اسقف علي كده
طبعا كلنا عارفين طرفة المغترب الطلب من اخوانو يسقفوا علي كده
لما البنيان وصل البيم الاول
مرتو في الاجازة الا نزلت البلد بدهب صيني
صييييينيييييي
ركزوا في صيني دي شوية كده
الدهب الصيني في مرة دفعت حياتها ثمنا للبسه
الكلام ده جابتو صفحات الجريمة
لبست دهب كميات ومرقت تتبوبر
في اتنين شافوها وشافوا الدهب يلمع
كانوا فاكرنو اصلي
الاصلي في البلد ده يا مختوم يا مريخ
غير كده بيبقي صيني
فو هونغ ساي
هسي كبي ده عاوز ليه جوهرة والا حجّاز
خنق الود خنقة عدوك
لو قشاه ضفر يعني يطلع سكينو
ناس الجودة مفروض يعملوا حسابهم
ما يدخلوا حاجات اي كلام
حاكم في حاجات من الصين بتجي الاسواق بتشتغل في التجربة بس
ممكن تشتري مسدس في العيد لولدك يشتغل في المحل الاشتريت منو بس
تاني لو الهلال جاب بطولة خارجية هو ما يشتغل
طبعا ناس مزمل لقوا الشركة متخصصة في مستلزمات الاطفال
كان مفروض الكاردينال يمشي لشركة متخصصة في مستلزمات الابطال
لكن برضو ما بطّال
مستلزمات الاطفال دي فيها غشاشات
زي وعود كردنة
الغشاشة بركبوها في خشم الطفل الببكي
فيها حلمة بلاستيك
الشافع يمص ولبن ما يجي
جماهير الهلال الكاردينال ركب ليها غشاشة
قال ليهم الشركة اتنازلت لينا عن 4000 مليون دولار
ليه دي شركة ولاّ جمال الوالي
البتنازل في البلد دي جمال الوالي بس
وللمريخ
الله يعافيه
لكن الجوهرة الزرقاء دي ما كلمونا بتم متين
والتلاتة ارباع بتجي من وين
ما تبقي زي المدينة الرياضية
الهلال ده حارة عليه يكون منتظر حاجتين وما يتمن
بطولة من برة واستاد زي القلعة الحمراء
خلوهم علي البطولة عليكم الله
لكن الهلال لو استعان بالاتحاد العام بتمها ليه
الاتحاد ده لو رئيسو العم شبشة ما بيكون بحب الهلال كده
ديل بحبو هيثم مصطفي علشان كان لاعب للهلال
زمان غرموا قلق في حاجة بسيطة قدر دية القاتل
هيثم مصطفي طلعوه براءة
حبيب العدلي طلع برأة
يلا محدش واخد منها حاجة
انتوا الكاردينال ده كان طلع براءة زمان والا ادين
لانه في مساجلة مع صلاح ادريس قال كنت صغير
ليه اصغر من الود بتاع الرديف
الخنقو كبي
جابوه فزعة طلع خنقة
الكاردينال ذاتو طلع خنقة
لو الهلال ده هدم سورو بيقعد في السهلة
صدقوني ماممكن
كان مفروض يعمل الاستاد في الصالحة
علي الاقل يكون الاستاد القديم قاعد
ما يلحقوا استاد الموردة
ناس الموردة النجيلة ابت تقوم والفريق هبط
الكاردينال ده بلعبكم في (فو ليق) بالطريقة دي
لا لاستجلاب الغشاشة
الغشاشة زي الفلاشة
بودي الهلال ده في داهية
بلحقهم ملاوي
……
اكد غارزيتو جاهزية فريقه لتجاوز كابو الانغولي
وقال انه يخشي من رئيس نادي كابو لا مهاجميه
والرسالة واضحة
لو كان الامر متعلقا بالهلال لتدخل مجدي شمس الدين
