ملخص للاحداث بقلم الكوميديان طارق الامين: طيب الولد اب تفه حلقو ليهو؟ لا ياخ، الحلقو ليهو طه!!

الشافع سأل أخوه.. قال ليهو :
★ صحي طه شالوهو من اغاني واغاني؟
★ قال ليهو: لا ياخ داك طه تاني، شالوهو من مكان تاني.
★ قال ليهو:صحي قالو ليهو كان ماحلقت تفه شعرك تاني ماتجي وتعمل فيها معانا؟
★ قال ليهو: لع ، داك محمد، انت ملخبت شديد ياخ!!
★ قال ليهو : محمد دا مش الكديستو ماتت؟
★ قال ليهو: لا ، محمد دا كديستو قاعده لسه الكديستا ماتت ديك لوشي.
★ قال ليهو :طيب محمد دا القال مايكتبوني مسلم في الورق؟
★ قال ليهو :ياخ لاااع داك محمد تاني.
★ قال ليهو:طبب كديسه لوشي دي القبضوها ماشه السعوديه؟
★ قال ليهو:لا طبعا
قلت ليك لوشي دي ام كديسه ميته، ومحمد ابشعرا مابنو، ومحمد ابو ورق داك براهو.
★ قال ليهو: طيب الولد اب تفه حلقو ليهو؟
★قال ليهو لا ياخ، الحلقو ليهو داك طه!!
★ قال ليهو: وطه ده عندو كديسه ؟
★ قاليهو: ياخ ماعارف. ارقد نوم نومك. . بلا يخمك.
(حتين بعدين رقد نام).

ملخص للاحداث بقلم الفنان طارق الامين