حاتم حسن الدابي.. ازعجته (حبيبي شطفني) و(اديني حقنة) و(ودق السيستم)
مهما هربنا من واقعنا..خلاص صبح الزمن مقلوب
ده الماذينا والموجعنا..وبقينا نسوي فى الحي ووب
كل ما نقول عدلنا وضعنا..نلقاهو الوضع مخروب
للموضات ترانا تبعنا..أدمنا وغلبنا نتوب
لما الهم مسك شارعنا..وكلنا قلنا فيهو الروب
اليوم الشباب في محنة..بين البدعة والمرغوب
قالوا ثقافة بتفتحنا..وتتقلب الثقافة ذنوب
ارث اجدادنا ياهو سمحنا..تقاليد دينا هي الاسلوب
اسع منهن وين نحنا..حسينا الفقد يادوب
وما عارفين محل صالحنا..لا راكبين ولانا اقروب
وين ابواتنا أهل الحارة..أهل العمة والمركوب
والعراقي دمورية…وجاري وراهو سربادوب
ديل ربونا بالطورية..والعرق الدوام مصبوب
ترباية الاسر دينية..رزقا بالحلال مجلوب
حليل أماتنا امات طرقي..الفردي ولباس التوب
نار الدوكي والمشاطة..والواقود ورود الموية ليهو دروب
حش القش تحت في الساقي..رفع الجدول المخروب
زمن المحفضة المندلي..واصل سيرة للعرقوب
حل علينا زمن كلو..ضيق ولبس مكروب
الولد والبت فد خلقي..وكل زول عن رفيقو ينوب
لبسة(حبيبي شطفني)و(اديني حقنة)و(داق سستم) المحبوب
وشبشب قالو اسمو(الليزر) زي شقيانة العروب
بناطلين جنز(اخراج موية)..مفتوحة وملاني هبوب
وتلقى الشاب معلم الله..وفي الشي اللابسو عشرة جيوب
وحدث لا حرج في الشارع..أجساد لا فهم لا قلوب
لا تقدير أهل لا خجل..حبيبة وماسكة في محبوب
مجلبطة وشها وماسحاهو..كل كريم براهو يذوب
واي كريم مغالط التاني..انو هو وحدو المطلوب
وسبحان الله شفتو الحكمة..الوش زي كمينة الطوب
والروج والرموش بي غادي..كل تلاتة عاملي قروب
زمنكم يازمان الدسكو..زمان جاكسون وزمان البوب
زمن مافيهو حتى ثقافة..عن عنتر ولا شيبوب
زمن الدادا ماما وبابا..لا حبوبة ولا حبوب
ماحضرتو اللعب في القمرة..طول الليل تصول وتجوب
واسع يازمن علمنا..قول اكشفلنا المحجوب
يازمن(البلى استيشن)..الدجتال أو الحاسوب
ايميل ولا انترنت..واليوم كلو في اللابتوب
الفيس بوك مع الماسنجر..وآخر صيحة في اليوتيوب
sms من الموبايل ..حليل زمن الخطاب مكتوب
راح زمن اللبن بالكسرة..وتحلية الفطيرة بالروب
والقراصة كمين بوصة ..تخليك للعصر مكروب
بصلة وشطة بي ليمونة..يسيل عرقك تقول مصبوب
اسع جانا زمن البيرقر..وفيهو تمصر الكاتشوب
وكيفن هي البلد ما بتفقر..اذا جات فيها وجبة حبوب
زمان كان الحليب من امو..والقنانة فوقو تذوب
كان ناقصنا كلو يتمو..كان ماكلنو كان مشروب
اسع جانا(بست)(كابو)..وخلينا الصحن والكوب
بعد صبح الشطر كيس نايلون..مفتوح وبالطرف مثقوب
ليكم حق زمنكم ذاتو..فرق الناس شمال وجنوب
زمنا فيهو ما انطامنا..عدا وطنا كلو حروب
ارجعو لي ورا عيدوهو..عز اجدادكم المسلوب
عيدو الهيبة لى سودانا..ليسلم ما يعيش مرعوب
امرقو من زمن يحتاج..عُمر نوح ومال قارون وصبر أيوب
فنون الصحافة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
التغير شئ حتمى وهنالك من يجتهدون للاصلاح وطرد المتحللون
ماحضرتو اللعب في القمرة..طول الليل تصول وتجوب
واسع يازمن علمنا..قول اكشفلنا المحجوب
يازمن(البلى استيشن)..الدجتال أو الحاسوب
ايميل ولا انترنت..واليوم كلو في اللابتوب
الفيس بوك مع الماسنجر..وآخر صيحة في اليوتيوب
sms من الموبايل ..حليل زمن الخطاب مكتوب
عزيزنا الشاعر المحترم – رفضك للانحلال والتفسخ والتمرد علي التعاليم الدينية واخلاقنا السودانية السمحة كلام جميل لكن مع الاسف انت بترفض كل شي ماقديم – وابواتنا زاتهم الله يرحمهم كان لقو اللابتوب ماكان قعدو يلعبو شليل لي نص الليل وطبعاً ماممكن واحد عندو ايميل او موبايل ارسل ليهو جواب ياخي قول كلام معقول – وجه الشباب لو عرفت الصالح من الطالح ولو ماقادر تفرق مافي داعي للكتابة – شوف قصيدتك دي خلت انجلينا اول مرة تكتب كلام معقول – ومن صورتك الفوق دي انت اتغيرت وما مطابق لي ناس ابوك 100% وريني عمتك ( بكسر العين ) وينها – ولا طاقتك الملونة ! وكمان مستحمي بي بوكيه