو- الحمد لله وجدناكم بخير نحنا معاكم وبيكم كل الاماني والتطلعات ستتحقق نحنا عايزين يا جماعة نشجع الزواج الجماعي عايزين نبني اسر والبنات ديل كلهن دايرات العرس (صاح يا جماعة ) دايرين الزواج الجماعي كل ناس حي يجتمعوا ويشوفوا كم عازب وكم بت عايزة الزواج وكان بت ما متزوجة انا داير اول حي ولا قرية يجيبوا التمام نديهم جايزة البلد دي يا اخوانا واسعة وعايزين الاولاد عشان يعمروها والرسول قال تناسلوا وتكاثروا فاني مباه بكم الامم يوم القيامة نشكركم على الاستقبال والحماس والاندفاع ويا اخوانا السلام والطمأنينة والتطور والحضارة ده شعارنا يا جماعة تاني خلافات مافي والناس كلهم سواسية ( يا ايها الناس انا خلقناكم من ذكر وانثى وجعلناكم شعوبا وقبائل لتعارفوا ان اكرمكم عند الله اتقاكم) وردنا للناس البرة بالتنمية تنمية طريق الكرمك وتعلية الرصيرص والمدارس والمستشفيات يا جماعة ما تنشغلوا بيهم هم دايرين ضياع الزمن والرزق ما بيد امريكا ولا اوروبا خلوا علاقتكم مع الله قوية امسكوا في رجال الطرق الصوفية ورجال الدين واشكروا الله ولازم نزيل الخلافات ومافي زول يفرق بيناتنا الله اكبر لا اله الا الله لا نعبد الا اياه.
المصدر :سونا