المرور تفوج المركبات السفرية بمنطقة الباقير

يا مدنية ومجلس عسكري تاني ما عايزين زول يدخل الخرطوم بعد العيد ما لم يبرز بطاقة عمل أو دراسة وبالعدم يبقى عندو خيارين، إما العودة لقريته وزراعة أرضه بالليمون والبرتقال والخضروات والذرة والقطن وحيقرش أو الذهاب لمعسكرات الخدمة الوطنية والتدريب المهني الإلزامي في ولايتو، تاني ما عايزين شباب زي الأسود يبيعوا مناديل ودلايات واعلام وكبابي ويلزوا درداقات منقة وفول ونبق ويسوقوا ركشات ويقعدوا في بنابر الشاي طول اليوم البلد بقت زي صيوان العزا كلها كراسي بلاستيك ويزحموا العاصمة من غير سبب ومن غير سكن لائق ولا مظهر لائق وما عايزين عشرة أولاد يسكنوا في دكان وسط العوائل والأطفال بعيد عن ولاياتهم ولا عايزين 6 ألف فراشين في كل سوق ولا عايزين 500 عنقريب تتأجر في كل سوق للمبيت ولا عايزين آلاف النساء والأطفال الأجانب من غرب قارتنا يشحدوا في الطرق والجوامع والمواقف وجوة المطار وقدام البقالات والصيدليات والمطاعم في قلب الخرطوم ما يفرقوا بين الضيف والمواطن، صحيح العاصمة قومية لكل البلد لكنها منطقة تشكل واجهة البلد ومفروض تكون منطقة إنتاج وعمل وتحضر وانضباط مش عطالة وبطالة وأعمال هامشية ورمتلة، زمان البيجي العاصمة بي سفنجة بينجلد عايزين ده يرجع تاني كمان عايزين ضبط للوجود الأجنبي يا ريس سلفاكير شبابك كلو هنا بيتدمر ويضيع وساكن كعب وماكل كعب وتعب في تعب ومافي داعي للتفاصيل زي ما كتير من شبابنا بيضيع في دول تانية برضو فشوفوا حلول عاجلة لإعادتهم للجنوب دولتهم وأنتم أدرى بحلولكم.. يا ناس الولايات تاني الجايي العاصمة يفكر ألف مرة قبل ما يجي إنو ماشي العاصمة ليه وعايز يصل لي شنو؟.
عايزين نقضي على الحاجات دي كلها بتحقيق السلام والتوزيع العادل للثروة عايزين المناطق الصناعية تتوزع على الولايات والسكة حديد ترجع ومشروع الجزيرة يرجع وسودانير وغزالة جاوزت وغابات جبل مرة وألبان بابنوسة وتعليب كريمة وكناف سنار والمدبغة الحكومية ومصنع النسيج السوداني وكل مناراتنا وعايزين مستشفى دولي في كل ولاية من ولايات السودان عشان مافي زول يموت قبل يصل الخرطوم، عايزين نعيد مع عبد الواحد في سرورونق ومع الحلو في كاودا ونعمل سياحة هناك ومع عقار في جنوب النيل الأزرق وفي طوكر وعقيق والسبلوقة والكاسنجر وكرمة ودوماية وشلال عباس، عايزين سودان نحبوا ونحب ناسو، عايزين مطارات دولية في كل ولاية وفنادق في جبل مرة وأركويت وجبل أوليا وكبوشية وكسلا.. العاصمة فيها شنو غير الغبار والضياع، عايزين جامعات الولايات تبقى عالمية زي جامعات أمريكا مش كل السودان جاي جامعات الخرطوم.. الكلام كتير لكن أملنا كبير في كل كبار البلد وكبار الناس وقصدي السباسيين، كفاية مكايدات وخلافات وللا الزمن بيتجاوزكم زي ما اتجاوز غيركم وحنجيب شباب أفهم منكم ما عندو حزب غير السودان.