الشيخ محمد أحمد حسن : سلام الخدود ده يابناتنا دخيل .. وأخير منو بتاع الحبوبات!
إعتبر الشيخ محمد أحمد حسن أن السلام بين الفتيات بهذه الطريقة ليس سلاماً إسلامياً بل هو دخيل علي العادات السودانية ، ووصفه بأنه أقرب للإثارة والفتنة من كونه يشيع الود والمحبة التي أمر بها الإسلام . ونصح الشيخ محمد أحمد حسن البنات بترك السلام بهذه الطريقة ودعاهن للسلام بالطريقة المعروفة قائلاً: (سلمن بالسلام المعروف ، سلام الحبوبات وسلام الأباء ، الزولة تقابل أختها ، عمتها ، خالتها ، أو صاحبتها وتسلم عليها في إيدها سلام محترم كده وتسألها من صحتها وأحوالها ، ده السلام المشروع) . وقال الشيخ محمد أحمد حسن أنه بات من الملاحظ في الفترة الأخيرة أن (الكثير من الطالبات والبنات في الشارع تلقي الواحدة منهن تقابل صاحبتها تسلم عليها في جضومها وتبادلها القبلات وطبعاً دي تعتبر زي قبلة ، وقدام الناس والشباب في الشارع فيها شئ من الإثارة ) . وبحسب صحيفة حكايات أضاف : (ننصح بناتنا بأن السلام ده ما اسلامي ، الصحيح الواحدة تقابل اختها وتسلم عليها في إيدها سلام سمح كده، ده المطلوب لكن السلام بالخدود ده دخيل علينا وفيهو شئ من الإثارة خاصة قدام الشباب من الجنسين ).
تحية خالصة لشيخنا محمد احمد حسن وملاحظة فى محلها واهو دة تأثر بالمسلسلات البتحتوى هذه المناظر وفى حاجات تانية الله يكفينا شرها وسلام الحبوبات دة لو رجعنا ليه يكون افضل ومعبر اكتر وكمان فيه دعوات طيبات صادقات الله يعافيك الله يرضى عليك – – – وهكذا وكمان الحبوبات الحنينات خالص عندهم شمة كدة تجنن فى الجضوم على حد قول شيخنا الفاضل وان شاء الله شاباتنا يرعوى على الاقل ما يعملوها فى الطريق ويتعبوا الشباب التعبان على الطرقات
والله العظيم الكلام القلتو دا صحيح مية 0 لكن ياشيخنا البنات مابسمعوا الكلام ابدأوشكرا
أولاً لك التحية والإحترآم ياوآلدنا وشيخنا محمد الحسن ويشهد الله إننا نحبك في الله ولا فُض فآك ياشيخنا عودتنا دآئما ببساطتك ولغتك العامية البسيطة وهى لغتنا الحلوة الحنينة أن تلآمس قلوبنا من أول وهلة . أما سلآم أخوآتنا ده الفي الجضوم دى العولمه والبشوفنو فى الفضائيات عاوزات يقلدنو وكان بعرفن جد ده سلام ماليهو طعم والواحد بشمئذ لما يشوفن يتناقدن ذى الحمام يا أخوآتى الشارع ليهو حرمتو ومليان بضعآف النفوس ونسأل الله أن يهديكن ويهدينا .
لاشك نحن كل شىء دخيل نراه هو الحضارة والرقى (والجيم بجننونها جن ) لكن كمان سلام الحبوبات فيه جنس ضمه تقطع النفس مع الشباب ديل بتكون صعبه ومحتاجه ايضا لمعالجة إسلامية ..مع أن سلام الحضن فيه نوع من الحنية التىتميزنا بها والمطلوب حسن الظن والنية والعمل
وياأخوى أبو شمله ( الحكاية ماصارت شمه الوضع صار شيش ) والله المستعان
مع كل التقدير للشيخ لكن من الافضل الانصراف عن سفاسف الامور للحديث عن الاهم
هل تستطيع يا شيخنا ان تخرج علينا منتقدا الظلم والفقر العوز الذى يعيشه الناس
مقابل الثراء والترف الذى يعيشه الحكام؟؟
هل تحدثت يوما عن المطرودين من المدارس والجامعات بسبب كم الف لا يستطيع الاهل
توفيرها وعن النائمين حول اسوار المستشفيات وسارحين فى حق العلاج وضياع الارامل واليتامى؟؟؟
هل تستطيع الحديث عن الواسطة والمحسوبية وتقسيم الناس كيمان اما معانا او مع
التانيين؟؟
هل يراودك السؤال عن المناصب ومن يشغلها ؟ هل الشخص المناسب فى المكان المناسب؟؟
هل تجرؤ على السؤال عن املاك الشعب التى تباع يوميا وعلى عينك يا تاجر ومن
اشترى ومن دفع وبكم اتباعت ؟؟
هل يمكنك السؤال عن اموال البترول من يوم ان خرج وحتى الان ؟ ولا الحساب يوم الحساب؟؟
يا مولانا الاولى فالاولى والضرر والاكثر ضررا والحرام والاشد حرمة
عندما تفرغ من كل هذا وتجيب عن كل هذه الاسئلة تعال افتنا فى الطريقة السلام و
غيرو وغيرو عندها سنسمعك لانك وقتها تكون قد قمت بواجبك كاملا اما ان يكون
النصح للغلابة فقط ولا تقول للجماعة تلت التلاتة كم عندها ستفقد مصداقيتك تماما
والاهم والاخطر ماذا ستقول لله سبحانه وتعالى عند السؤال يوم الموقف العظيم؟؟
لك الله يا شيخنا العزيز ويشهد الله كم نحبك فى الله بلغتك العامية السودانية التى خلالها نرى البساطة والتواضع وحنان الأبوة الصادق ، أسأل الله أن يديم عليك نعمة العافية وأن يجعل حديثك فى ميزان حسناتك ، اللهم آمين0
أمّا بخصوص بناتنا فأقول لهنّ ، الآن وقد ذكركنّ هذا الشيخ الفاضل الجليل الذى يحترمه كل الشعب السودانى فعليكنّ مراعاة تلك النصيحة التى تشبه الفتوة خاصة وأن الشيخ قد لمّح للإسلام فى حديثه ، أتمنى لكل فتاة التمسك بعاداتنا وتقاليدنا النابعة من قيمنا وعقيدتنا بدل التأثر برياح إحتضار العصرنة الآتى من كل الإتجاهات ، كما وأنّ هذه مناسبة أناشد بها جميع أفراد المجتمع لمحاولة عدم السماح للكثير من العادات الدخيلة التى بتنا نراها تطفو للسطح كل يوم فى شتى مناحى حياتنا ، نعم نعرف أن الكرة الأرضية قد صارت قرية صغيرة لكن لا يعنى ذلك أن نتخلى عن عاداتنا وتقاليدنا التى تميّزنا عن غيرنا ونصبح مقلدين للآخرين بدل أن نصدر لهم ما عندنا من خصال حميدة ناصعة 0
اكثر الله من امثالك ايها الرجل الوقور الذاهد السوداني الاصيل
حتي طريقه علاجك للقضايا تعتبر اجمل طريقه
امد الله في عمرك وجعلك زخرا لبلادي
ياخي يا شيخنا حرام عليك فعلا خلينا من سفاسف الامور و شوف المشاكل الحقيقية فى الشارع و في البلد تكلم عن الظلم ثم الظلم ثم الظلم
الاخوة الاعزاء حازرو الغلط فى شيخ من شيوخ السودان الاجلاء . علينا ان نفرق بين انة شيخ دين وليس سياسى وصاحب نفوز وهو يفتى فى كل الامور الدينية بغض النظر عن صغيرها او كبيرها ومن يحكم فى ان الموضوع سفاسف امور علية ان يراجع نفسة والبيب بالاشارة يفهم .
الأخوين دولي و أمدرماني
إنتو عايزين تحولوا الشيخ لصحفي ؟( )
طبيعي إنه يتكلم في أي موضوع وهو ما مسئول يصلح العالم كله
نسأل الله إنه يكتر من أمثاله عشان تتصلح كتير من الظواهر السيئة
أما البتكلم عن الظلم والمحسوبية وغيرها…..
دي كلها نتيجة لخلل اجتماعي خطير
تلقى الناس ما عندها مانع من ربا …
ولا سحر …..
والواحد عنده مئات القنوات التلفزيونية…..
يسمع ويشاهد في الفنانات والممثلات…..
ومنتظر ربنا يكرموا بـ عمر بن عبد العزيز !!!
المشكلة ما شايف دا كله غلط ……
لكن الخطأ الوحيد عنده هو الذي ارتكبه هذا الشيخ 😮
والله ياأخ دولى أشوفك خرجت من الموضوع طالما أنت عامل مفتى وعندك أثباتات ليه ما تفتى وتقول الفى رأسك هل منعوك من ذلك 0 يا أخى لك الحق فى ذكر كل شى تراه غلط عشان الناس تشوف الصاح من الغلط وتقيف معاك وأنا واحد منهم لكن تقعد تعارض فى كلام الشيخ يعنى أنت موافق على السلام بالجضوم ونرجو أنك تكون صادق مع نفسك أولا وتقول الحقيقة والتى هى فى راسك الشيخ ماهو حكومة ولا هو فى يده القلم ونرجو أنت العارف كل شى دا تكتب لينا ما عندك وعشان نستفيد بلاش فلسفة فى الفاضى واعتراض على الصاح والغلط وشكلك أنت من جماعة خالف تذكر ز :lool: