كتبت الإعلامية السودانية وخبيرة التجميل والمذيعة بقناة الهلال الفضائية شاهيناز فضل عدد من الحكم والنصائح التي استعانت بها من السوشيال ميديا ونشرتها على حسابها الذي تتابعه محررة موقع النيلين عبر فيسبوك لأصدقائها ومتابعيها على عملاق مواقع التواصل الاجتماعي.
وقالت شاهيناز وفقاً لما قرأت محررة موقع النيلين :في مصطلح أسمه ” kill your darlings ”
او بالعامية الايد البتوجعك اقطعها … يعني مثلاً- لو القميص البتحبه شديد حيأخرك من شغلك لانه عايز مكوة… ما تلبسه!
– لو نوع الأكل البتحبه حيخلي وزنك يزيد او يسبب ليك مشاكل صحية ويتعب جسمك .. ما تأكله!
– لو منتظر مكالة معينه وانت عارف انه المكالمة دي حتعطلك وتسبب ليك الضيق .. ما ترد عليها مهما كانت مهمة
– القصد من الامثلة دي انه في مرحلة ما من حياتك .. او في لحظة ما في حياتك بتوجب عليك انه يكون عندك القدرة عن الاستغنا ، استغناء عن حاجات مهما كنت بتحبها و متعلق بيها او حتى كنت بتفتكر أنك ما بتقدر تعيش بدونها، لأنك ببساطة حتتفاجئ من مقدرة نفسك على العيش بدونها !!!
و أكيد انك ختزعل ، وتمر باعراض الانسحاب في البداية .. ولكن فجأة ح تلقى انك رجعت طبيعي زي ما كنت لكن اقوى وزادت ثقتك بنفسك اكتر واكتر ..
وعليه أعمل طفرة ايجابية في حياتك واستغني عن اكتر حاجات بتحبها وعارف من جواك انها بتؤذيك!
المقصود من الكلام اكيد ما بس قميص او مكالمة او أكل !!
حياتنا مليانة قرارات مصيرية مؤجلة، بنهرب من اننا ناخدها يومياً … بس لمجرد اننا ما قادرين نقنع نفسنا اننا قادرين نعيش بدونها!!!
(بمعنى تاني) في ناس بتوهم نفسك انك محتاج ليهم وبتلقى ليهم أعذار دايما و بتديهم فرص اكتر بس لمتين!!! احيانا ضروري تتخلى عنهم وتجرب تعيش حياتك بشكل طبيعي.
رندا الخفجي _ الخرطوم
النيلين
كيل يور دارلينق .. معناها الايد البتوجعك اقطعها ؟؟؟؟؟؟!!!!!!!!!!!
انجليزى ده يامرسى !!!؟؟؟
لا ياخي.. و دي عرفتيها كيف براكي؟ زول يناولني جايزة نوبل الفي الدرج ده نديها للزولة دي