شاهد كيف بدأ أسطورة الكرة السودانية في الثمانينات “تنقا” بعد التقاط صورة له اليوم
أعاد رواد مواقع التواصل الاجتماعي، ذكريات امجاد أسطورة الكرة السودانية في الثمانينات، منصور بشير الشهير ب” تنقا”، بعد نشر صورة حديثة التقطت له اليوم الأحد بالخرطوم، بحسب ما نقلت “السوداني الإلكترونية”.
وقال ملتقط الصورة “حسام الدين”جمعتني اجمل صدفه اليوم باللاعب المهذب والمبدع والفلتة منصور بشير تنقا، لاعب الهلال عندما كان الهلال يهز ويرز انه من جيل الأدغال وفريق الابطال نسأل الله أن يمتعه بالصحة والعافية.
وتفاعل مع الصورة الآلاف من رواد مواقع التواصل الاجتماعي، مقترحين تكريمه تقديراً وعرفاناً لما قدم للكرة السودانية وإمتاع جماهيرها.
لعب “تنقا” مع نادي الهلال السوداني وحقق عدة بطولات مع الفريق ووصل معه لنهائيات كأس افريقيا للاندية في العام 1987م.
عُرف ببراعته في الضربات الثابتة، وشكل ثنائي رائع مع زميله الكابتن طارق أحمد آدم، إضافة إلى نجوم الهلال في ذاك الزمان من أمثال، مصطفى النقر وفوزي المرضي، والفقيد شيخ ادريس كباشي، وشوقي عبد العزيز، والديبة وغيرهم من الأبطال.
الخرطوم: أبومهند العيسابي
السوداني
شوقي وفوزي وشيخ ادريس في عمر والد الديبة وليس أقرانه في الفريق ولا النقر ذاتو لكن ممكن تقول حمد والديبة وطارق ويور، ليه الناس بتنسى سريع كده..
ما شاء الله عليك يا تنقا وكل البلد كانت بتهتف بهذا الإسم اللذيذ
أوووو تنقا
تتقا تتقا تنقا
أوووو تنقا
تتقا تتقا تنقا
واتخيلو أن مريخابي وكنت بحضر تمرين الهلال عشان تنقا..
ما شاء الله تتقا هو ذاتو ما اتغير .. إحفظ الله يحفظك.
يبدو أن الكاتب لا علاقة له بكرة القدم.. تنقا أتى بعد النقر وفوزى وشوقى بسنين ضوئية
هلال 87 يور في المرمي مجدي كسلا وطارق والثعلب وتنقا في الدفاع صبحي كندوره منقستو وليد طاشين واسامه الثغر
ياسلااااام ايام الثعلب وكندورة ومجدي مرجان ووليد طاشين والراسية في الاهلي 87 والحكم لاراش ود ام زقدة..والاخوة الاعداء المريخ اظن كان في سكسك وباكمبا وابوعنجة وعاطف القوز.
قطع شك كاتب المقال في الزمن داك كان مدردق ترتار وعجاجو فوق تقول سايق لوري داوودي، عشان كدا ما مجمع كويس.
كلامك صاح يا عبدالله تحية لك ولي وليد زمن الجليل الجميل واحسن مبارة كانت ١٩٦٣شهر يونيو بين الهلال وملوك السامبا فاسكوداجاما فاز الهلال 2/1 هداف الهلال جكسا سبت دودو ، أمين زكي ، اشول ، سمير صالح ، كوارتي ، ديم الصغير ، حبشي ، جكسا ، دريسه ، محجوب الله جابو ، يونس عيسى دي العصر الذهبي لي الهلال /وايضا جيل تنقا يور, أسامة الثغر, عادل العوني, حمد دفع الله, صبحي,مبارك سليمان, جمال الثعلب, وليد طاشين, ابشر النويري
منقستو, جلال كادقلي, طارق أحمد أدم, كندورة, مجدي كسلا جعفر عبدالرازق هلال الثمانينات
لك كل التحايا يا تنقا وربنا يمتعك بالصحة والعافية