أبرز العناوينرأي ومقالات

الهندي عزالدين: حرب القحاتة مع ربنا .. ليست مع الكيزان ولا مع البرهان


القحاتة ديل .. الله غضبان عليهم … دا غضب إلهي .. ما عندو علاقة بكيزان أو برهان أو حميدتي ..
العساكر كانوا معاهم .. الدولة دانت ليهم تماماً سنتين .. عملوا اي حاجة عاوزين يعملوها .. سجنوا .. صادروا .. قلعوا قروش و بيوت وشركات ناس .. لكن الله عمى بصيرتهم في كل شيء …
العالم كلو معاهم لكن البلد جاعت .. و الرغيفة سبب الثورة بقت ب50 جنيه ، وهي سبب الثورة الأساسب في ديسمبر لما بقت في الولايات ب2 جنيه بس !!
هسه زعماء القبائل ديل لا كيزان .. و لا عندهم شغلة بالكيزان .. انا بعرف عدد كبير منهم معرفة شخصية ..
ناظر الشايقية .. ناظر و عمدة الشنابلة الشتم وجدي الليلة في المنصة .. مقرر شورى الجعليين بتعرفوه .. اتحادي ما كوز .. نظار الجموعية ما كيزان .. انا عشت وسطهم عشر سنوات ..
(ترك) دا زاتو مؤتمر وطني زي ما وزيرة التعليم العالي إنتصار صغيرون مؤتمر وطني .. الاتنين رشحوهم في دوائر المؤتمر الوطني تقديراً لمكانتهم و انتصار رشحتها انتصار ابوناجمة صاحبتها واعتذرت بعدما المؤتمر الوطني اعتمدها ، زي ما حمدوك رشحو دكتور مضوي إبراهيم لقريبو فيصل حسن إبراهيم ، ودعمت ترشيحه للبشير جارتو في أديس أبابا الكوزة أميرة الفاضل .. !!
فالحقيقة انو القحاتة السذج ديل و حمدوكهم الما بعرف غير الخواجات .. استعدوا الناس عليهم دون سبب .. و أبعدوا قطاعات الشعب المؤثرة والفاعلة .. و انفردوا بالسلطة بعددهم البسيط وقدراتهم المحدودة جداً عشان يحكموا بلد عظيمة بتعقيدات لا تنتهي !!
صلاح مناع من نفس قبيلة مناوي ، وكان شغال مع مناوي أيام البشير ، لكنو استبد على مناوي وظن أنه الحاكم العام لجمهورية السودان ورجع ليهو ورق ترشيحات الحركات !!
ناس مناوي حكام لكن اسماً زي ما كانوا زمن المؤتمر الوطني .. الحكم في لجنة التفكيك البترفت وتعيّن ..
رجال الأعمال الصادروهم ديل .. معظمهم كان ممكن يشتغلوا مع القحاتة ..
(ترك مرق) دا .. لو من أول يوم قبل حمدوك الما فاهم حاجة في السودان يعيّن صالح عمار القالوا اريتري دا .. لو حمدوك ناداه في المكتب مع موسى محمد أحمد واداهم قيمتهم كقبيلة وشاورهم في تعيين ولاة الشرق ما كان حصل الحصل .. لكنهم توهموا إنو الشرق ممكن يحكموه أولاد لجان المقاومة زي لجنة الديم والخرطوم ٢ !!
السفراء و الموظفين وضباط الشرطة والجيش الرفتوهم ديل معظمهم كانوا جاهزين يشتغلوا مع حمدوك كمهنيين (Career) ، حتى الكيزان فيهم ، لأنو في أصحاب مهن محددة بصلوا مرحلة وظيفية معينة .. بكبروا فيها على التنظيم والحزب.. والدليل انا بعرف سفراء كيزان اشتغلوا مع حمدوك و العساكر بحرفية عالية و قدموا ليهم خدمات جليلة لمدة سنة كاملة ، جوا رفتوهم عشان الرجل العجوز إبراهيم طه أيوب يفش غبينتو و أحقادو وهو في أرذل العمر .. رفتهم كلهم وخلى الوزارة فاضية من الخبرات .. ومشى باريس !!
وهكذا .. وهكذا .. من أخطاء جات نتيجة غضب رباني وعمى بصيرة .. لأنهم حاربوا الله فحاربهم ..

شوف هسه آخر جلطة دي .. الكيزان قالوا لوجدي قول (الجماعة الفي القصر ديل بشبهوا بعض .. وما بشبهونا) ؟؟؟!
دا انعدام حكمة وفطنة خلتو يبوِّظ كل الشغل الاتعمل في مدني .. الكيزان ما عملوا غير وزعوا كلامو في القروبات !!!
الندوة كانت ناجحة مليون في المية .. العدد ما أقل من ألف شخص ودا حضور كبير لندوة سياسية .. لكن جلطة وجدي خلت النتيجة عكسية ..!!

حربهم دي ليست مع الكيزان .. ولا مع برهان و حميدتي .. دي حرب مع ربنا .. لما ناس رشيد يعقوب منعوا تلاوة القرآن في قاعة الصداقة في كل مناشط ومؤتمرات حمدوك بعلمه ورغبته !!
ولذلك سيفشلون و يفشلون إلى أن يسقطوا .

الهندي عزالدين
نشر بصحيفة المجهر بتاريخ 21 اكتوبر 2021


‫14 تعليقات

  1. عايز اقول ليك بالجد هندي لكن اسحبها احتراما للهنود..
    اذا كانت حربهم مع ربنا خليهم للقوي الأمين وانت خاف الله و استغفر فرحمه ربنا شملت حتي الحيوانات

    1. إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَادًا أَن يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُم مِّنْ خِلَافٍ أَوْ يُنفَوْا مِنَ الْأَرْضِ ۚ ذَٰلِكَ لَهُمْ خِزْيٌ فِي الدُّنْيَا ۖ وَلَهُمْ فِي الْآخِرَةِ عَذَابٌ عَظِيمٌ .
      و قد اخزاهم الله

    2. المسالة الغريبه الغائبه عن معظم الناس بان القحاته كانوا لاجئين للخواجات و كتبوا اكاذيب تضليليه للخواجات ضد البشير و بعد وصلوا ذهبوا كى يصححوا كضبهم وتلفيغهم لشنو لان الملفات وسخوها ودايرين ينضفوها تانى ,الشئ المحير زول عايش اكتر من 20 سنه فى الغرب عمره بقى كم ,وهل بفهم عن السودان شئ .والسوال الجوهرى هو هم كان نجحوا فى الغرب جايين لشنو ,واذا استفادوا من الغرب حاجه خليهم يعملوا لينا حاجه واحده ناجحه من حاجات الخواجات ان شاء الله شارع ظلط ,عجايز ارباب معاشات تبا لكم

  2. حربهم دي ليست مع الكيزان .. ولا مع برهان و حميدتي .. دي حرب مع ربنا .. لما ناس رشيد يعقوب منعوا تلاوة القرآن في قاعة الصداقة في كل مناشط ومؤتمرات حمدوك بعلمه ورغبته !! ولذلك سيفشلون و يفشلون إلى أن يسقطوا .

    عشان بس نتذكر الكلام ده بكرة تبقي زي جلبر تقعد تشطب

  3. والله مع احترامي للحيوانات لكن انت كبيرهم ؛ زمنكم شفنا فيه كل شي سئ وكل كوادركم حرامية نحن م طلعنا عشان الرغيفة يا جعان خليك بتفهم وبعدين انتو نصرتو الدين يعني ؟ الدين م بينصروهو بالكذب والسرقات والقتل

    1. يا علاء الزويل ده قاعد في القاهرة في شقة مفروشة خليهو اليكتب بس عايزك تتذكر ان ما حيعتب مطار الخرطوم . هو الكلام بقروش خليهو اليكتب العايزو

      1. اي واحد يسب ويشتم وتلقى الفاظه بذيئه تعرفو من القحاطه المشكله ماعندهم أدب الحوار والمناقشة المهذبه.فعلا فاقد الشيء لا يعطيه. الانتخابات جايه والإسلاميين شغالين في صمت وح تشوفو المفاجأة اكتساح كامل للساحه طبعا من هسع الحجه الانتخابات مزوره

        1. قلت لي الاسلاميين شغالين !!! يا ربي شغالين شنو !!! انقلابات ! ولا خباسات ! ولا شنو إنت بصدقك إنقلاب 89 كانت إنتخابات ولا ما كنت مولود
          أدب الحوار عندكم بتعرف الطيب سيخة !! بتعرف منو القال شوط تو كل ولا ما تجيبو حي ده الحوار البتعرفوا ليهو يا استاذ ابو هيثم

    2. يا علاء الدين الثورة سببها الخبز نسيت ولا شنو م تسمع ثورة ديسمبر المجيدة وهلمجر ثورة رغيف ,بعد داك نطوا فيها فشلة وعطالة اوربا وعجايزها ,تبا لاكلين الربا

  4. هذا حيوان
    ما زالوا يكذبون ويتاجرون بالدين
    أنا لست تابع لقحت
    وهو يقول القحاتة حربهم مع الله وليست مع الكيزان والبرهان
    مفتكر انهم هم الله يعني كل ما فعل بهم هو حرب مع الله
    قاتلكم الله أنى تؤفكون
    فإنه أساء للشعب واعتبر الشعب خرج عشان رغيفة فعلا انه يتغابى عن الاسباب الحقيقية
    هو مفروض يشكر الحكومة المدنية والحرية لأنها لو كانت كتكوته حكومة الحرامية القتلة ما كان كتب كلامه هذا وإلا ادخل بيوت الاشباح أو اغتيل
    فعلا انهم تجار دين
    ابسط شئ البشير وإخوانه واغلب الكيزان مليارديرات من أين أتوا بهذه القروش مع أنهم كانوا يبيتون القوى
    حرامية
    الكيزان انا اعرفهم منذ أن كانوا طلابا كانوا مثال الأمانة والخلق الطيب والتدين ولكن لما اجتمعت السلطة مع أموال الدولة نسوا الله والدين والآخرة
    فكان قولهم قول مسلمين وفعلهم فعل شياطين
    دا ما قولي دا قول الترابي قال نحن علمناهم على الامانة في لشياء بسيطة ولكن ما كان تحت ليديهم من اموال أكبر من وعائهم
    فندق وهو كذوب

  5. نتمنى من القحاطة والشباب منهم بالذات أن يقرؤوا مقال الأستاذ الهندى عزالدين وعليهم أن يقرؤوا ذلك المقال مره ومرتين وبل ثلاثه حتى يفهموا من هي أحزاب قحط ومن هو ذلك المدعوا بحمدوك ذلك الفاشل واللذى أدخل السودان وشعبه فى جحر ضب بفشله وعجزه وخيباته وضعف شخصيته حيث سيطرت عليه أحزاب عصابة 4 طويله وأصبحت تُسيره كما تريد وتُنفذ من خلاله برامجها الإجرامية والإرهابية فى إذلال شعب السودان وتجويعه ومحاولة تركيعه لتنفيذ أجندة الشيوعيين والبعثيين والناصريين والجمهوريين ومؤتمرجية الدقير وما يُسمى بالتجمع الإتحادى الوهمى وتابعهم الذليل حزب الأمة تلك الأجندة الخبيثة والتى لا تشبه السودان وشعبه ودينه وأخلاقه وثقافته وأعرافه … لقد حاول هؤلاء الخبثاء أن يجروا السودان وشعبه إلى أُتون العلمانية القذره دون تفويض من الشعب السودانى ودون مشاورته فى أمر يخص الشعب لوحده وليس تلك الأحزاب الكرتونية المجهريه والتى لا قواعد شعبيه لها وحتى حزب الأمة تدحرج حتى وصل لمرتبة الشيوعيين والبعثيين والناصريين وخاصةً بعد وفاة المرحوم الصادق واللذى كان هو حزب الأمة وحزب الأمة كان هو الصادق المهدى وعند دفن جثمان المرحوم الصادق تم دفن حزب الأمة معه ولم يعد هناك شيء إسمه حزب الأمة واللذى عرفه الناس من قبل بالإضافة لإنشقاق حزب الأمة لــ6 أحزاب صغيره لا تقدم ولا تؤخر … حاولت تلك الأحزاب والتى حكمت سنتين حاولت وبشتى الصُور أن تحكم السودان بواسطة تمديد الفترات الإنتقالية هروباً من الإستحقاق الإنتخابى حيث أقام هؤلاء نظام حكم مدنى شمولى دكتاتورى لم يسبق له مثيل وإستغل هؤلاء تلك اللجنة السياسية وغير القانونية والمُمسماة بلجنة تمكين قحط لإرهاب الشعب السودانى وتخويفه وإخضاعه بالقوة الجبريه حيث أصبحت تلك اللجنة الإرهابية حكومة داخل الحكومة وأصبحت هي الحكم والخصم والجلاد فى وقت واحد بينما يتفرج حمدوك على كل اللذى يجرى وهو ضارب طناش وكأنه لا يسمع ولا يرى … وبعد كل هذا الذى عرفه الناس عن ذلك المدعوا بحمدوك نرى البعض وبالذات البرهان يحاولون عبثاً لإستعادة حمدوك ليكون رئيس لثالث حكومة فى السودان وخلال أقل من 3 سنوات حيث أفشل حمدوك حكومتي الفترة الإنتقالية الأولى ثم الثانية ويريد الآن العودة من جديد كرئيس للوزراء ليواصل مسلسله القديم الجديد فى الفشل وكأن حواء السودان لم ولن تلد غيره لِيواصل مسلسل الفشل والعجز والخيبة من جديد وكأن السودان وشعبه حقل تجارب للفاشلين والعاجزين ولو تم لحمدوك ما يريد فستكون تلك إعادة إنتاج للفشل من جديد وسيدور السودان وشعبه فى حلقه مُفرغه لا يعلم إلا الله مدى خطورة إرجاع هذا الفاشل لمنصبه من جديد ورغماً عن أنوف الشعب السودانى واللذى أذاقه حمدوك ولعامين الحنظل وجلب لهم الجوع والفقر والمرض والجهل والغلاء غير المسبوق وعدم الأمن والأمان والفوضى والإنحلال وتفسخ الأُسر وضياع الأخلاق وسط الشباب وحتى الأطفال لم يسلموا من ذلك الخبيث واللذى أدخل للسودان ثقافه الفجور والعصيان والإنحلال وعدم إحترام الصغير للكبير فى ظاهره لم يشهد لها السودان مثيلاً منذ سقوط الدولة المهدية !!!

  6. كلام يوجع القحاطة
    ،،،،، باعهم حمدوك وهم خايفين ،،،، ربنا يسلط عليهم من يقيم عليهم العدل والقصاص

  7. انتا جاي حسي تحاسب القحاته المفروض كان تحاسب كيزانك زمان بدل ما تقعد تطبل ليهم لمن كان بسوق الناس للحرب في الجنوب باسم الجهاد ووقعتو معاهم اتفاقبة السلام والجنوب انفصل بالبترول الطلعتوه انتو ليهم ولمن ضيقو على الناس عيشتهم وكان بشربونا الشي بالبلح سكر ما لاقينو ولمن كانو بياكلو قروش الشعب في بطونهم وكانو بيقولو هي لله انتا كنتا وين من دا كلو …. على العموم جاء الوقت نحاسبكم فيه على العملتوه في البلد قبل ما نحاسب القحاته

  8. الغريب فى الامر كل الكيزان يرفضون عودة حمدوك يمكنك فتح قناة طيبة تسمع العجب كل من هب ودبة دكتور وبروفسير وصحفى يكلوا السباب لهذا الرجل عاوزين نعرف السبب شنو …افتكر لا يريدون نجاح اى حكومة لهذا الشعب