ثقافة وفنون
قصيدة للبيقاوي : يَــــا مُتَظَــــاهِر.. عَمِّــــقْ فَـهَـــمَك *** سِير في مَسِــيرتَك… خَافِـقْ عَلَــمَك
بِدُيْمُقْــرَاطِية.. حقيـــقـــية.. ودَسْتـُــــور وَاعِد *** يَجُوز تَطْوِيرو أو تَغيِــيرو في أُسْبُوع وَاحِد
بِلَا تَحــدِيد.. في نَاسْ بِتْكَـابِر.. ونَاس بِتْـــعَانِد *** ونَاس في شَبَــابْنَا وَفِي أَحْزَابْنَــا دِيمَة تْسَـانِد
تَــدَاوُلْ سِلْـمِي..وتَطْوِيرْ عِلْمِى.. وحُكْمَاً رَاشِد *** وقَبـْــلَ المُــدَّة نَـعِــدْ العُــــدَّة وَنَخْتَــار قــايد
لا لِلْعُنْــفْ.. نَعَـــم لِلْصَّــفْ الوَطَنِـي.. الوَاحِد *** لا تَــدْمِيـــر بَــلْ تَعْمِيـــر بِأَقْــــوَى سَـــوَاعِد
######
زُولِــي الــــرَّاقِي.. فِي ذُوقَـــــكْ.. وَفَهَـــمَك *** أَرْفَـــــــعْ رَاسَــــــكْ… وَانْظُــــــرْ عَلَمَــــك
رَمْــــزِ بَسَالْتَــــكْ… وَصَبْــــــرَك وَشَمَــمَك *** رَفْـــرَفْ عَالِـي.. فِى العَـلَالِي.. وَبَرَّ بِقَسَمَك
يَا بَلَـــدْ.. مَا تْخَـــلِّي مُشَرَّدْ.. يَشْعِلْ حِمَــمَك *** سَكِّتْ جُوعُو.. ضَوِّي شُمُوعُو..أَبْذُل كَرَمَك
فَاقِدَ تَرْبَوِى.. حَاقِد تَعْبَوِي.. هُمْ مَنْ رَجَـمَك *** أَبْقَــى عَليهُم.. كٍــدَا وَعِّيــهُمْ.. وَخَفِّـفْ أَلَمَك
######
يا كَاتِبَـــنَا.. طَـلِّعْ وَرَقَــَك.. حَــرِّكْ قَلَــمَك *** ويا شَاعِـرْنَا.. وَيَا مُهَنْدِسْنَا.. قَــدِّمْ سَهَـمَك
لَــو مَظْــلُــومْ.. قُـــولْ مِيــــنَ.. الظَّلَـــمَك *** وَقِّـــفْ شُغْـــلَــكْ.. رَفَـــــدَكْ… حَــــرَمَك
يا تَاجِـرْنَا.. سِيبْ تَطْفِيفَكْ.. أَتْـرُك نَهَــمَك *** خَلْ تَخْزِينَك..فِي دَكَاكِينَك زَيـتَك.. فَحَـمَك
بَقِّي شِعَارَكْ خَفْضْ أَسْعَارَك بَطِّلْ جَحَمَك *** تَلْقَي زَبُونَك..سَدَّ دِيوُنَكْ..جَـاكْ وَاحْتَرَمَـك
######
يَا مُــــزَارِعْـــنَا.. قُـــومْ سُــــوقْ بَهَــمَك *** شُــــوفْ مَزْرَعْـــتَك.. ضَــانَك وَغَنَــمَك
أَشْـــرَب لَبَــــنَك.. وَنَجِّــــضْ لَحَـــمَـــك *** وَاحْــمِـــدْ رَبَــــكْ.. بَسَـــطَــك وَرَحَــمَك
يا سَمْـــسَـارنا.. أَلْـــــبَسْ عِــــــمَـــــمَك *** طَـــهِّـرْ قَــلْبَــــكْ… بَـــــرِيءْ ذِمَـــــمَـك
حَــــلِّلْ قِرْشَــــكْ… وَأْحْــذَر وَهَــــمَــك *** أَوعَـي تَكَـــذِّبْ… وَتَحْـــصِدْ نَـــــدَمَــــك
######
يَا دِكُتورْنَا..يا مَسْتُورنَا.. إيـه اللَّـــخَمَك *** عَنْ عَيَّانَك..عَن مِسْكِينَك؟ رَبَّك رَحَمَك!
يا فنَّـــانَّا..دَنـْــدِن عُودَكْ.. غَـرِّدْ نَغَـمَك *** عَنْ وَطَنِيتَك..عَن حُرِّيتَك.. فَنَّك فَهَـمَك
يَا جُنـدِينَا يَا شُرْطِـينَا.. بِــرْ بي قَسَمَـك *** يَا أَمْنِينَا.. دَيلْ إِخْوَانَك..ما تْفِـكْ سَهَمَك
أيّ زُولْ.. إِتْلَقَي مَكْتُول..كَاتلُو عَشَــمَك *** لَو جَيَّاشِي.. أَو شَمَّاشِي.. هُولَـك زلمَك
######
يَا مَعْــــرُوفْــــنَا…. إيه الهَــــــــــدَمَك *** وَمِـــنْ أَخْــــــلَاقْنَا.. شَــالَك خَصَمَك
تَـــمْشِي المَسْــــجِد.. يَسْـرِقُو جِـــزَمَك *** وُجُـــوّه السُّـــوقْ مُوبَـايلَك وَرَقَـــمَك
يَا مُـــوَظَّفْـــنَا.. إيـــهْ بـــس فَهَــــمَك *** عـن تأخــــيرك… ونعســــة قلـــــمك
النَّـاسْ مُنْتَــــظْرَه.. ومَـاهُـــمْ خَدَمَــك *** لَو مَــا بْتَخْــــدِمُ.. أَحْــــسَنْ عَـــدَمَـك
######
يَا مَشْـــرُوعْــنَا.. رَبَّــــــنَا رَسَـــــمَك *** إيـه العَـرْقـَلْ… سَــيرَكْ وَخَــرَمَك
سَعيــتْ لِلــــحَقْ.. والخَــــير بِقَــدَمَك *** مُـــنَايَا أُشُــوفَك… مَـــوْلَاي خَتَمَك
يَا مُتــــعَلِّـــمْ… حَــــارِب بَلَــــــــمَك *** إِنْـــتَ مُثَـــــقَّفْ..ورَبَّـــك عَصَـمَك
نَوَّرْ عَقْـــــلَك.. عَالَـــــجْ صَمَــــمَك *** قُـــودْ مُجْتَمَــعَك.. وَاسْــبُقْ أًمَــــمَك
######
يَــــا مُتَظَــــاهِر.. عَمِّــــقْ فَـهَـــمَك *** سِير في مَسِــيرتَك… خَافِـقْ عَلَــمَك
بُـــوحْ بِقَضِـــيــتَك… عَـلّي لِهِـمَـمَك *** أَرْفَــــع صَـــوتَك…. زَوِّدْ زَخَـــمَك
نُـقْــــطَة دَمَّــك ..رُوحَـك وَلَحَـمَــك *** سِـــرْ حُــرِّيــتَك.. وَعِــزَّك وَكَرَمَـك
بِسِلِمِـيتَك وانْسَانـِيتَك رَبَّــنَا رَحَـمَــك *** بِرُجُوعْ دَعْمَـــــكْ حَقٍّــــقْ عَشَـمَــك
######
يَا مُخَــــرِّبْ.. أَمْـــنَــك إتَهــَمَــك *** بَي تَـدْمٍيـرَك..ِخَـــيرَك وِنِعَـــمَك
نحو إِخْــوَانَك.. طَــايِش سَهَــمَك *** والقــَانُــونْ.. قَبـضَــكْ وَاسْتَلــَمَك
وإِنْتَ مُشَرَّدْ.. جُوعَكْ وسَقَــمَــك *** صَادَر صَبْرَك.. أَكَلـــَك هَضَـمَك
عَــدَم المِـهْـــنَة.. وَقِـــلَّة فَهَـــمَك *** جَابْ تخريــبَك خَزَلـَك.. هَـزَمَـك
######
يَا قَاضِيــــنَا.. شَبَــاب قِدَّامَــك *** جُـــوكْ تَدِّيهُم..فَحْوَي كَلَامَـك
عَاوْزِين فَتْوَي.. تَحِلْ حُكَّامَـك *** مِنْ شَرْ أَمْنَكْ.. وفَتْــكِ نِظَامَك
شًّــرْطَة مَلِيشْيَا .. سِرْ وَأَمَامَك *** بِالحُـــرِّيَّة.. وَكُـــلْ ظُـلَّامَــك
حُكْــماً عَــادْل..عِـزْ إِسْــلَامَك *** بِـرْ لِنَبِـــيكَ.. الهَـادِي إِمَــامَك
تأليف المهندس/ إبراهيم عيسى البَيْقَاوى.. سبتمبر 2013م
الأخ المهندس بيقاوي
هنيئا لك بهذا التفاؤل الذي تمتلئ به روحك حتى ليكاد يفيض من بين جوانبها
وقد عبرت عنه أبياتك القوية
أما أنا فلي شأن آخر
تشاؤم يقهره الأمل وتفاؤل يزاحمه اليأس ودائما يصطرعان في نفسي ولربما تعبر عن ذلك هذه المنظومة :
أخويا … ولد وطني
أملو كبير وراجي الخير..
قول ليا يا أخويا ؟
[B]حصل ذقت لبن الطير[/B]؟!
رضعتو أنت صغير؟
لاقاك وأنت كبير؟
قول ليا بالله
وين هن دلايل الخير؟
من الماضي ؟
ماضينا كلو مرير
من الحاضر ؟
حاضرنا رهين
في أيادي الغير
ومستقبلاً مجهوووول
ما باين ليهو مصير
لو قلت لي ليه التشاؤم دة ؟
أنت براك عاين وشوف
البلد حاكماها ظروف
تلف وتلف وعليها تطوف
زي ليلاً عتم وظلامو كثيف
وعشعش فوقنا ضل الخوف
نقول بلوعة الملهوف
الصبح يجينا متين ؟
والله حقيقي ما معــــروف
وبرضو عاين شوف !!
قادتنا لسه متحــــــاربين
مرو سنين وجايانا سنين
وبرضو القادة متناحرين
كل واحد…..
شايف أنو ياهو الحق !
والباقي غلطانيييييين !!
عامن مر وبعده تمر كم أعوام
وتباعد بيننا الأيام
وتدمى جراحنا بالآلام
وتشقى نفوسنا بالأوهام
ودايماً هنااااك واقفين
ما في خطوة لي قدام
خطواتنا ….
ديمة عليها مرتدة
بعييييدة …
مد البصر ممتدة
وااسفي وياحسرة وياعبرة
كل يوم لي ورا … وراجعييين
ومختلفين
ومتكاتلين
سنين وسنين
ساخطين وقرفانبن
بس لمتين ؟ وبس لمتين ؟
خلااااص ما بقى عندي كلام
كل واحدن حر …
راضي أو غضبان
مؤمل أو قنـــعان
صاحي أو حلمان
يحلم متل مايريد…
هي الأحلام بقروش ؟ !
أحلم كمان وكمان
ياااأخويا …. يا العشمان
يرجع لك متل ماكان
بلدن رفيع الشان
بس بذكرك يا أخوي
لو صابك النسيان
المثل بيقول :
عز البحر تمساح
وعز الخيل لجم
وعز الحريم وليان
أزيد عليهو وأقول :
عز الشعوب أوطان
وماتنسوا ياأخوان
عز الشعوب أوطان
عز الشعوب أوطان
وطني ياهو يا السودان
نفسي مسكونة بالسودان
وروحي تعشق السودان
عز الشعوب أوطان
وعزي فيك يا سودان
قبري في تراب بلدي
وبلدي ياهو ده السودان