بالصورة : صحيفة المستقلة تفجر أزمة مع المريخ بسبب كاريكاتير بطولة لله يامحسنين !!
اعتذار لمشجعي المرّيخ : آسف جدا لو الكاريكاتير الفات كان مسخّن ! و زعّل ناس كتار منّكم ، لدرجة إنو السيد (جمال الوالي) شخصياً ! و معاهو كم شخصية كده اتصلوا برئيس تحرير جريدة المستقلة (د.كمال شدّاد) و عاتبوهو على الكاريكاتير . و الكاريكاتير نزل في الصحيفة بدون علمه و ما عرفو إلا بعد ما انتهى من المكالمات . كنت متهوّر و عملت الموضوع بقدر ما كنت مستاء من إنو فريق بيمثّل السودان يلعب بمستوى زي ده ! حصل خير و هارد لك ، و الجايّات أكتر من الرايحات يا مرّيخاب ، و آسف لو زعّلتكم ، بس انتوا شدّوا حيلكم شويّة و ما تجيبوا الكلام لي روحكم . إن شاء الله الكاريكاتير الرياضي الجاي يكون عن الهلال ! لو فاز وللا خسر . عشان نكون عادلين و ما نميل لي زول على حساب زول تاني . علاقتي بالكورة زي علاقة حبّوبتي بجهاز الجالاكسي ! و يمكن الحاجة دي ما خلّتني أقدّر المفهوم بتاع الإنتماء و التعصّب الرياضي ، و احسب ليهو حساب ، و أقلّل العيار بتاع الكاريكاتير شويّة و ما أبالغ فيهو . .أكرّر أسفي يا معجبين و يا معجبات . على حد قوله
وقد إنتشر الكاريكاتير بشكل واسع على مواقع التواصل الإجتماعي والمواقع الإلكترونية مما أثار حفيظة مشجعي القلعة الحمراء ، ويعد الكاريكاتيرست محمد إسماعيل من رسامي الكاريكاتير الناشئين وأول تجربة له كانت بصحيفة المستقلة الشهر الماضي ، وهو شاب طموح يسعى إلى انتاج عمل يشابه طاش ماطاش السعودي ، خاصة وانه قد تلقى معظم مراحله التعليمية بالمملكة العربية السعودية .
محمد الطاهر ـ سوداناس
[SIZE=5]اعتذارك ما بفيدك !!
أهو كده نحن دخلنا الصورة …لا شفنا جريدة المستقلة ولا شيء
وهو ما يخلو روحهم رياضية…خلقهم ضايقة ساكت من الخروج من البطولات …الكاركايتيرست ذنبه شنو [/SIZE]
والله صحى الفراغ وعدم الموضوع بيعمل اكتر من كده
انت متين اتعينت وعاوز تعمل فيها ظريف قوم لز عليك الله
ما تكبروا القصة ساكت دا كاركتير عدى ليس فيه اساءه للمريخ ولا تقلل من مكانته . رسامى المريخ والهل سبق ان تبادوا رسومات اكثر سخرية من هذا الكاركاتير ولم يحتج احد !! فلماذا هذا الشاي بالذات !!!
غياب السودان كان مريخ كان هلال كان منتخب هم السبب فى هذه الكاركاتيرا واستمر يا شاب ونتمنى لك التوفيق فالكاركتيرات اح اساليب الاصلاح .
الكاريكاتير اداة من ادوات النقد لتقويم وتصحيح المسارات واللي ما يقبل النقد زول ما بيقبل النصح والارشاد لتطوير نفسه ورفع شأنه . لا الهلال ولا المريخ فوق النقد . وبدل الزعل يا والي صلح عتبة بيتكم (المريخ) ويا محمد ما تشتغل باي زول وانتقد ايا من كان يمكن نتصلح شوية ونشبه الناس .
معقول علاقتك بالكورة زي علاقتك حبوبتك بالجالاكسي ومتابع كدا وعرفت المريخ خرج من البطولة الأفريقية وسيكافا، وأنه في بطولة رياضية للدورة المدرسية !! انت هلالابي تعبان .. ولو جيت للجد علاقتك بالكاريكاتير هي اللي مثل علاقة حبوبتك بالفيزياء النووية .. لأنو الكاريكاتير ما بيرسموه كدا .
ما دى الحقيقة الزعل فى شنو؟
تافة حقير …..المريخ لما كان بجيب البطولات والكاسات انت كنت وين انت لا تعرف معنى المريخ والتاريخ >>> احذر ثم احذر
كويس انك اعترفت بعدم علاقتك بالكورة لانك لو عندك ادنى علاقة بالكورة ما كان عملت كاريكاتير زى دا عن المريخ لانو المريخ يا سيد اول واخر فريق سودانى احرز كأس لهذا البلد ولو ما عارف اسأل واتثقف اول حاجة حتى تشتغل كاريكاتير …..
انت راجل مبدع يا محمد اسماعيل وما في لزوم للاعتذار.
ما في داعي للعتذار ما دا الحاصل فريق ينظم البطولة اجيب فرق تعبانة عشان يشيل الكاس يطلع صفر
دي المرة التانية التي ينظم فيها المريخ البطولة ويطلع صفر خالي الوفاض
بطولة حوض البط
انا مريخابي متعصب ولا ارى ان الكاريكتير فيه مبالغ اليس هذا حال المريخ الان وليه الوالي يزعل ده الواقع المريخ فشل فشل ذريعا في احراز الطولات القارية وسبب الجلطة وارتفاع ضغط الدم والسكري لمشجعي المريخ من المسؤل عن ده مش ادارة المريخ والله ايه
مع إنـو أنا مريخابي لكن ماشايف الموضوع بستاهل قومة النفس دي بالعكس
الشاب ده عمل شغل كويس ونقد مؤدب وياريت يستمر في هذا الطريق لكل الفرق
ذات الجماهيرية والتي تحبط مشجعيها باستهتار لعيبتها ومجلس الاداره واتمني يوصل
الشغل حتي للفرق القومية .
[SIZE=3][FONT=Arial]مبروك ياود الخالة شغلك نضيف أضرب الحمام خلي يصحى شوية[/FONT][/SIZE]
الزول كلامه صاح إنتو أدوكم بطوله مرتين مع (حمام ميت) ما احرزتوها يعملوا ليكم شنو؟؟؟ على الطلاق بطولتكم دي الهلال لو لعب فيها العم شبشة وبقية الطاقم العامل كان جابوا الكاس .
بطولة لله يشحدها المريخ ولا يشحدها ويحاول ـ دون جدوى ـ يقلعها (بالبونية الحيمودية) الفريق الصفر الدولي الكبير الدولايبو فاضية ليها من التكتح أكثر من (85 سنة) كبيسة .. والله فعلا الاستحوا ماتوا..
انا عايز اسال هذا الكاريكاربست وما دخل الهﻻل عشان تراضي ناس تحشر الهﻻل..بعدين هو ده حالهم بزعلو ليه فريقهم بلعب في دورة سكج بكج .
لا أرى أي داعي للاعتذار الكاريكاتير يوصف واقع الحال
هو من أجمل الكاراكيرست تعبيراً وكنت مريخابي في نهاية السبعينات من القرن الماضي ، وحينماأشاهد تجاذب وجدال عن كرتنا أشفق عليهم لأن لا شيء يستحق! كرتنا وسياستنا وشخصيتنا وعلاقاتنا وحتى ثقافتنا وتعلمينا أصبحوا ركام من هدم الإنقاذ للتركيبة الربانية التي جُبلنا عليها.
فلماذا الزعل فهو فنان حرُ في رأية وفي طريقة تعبيره ومسخرته لأنهم يستحقون المسخرة وأكثر من ذلك ، وجمال الوالي وغيره هو من جلب التمرّد على الرياضة بالعطاء اللا محدود الذي يسخره لهؤلاء من يسمونهم لاعبين؟ الذين يستحقون الشحذة حقاً وحقيقة …
[B][SIZE=6]يا سيد جمال ماف حاجة بتزعل الصورة معبرة ودى حاتكم بالظبت خلو روحكم رياضية[/SIZE][/B]
استاذ محمد , جميل جدا الكاريكتير وواضح إنك فنان وكمان عندك إحساس بقضايا البلد … أنا مريخابية واعتقد إنك ممكن تشعل الحماس والغيرة للمريخاب ادارة لاعبين مشجعين ممولين لننتبه لإنقاذ الرياضة وحفظ ماء وجهنا ,,, وارجو لك التقدم فى حياتك المهنية وكمان أوصيك ألا تحجم عن تقديم النقد البناء واكيد لك الشكر والتقدير