سياسية
البشير يجري عملية جراحية في مفصل الركبة الاخرى
وقال السكرتير الصحفي لرئيس الجمهورية عماد سيداحمد إن رئيس الجمهورية خضع لاجراء العملية لتغيير مفصل الركبة اليسرى من ذات الفريق الطبي السوداني الذي يقوده دكتور شرف الدين الجزولي والدكتور طارق حسن بمستشفي رويال كير. ولفت إلى البشير سيبقي في فترة نقاهة أخرى طبقاً لما يقرره الاطباء ومنوهاً الى أن الرئيس كان قد باشر عمله كالمعتاد خلال الفترة الفاصلة بين العمليتين في الشهرين الماضيين بعد أن قضى فترة نقاهة لعدة ايام .
ونقل سيد أحمد تطمينات عن الفريق الطبي تأكيدات بنجاح العملية.
وتشير متابعات (سوداناس) إلى أن الرئيس البشير أجرى عملية ناجحة في مفصل الركبة اليمنى في الحادي عشر من شهر مايو الماضي.
المصدر – سوداناس
[/SIZE][/JUSTIFY]
انا ماعارف الريس دا ركبو دي انسهكت في شنووووو ؟
الف سلامة ليك يا مدلعنا يا مشخلعنا يا الاكلتنا الهوت دوغ والبيتزا
غيرو ليهو جوز ركب وبلالى ومقصات ومساعدات ، لكن ياعمك الزينة دي دايره شغل معلم سااالط عشان يظبطها لانو فيها تلاليش كدة أجارك الله
****
هو بي ركبه المكسرات ديل
ركب في ضهرنا ٢٥سنه
تركبوا ليهو ركب يابانيه يحكمنا
الي ,,,ما يبعثون لا حولا ولا قوه الا بالله.
فضل يزرع شعرو زي روني
يا ريس كتر من الكوارع ركبك بقن فاضيات
خايف لو اتمنيت ليك الشفاء المعلقين يشاكلوني
لكن احتياطا كدة ربنا يشفي كل مرضى المسلمين
الموضوع لا يعدو كونه دعاية لمستشفى رويال كير الفاشل ويبدو ان للرئيس او اقاربه اسهم فيه لان الرئيس مرضه في حلقومه ويقال سرطان والله اعلم وفي خطابه الاخير كان صوته مقروش
لقد رأينا كيف رقص مجموعة من الرقصات وفرنب في احداها وقفز عاليا ايام مسرحية هجليج ولواء الردع ؛)
او انهم اجروا له جراحة خطيرة في ذمته والركبة للتغطية والغتغتة التى هي شيمة الحكومة منذ جائت يكذبون في كل شيئ بسبب وبدون سبب
او ان الرئيس ينتوي اللعب في الهلال واخذ خانة هيثم ولذلك توجب صيانة وعمرة ركبتيه الاثنتين معا واستبدالهما بركبتين يابانيتين اصليتين
بعد شوية حنلقى حاكمنا الروبوت الياباني masimo
شكله كده عايز يسجل في الهلال وامبارح كان مجتمع مع الكاردينال وقال لي انا بغير ركبتي التانية لكن تلعبوني راس حربة الكاردينال قال لي ماعندك اي مشكلة ماحتكون ياريس اسوء كتير من اللعيبة العندنا
هو بالله عليك دي ايام يسووا فيها عمليات ركب ياخي ما ممكن أمال البحوم يتفقد الرعية منو يا راعي وبعدين هو عندو اجازة سنوية مرتين في السنة واللا شنو
ما هماه أمرنا .. جعنا .. أتشردنا .. فقدنا بيوتنا وأهلنا ..
وما بيهمنا أمره .. يعمل عملية .. يمرض يشفى يموت ..
–
كل واحد في حاله ..
انا قايلة كان خليت الرقيص والنطيط الكتير اخير
[SIZE=5]والله يار ريس ما عارفين ندعوا ليك ولا ندعو عليك ما ناقصين كفااااااااايه[/SIZE]
طهور لا بأس عليك … ربنا يشفيك شفاءاً لا سقم بعده.
ربنا يقومك بالسلامة ياريس وماتشوف شر بإذن الله
[SIZE=5][COLOR=#FF000F]يا (نصيحنجي)مفروض تتأدب شوية، عشان فارق السن علي الأقل. دا عسكري مظلات، يعنى كان بينط من الطيارة وينزل واقف علي كرعيه، الوقافي دي بيسيح ركب الناس (الموية) اللي زيك كدا، وانت لمن تصل عمره دا ح يدخلوك في مراكز العجزة الشغال فيها نضافة دي !![/COLOR][/SIZE]
الف لا بأس عليك ان شاءالله ربنا يكتب ليك السلامة ياريس
يعنى بعد كده الريس ده حايشيل عصايتو دى ويسكنا ولا كيف ولاحايدينابالشلوت بدل ما نحنا ماخدين بالجزمة
قصيدة جديدة
( رُكبة ) سيدي
شعر : هاشم صديق
يا خلف الله
ود عبدالله
بص ( الثورة )
مابي يدوِّر
كان ( إستارتر )
أو منفلّة
كوركنا ننادي
هوي يا شباب
هوي يا رْجال
هوي يا حريم
هوي يا شوارع
هوي يا نيم
يا وِلاد البادية
ياوِلاد النيل
يا شعب أكتوبر
يا شعب أبريل
تعالوا ( النفرة )
لزوا معانا
بص الثورة
إنشاءالله يقوم
لو وصَّلنا
لباب القصر
( حتي النصر )
في الخرطوم
وهُتافنا فطر
ما سخسخ
يصوم
وبلّ حبالو
وللحلقوم .
………….
يا خلف الله
يا ناس الحِلة
يا أهل الله
لمتين راجين
ناس ديك
أو ديل
في ( شليل )
و ( الحِجْلَة )
لمتين
( حيص بيص )
لمتين الجوع
لمتين الذِلّة ؟! .
…………..
يا خلف الله
البلد إتهرست
داسا السيل
جانا الوالي
عيونو حُمر
( حلب الباقة )
( في الشُنقاقة )
صنقع ودنقر
دوّر ولفّ
إتمّهل وفكّر
إتنحنح وصرّح
– ما مطرة شديدة
دي ( النقناقة )
وباقي الموية
وحتي السيل
من ( أوباما )
وإسرائيل .
والموت يا جماعة
– ومن ما قمنا –
ياهو مهمة
عزرائيل .
……………
آخ خ خ .. يا مهازل
لا زعلنا وشلنا
جناب الوالي
عديل طوالي
مرمغنا رويسو
جوه الطين
لاثُرنا هتفنا
يسقط يسقط
الغش بالدين .
…………..
يا خلف الله
بعد ما باعوا
بلدنا وخيرها
باعوا ( العون )
شالوا الخيمة
ولبن البدرة
وصلصة برة
والمكرونة
وشوربة ماجي
وعجوة مكة
وعِلب التونة
وصابون فونا
والمعجون .
شالو العون
بالحاويات
وبالكرتون .
………….
نفس الخمشة
الحول الفايت
بالكربون .
…………
حاجه نفيسة
بيتها إتماص
الجوع بكّاها
جاها الوالي
كريم أهداها
بس تلفون
وللبطن الطامة
كمان أداها
فص ( ليمون) .
……………
يا خلف الله
ود عبدالله
بص الثورة
لا داير يدَوّر
كان ( إستارتر )
أو منفلة .
جانا ( الصادق )
قال إنتظروا
لسه ( الأزمة )
بتغلي وتنضج ؟!
جوه الصاج
وجا ( أبو هاشم )
وقال يا رعية
بفاتحة قوية
( الإنقاذ ) دي
بتمرق بالنفاج
وجا ( أبوعيسي )
قال ( لينين )
حيسخت ( بشبش )
إبقي كديسة
وجانا ( ترابي )
قال يا ناس
بحوار ( الوثبة )
الزول دا حيقعد
زي ( موقابي ).
………..
يا خلف الله
ود عبدالله
ربع القرن
ونحنا رهاين
جوه الكُبّة
ومن فات الغازي
والمستعمر
ما شفنا فكي
تحت القُبة
نثور ونفور
نجيب ( الريس )
نقول يتحبا .
ويجينا الخير
ما ياكلو الطير .
لكن يا خسااااره
أحلامنا تموت
ينضرب الشارع
وبالنبوت
زرعنا يضيع
وعشمنا رضيع
وما نحصد حبة .
………….
ويتلِّب طاغية
يحرمنا العافية
ونبقي رهاين
لافانا الكُبّة
عسكر وكاكي
مهازل ورتبة.
…………..
( بشبش ) ينقّز
( بشبش ) يعرض
( بشبش ) يرقص
لامن بالغ
وحلج الرُكبة .
………….
ربع القرن
والأُمة في كُبّة
ياخلف الله
ود عبدالله .
لا فُرنا وثُرنا
بلعنا أسفنا .
والطاغية خنقنا
قاعد آمن
سمين مُطامِن
لامن سوّس
وبدل رُكبة .
……….
يا شعب أكتوبر
شعب أبريل
أولاد البادية
أولاد النيل
بص الثورة
داير لزّة
عرش الطاغية
عايز هزّة
خرطوم الوالي
السيل دكّاها
وصبحت ( غزة )
الشعب جعان
لابيت لا أمان
وناس السُلطة
سيلهم ويسكي
وكافيارهم مزة .
………….
ياخلف الله
ود عبدالله
بص ( الثورة )
مابي يدوّر
كان ( إستارتر )
أو منفِلة
كوركنا ننادي
هوي يا رجال
هوي ياحريم
هوي يا شوارع
هوي يانيم
ياوِلاد البادية
يا وِلاد أكتوبر
يا شعب أبريل
تعالوا ( النفرة )
لِزوا معانا
بص الثورة .