منوعات
الممثلون هجروا الدراما وبقوا (سواقين ركشات).!
*غياب الدراما السودانية خلال السنوات الماضية..ماهو السبب..؟
غياب الدراما يعود للقنوات الرسمية، (قالوا ما عندهم قروش ينتجوا… قلنا ليهم بنجيب رعاية…وفعلاً جبنا الرعاية قاموا تاني قالوا لينا دايرين 40% من رسوم بث من الدخل الكلي البجيك من الراعي، في حين أن نفس المادة البنتجها الممثل كانوا بشتروها بـ(100) جنيه بس.!
*اين دور شركات الانتاج الاعلامي..؟
دوروها جمع المال من المعلنين من غير أن توفر للممثل اي شيء.
هل هذا هو سبب هجرة الكثير من الممثلين للدراما..؟*
شوفي…الممثلين هجروا الدراما واتجهوا للمسرح، لكن المشكلة المسرح ايضاً بقى (طارد)، خصوصاً بعد (مجانية الاعلان).
*طالما أن المسرح اصبح ايضاً طارداً اين سيذهب الدراميون..؟
والله بعض الشباب شغالين امجاد وتاكسي وركشات وفي ناس جارين ورا المنظمات و(الرزق تلاقيط).
*عبارة يا(خلف الله ما عذبتنا)..هل لازالت تطاردك..؟
نعم…وهناك بعض الناس ينادونني بـ(خلف الله) عدييييل كدا.!
*الا تخشى من أن يؤثر ذلك الدور الذى اديته على بقية ادوارك القادمة، خصوصاً انه حقق نجاحا كبيرا جداً..؟
والله (خلف الله) رسخ في الذهن، لكن كمان في شخصيات كتيره اشتغلتها بعد (خلف الله) وبرضو بينادوني بيها مثلاً زي: (طشاش) و(حاج الأمين) و(شلهتة) وغيرها.
*رأيك فى فرقة الاصدقاء المسرحية..؟
هي فرقة (انجازات)، ربنا يقدرهم ويدونا كمان وكمان.
* ومهرجان البقعة الدولي للمسرح..؟
هو المهرجان الوحيد المستمر يعني (بلمنا وبنشوف فيهو عروض من دول تانية بس اسبوع في السنة بسيطة، وبتمنى انو العروض البتتقدم فيهو يشوفوها كل الناس في مسارح مختلفة في البلاد.
*مسلسل مهمة 56 الذى يعرض بالقناة القومية هو خطوة لعودة الدراما من جديد..؟
ممكن يكون كدا…بس هو نجح بجهود المخرج والفريق العامل في المسلسل ولولا هذه الجهود والرعاة المؤمنين بدور الدراما اتجاه البلد لما نجح هذا العمل.
*حدثنا عن أعمالك الفنية القادمة..؟
استعد الآن لتقديم سلسلة (كدا وكدا) للموسم الثالث في شهر رمضان القادم بإذن الله، ووقعت عقداً مع قناة الشروق لبرنامج مسرح في الهواء الموسم الرابع، كما استعد لمسرحية (هذيان في ميدان عام) لمهرجان الراحل مجدي النور.
.
صحيفة السوداني
خ.ي
