فيسبوكمدارات

سوداني يحكي قصة أول علاقة حب في حياته مسرحها فيسبوك.. تفاصيل مثيرة


عملت علاقة حب عن طريق الفيس بوك ولحدي اللحظة دي ندمان عليها وعلي التصرفات الخاطئة الحصلت من غير قصد 😟💔
أول يوم عملت فيسبوك، كنت خاتي في بالي ألفيس دا عبارة عن تعارف أعرف ناس جديده في حياتي، وكنت فاكر ياهم نفس الناس ألفي الشارع، بس أنت ما قادر توقف ليك زول عشان تعرف الإسم والسكن 😟💔
بتزكر مرة رسلت طلب صداقة لبت، كانت خاته صورة شخصية لطفلة ضاحكة وفيها وردة 🌸
ما رسلت ليها طوالي رسالة، عديت كم يوم حتي رسلت ليها، والوقت داك أنا بدرس في الصف الثاني ثانوي، مدرسة الجزيرة اسلانج 🥰❤️
الكلام ده 2011/2012 تحديداً، أها بقي في تعارف بينا، الاسم السكن العمر، مرتبطة وكدا 😕
شلت منها رقم التلفون وبقيت بتصل عليها أقل مكالمة بينا ممكن تكون ساعة أو أكتر، عدت فترة طويلة، وقررنا نرتبط خلاص، رغم أننا ما شفنا بعض ولا عارفين أشكال بعض، بس علاقة حب والسلام 😊🙏
وجات فترة الإجازة، وكنت مبسوط شديييد اننا ح نتلاقه، وهي كانت ساكنه الخرطوم اركويت، كنت بحكي مع أمها واختها وناس البيت عارفين مدى العلاقة البينا، بس للأسف كنت داسي، حكاية إني طالب وبدرس في الصف الثاني ددي 🥈
.
.
أها يوم من الأيام، قررنا نتلاقه في السوق العربي، جنب أستاد الخرطوم من الناحية الغربية نفق جامعة السودان، لأن دي المنطقة الوحيدة الضامن نفسي بعرفها، البت كان إسمه جميل صراحةً والصوت جميل لدرجة ممكن تسرح في الخيال للوصف ❤️❤️❤️
أها اشتريت لي بنطلون وقميص وجزمه اسبورت جديدة، جزمة سودا وقميص كاروهات، وبنطلون أسود فيهو حزام وكم سسته مع الجيب، كان زي البكره عيد بالنسبة لي، نفسياتي عالية شديييد، كنت واقف في شجرة 🌳 فيها ست شاي 🍵 وكل ما تجي بت جميلة اتخيل أنها هي، وكل دقيقه بتصل عليها، وينك، تقول لي قريبه ليك ما بعيده وكل لحظة تمر أنا أتخيل حاجة حلوة، كنت مطمئن البال والقلب، ممكن نقول دي أول علاقة في حياتي كلها ❤️ ❤️ ❤️
أها تلفوني كان اسمو شيطان 👿 ألناس الحضرت الهاتف دا 🥰❤️
البت اتصلت على، وصفت ليها، قالت لي شايفاك، بقيت أتلفت يمين وشمال، بعاين للبت الجميلة، جاتني، بت قصيرة جداً وعندها ضمور تقريباً، ضمور يعني من ذوي الاحتياجات الخاصة بس متحركة بي عصايه ، سألتني أنت أحمد،؟؟؟
عقلي وقلبي ديل وقفو من الضرب دق دق كانو في زول بدق فيهم بحجر، قلت ليها وجسمي دا يرجف، أي نعم 😟😟😟😟💔💔💔💔
قالت لي أنا فلانه، عيوني دي فجأة بقت تكب مويه بدل دموع، وقلبي دا وقف تماماً والله العظيم، ضغطت على نفسي شديييد إني ما أكسر خاطر البت دي وأقعد اعدي إليوم 🚶‍♂️
.
.
قلت ليها نقعد هنا ولا نمشي كافتريا، قالت لي، محل أنت تمشي أنا ما عندي مشكلة 😥😥💔
#كسرة 😥😥😥😥💔💔💔💔
#لقيت_نفسي_بكتب_وشفت_الزمن_فات الساعة 11:23م😳😳😳😳
لو في ناس صاحية ممكن أكمل ليكم القصة دي لأنها طويلة لدرجة ممكن تاني تاخد ساعة عشان إكتب ⌚
اضغط لايك خليني أعرف أنك متابع 🔥
#يتبع 😔😔😔😔
.
.
#نكمل ✍️
مشيت بيها غرب النفق من الناحية الشمالية في نجيله الزمن داك فيها ستات الشاي كتاااار قعدت معاها تحت ضل، ونظرات ألناس ليها كانت وااااضحه صراحة لدرجة في بت و ولد بعاينو لينا وبضحكو أنا بقيت متحسس لدرجة العرق ملاني رجلي داخل الجزمه بقت عبارة عن مويه وضو 😟💔
أول كلمة قالته لي!!! انت مصدوم 😲 طبعاً وكنت فاكرني حاجة ولقيتني حاجة تانية خالص صح؟؟؟
قلت ليها كيف يعني حاجة تانية، ما هو أنتي بشر زي وزي ألناس ألفي الشارع ديل وأنتي احسن منهم لأنك راضيه بحياتك وقسمه ربنا، ❤️❤️❤️
حاولت أجبر بالخاطر ولي أول مرة ❤️❤️❤️❤️
قالت لي احكي ليك كمية التجارب وكمية الخزلان، ولا احكي ليك شنو بالضبط؟؟؟
قالت لي مره واحد زيك كده اتعرف على وحكيت ليهو أني من ذوي الاحتياجات الخاصة، وعندي ضمور وعمري 18 سنة وتشوفني تقول عمري 10 سنة 💔💔💔
وقال لي ما مهم غير حبك لي ❤️❤️❤️
كان فاكر إني بكذب عليهو وما مصدق إني معاقه ♿
ويوم قرر نتلاقه ولما شافني هرب مني، وأنا شايفه جاري عديل 💔💔💔
وبدت تحكي لي عن كمية الخزلان وعن قساوة البشر 😔💔
في اللحظة دي أنا بكيت لدرجة ما قادر اسيطر على نفسي وما عارف اتصرف كيف، أقوم ابقى زيهم افوت أخليها ولا اقعد معاها الفترة دي ولما أرجع أعمل ليك بلوك من الصفحة واغير شريحتي دي، فكرت في ألف حل قلبي وجعني شديييد مجرد ما أتخيل أنها ممكن تحكي عن تجربة علاقتها لبشر تاني وتحكي ليهو وهي مكسوره زي ما بتحكي لي 😔😔😔
حتي ست الشاي كانت بتعاين لي عين استغراب 🤥
ومن نظرة الناس، كيف أنا خالط لي بت زي دي 😔💔
.
.
أخدت قعدتي معاها ومن الحته ديك، مشيت الموقف خليتها قاعدة، جبت لي أمجاد، رغم أني مفلس وما عندي حق الامجاد بس مشيت 😥💔
لما جيت راجع قالت لي افتكرت أنك ما ح تجي راجع تاني 😟
ركبت معاها الامجاد و وصفت ليهو البيت، وصلنا قدام خشم الباب، عمارة كبيييييرة جداً فيها باب كبييير وباب صغير، قالت لي دا بيتنا وأبوي في السعودية 🇸🇦 وأنا وماما وأختي ساكنين هنا وعندي أخوي كبير متزوج وشغال في شركة، نزلت أمها وحلفت إلا أخش البيت، ارتاح شوية 🧠
طلعت معاهم ولي أول مرة أخش عمارة بالشكل دا، كانت حاجة كده قمة المبالغه ❤️❤️❤️❤️❤️
أمها أخدت معاي في الونسه وجات اختها أخدت معاي في الونسه وحسيت بيهم ارتاحو لي شديييد وأنا انسان ولوف شديييد وبتكلم بالفي قلبي في لساني 😊❤️
نزلت منهم قريب للساعة 8:00م طلعت وما عارف أمشي علي وين عشان أعرف الظلط، المهم بقيت بسأل عن الطريق لحدي ما طلعت الظلط ركبت مواصلات الصينية المركزي 🚐
عديت أسبوع وتاني رجعت ليهم ف بقي في ملح وملاح بينا، وبقيت كل ما بلاقي زمن فاضي بمش عليهم بقعد اتونس معاهم كلهم وباخد وبدي في الكلام والمعرفة بقت قوية بينا 🧡
.
كانت بتحكي لي عن كمية الأطفال المحتاجين كراسي للحركة وكمية حبها ليهم وكمية دعمها وتطويرها للأطفال ورفع معنويات الأطفال عشان يواجهون المجتمع رغم القساوة والإحباط، والتنمر، على أصحاب الهمم، بدلاً عن ذوي الاحتياجات الخاصة، وحبها للخير لما تشوف فلان جعان وطفل محتاج 😔💔
عدت على العلاقة دي تحديداً سنة كنت خاشي امتحانات نص السنة، ويوم أمها اتصلت على نص الليل قالت لي البت دي خاشه في حالة ليها يومين واحتمال نسافر بكره أو بعد بكره، ف لو عندك طريقة تعال أصل البيت عشان نودعك 🤥
ما قدرت أمشي ليهم لأن المسافة من الريف الشمالي للعربي ساي دي بتاخد ليها ساعة ونص 💔😥
عدت أيام وانقطع الخبر وبقيت بتصل عليهم التلفونات مقفولة وهي ما خاشه فيسبوك عشان اسأل عنها، عدت تقريباً تلاته شهور مقطوعة الخبر 😔💔
ويوم بالليل جاني إتصال من رقم غريب رديت، مرحبا 👋، قالت لي أنا أسرار أخت فلانه، قلت ليها حمد لله على السلامة، قالت لي فلانه اتوفت يا أحمد 😭😭😭😭💔
وقفلت مني الخط 😥😥😥😥
قدر ما حاولت اسيطر على نفسي ما قدرت وما قادر أصدق وبقي كل كلام دار بيني وبينه في دماغي لافي كأنها معاي 😭💔
انفجرت بالبكاء وما قدرت أنوم دقيقة والله، إليوم داك 😔
#أها_أكمل 😭💔
خشيت في دوامة حزن ما طبيعية نهائي بقت أي كلمة قالتها لي في دماغي وما قادر أشغل دماغي بي أي شيء للأسف أنا كنت ح انفسن ولا اجن عديل لأني في الحقيقة كنت مبسوط بيها جداً وبكميه الإنجاز وكمية دعم الأسرة ليها وكمية حبهم، سمعاً وطاعاً، في أي قرار ليها ❤️❤️❤️
من اليوم داك ولحدي الأن بقيت مستخدم الفيسبوك وكل مواقع التواصل الاجتماعي لخدمة ألناس وتوصيل رسالة التوعية وفقط ❤️🥰
أمها أول داعم لفكرتي و أول يد بدت معاي و أول دعم نفسي ومعنوي قبل الأسرة كانت أمها وحالياً متأكد 99٪ ح تشاهد البوست ده وتبكي قدر ما تقدر، للفراق 😔💔
راعي مشاعر غيرك، وافهم أنو مافي إنسان اختار خلقه ربنا تجي كيف، ربنا زي ما خلقك أنت، خلق غيرك، ومافي إنسان كامل، والكمال لله 😊✍️
بقلم
أحمد نصر الدين _ Ahmed Nasreddin 🙏



‫3 تعليقات

  1. اذاكانت هذه قصة حقيقية فلاشك انها مؤثرة
    اما اذا كانت رواية فجميع عناصر الرواية الادبية واضحة خاصة في التشويق رغم هناك ضعف لايلاحظ في القمةclimax على العموم ككاتب قصصي ليك مستقبل…مزيد من التقدم

  2. والله انت انسان ابن ناس ربنا يوفقك لما فيه الخير يارب العالمين بس عليك الله في داعي كان تقطع قلوبنا اكتر من ما هيه مقطعه

  3. وانا لما اتصلت بيك وقلت ليك عندي ضمور والعلاج ظهر بس ما عندي حق العلاج ما اشتغلت بي ليه ؟
    على العموم جزاك الله خير يا ود الضول

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *