صدق أو لا تصدق.. في السودان: البنزين والجازولين أرخص من الشاي والقهوة
قام بعض رواد مواقع التواصل الاجتماعي في السودان بإجراء حسابات دقيقة خرجوا منها بمعلومة قد تبدو غريبة جداً.
المعلومة التي قام الرواد بإجراء حسابات لها أثبتت أن وقود السيارات البنزين والجازولين أرخص من الشاي والقهوة واللذان يعدان من المشروبات الساخنة المرغوبة جداً في السودان.
وقد رصد محرر النيلين الحسابات التي قام بإجرائها الناشط علي إحدى قروبات مواقع التواصل الزبير عثمان الذي قال:
لتر البنزين ب4.6 جنيه … يعني الجالون ب 21 جنيه والناس داقا جرس و بتقول البنزين ده غالي !!
طيب كدي تعالوا نحسب …..
كباية الشاي السادة بــ 5 جنيه في شارع النيل … والكبايه بتشيل 125 ملليمتر … وبما انو ال 125 ملليمتر بــ 5جنيه إذا الملليمتر الواحد من الشاي السادة ب 0.04 قرش
وكلنا عارفين انو اللتر فيهو 1000 ملليمتر … إذا اللتر الواحد من الشاي السادة يساوي 0.04 * 1000 =40 جنيه … إذا جالون الشاي السادة ب 180 جنيه
وعليه ومما سبق نجد أن تكلفه لتر البنزين يساوي 4.6 جنيه و تكلفة لتر الشاي السادة تساوي 40 جنيه
وبتطبيق الحسابات السابقة للقهوة نجد أن لتر القهوة يساوي 60 جنيه … أما شاي اللبن ده سيبوهوا ساااي بقع بي 80 جنيه اللتر مع الحسابات دي.
يا الله كم انتا رخيص ايها البنزين.
ياسين الشيخ _ الخرطوم
النيلين
هوووووووووووووي ما تفتحوا عيون الحكومة على ستات الشاي
وهى الحكومة داير ليها زول يفتح عيونا . . هى مفتحة لما غلط
كلامك صاح يا ابو همام
كلامك صاح يا ابو همام
الشاي والجَبنه في بيوتاتنا قاعدات .. بس ياريت لو يرخصو اسعار البنزين و الجاز عشان الغلابه البياكلو عيش من مركباتهم التجاريه
سواء كانت ركشه او تكسي او هايس او حافله .
هل هذا البحث تمهيد لما بعده؟
لماذا لا نقول:إن الشلي والقهوة أغلى من البنزين والجازولين؟
صياغة الخبر”بالمقلوب” تنبئ عن شيئ ما،ربنا يستر.
هل هذا البحث تمهيد لما بعده؟
لماذا لا نقول:إن الشاي والقهوة أغلى من البنزين والجازولين؟
صياغة الخبر”بالمقلوب” تنبئ عن شيئ ما،ربنا يستر.
البنزين بدور العربيه والشاي بدور مخ الانسان ده لو عنده مخ
يا زووول هوي ما بحسبوها كدا انت في اليوم قاعد الا ماش كما شريت الشاي ما ضروري لكن من الضروري ان تمش مكان عملك او تمشي تزور اهلك في كردفان مثلا اقرب شي بعربيتك الخاصة عاوز ليك 1000 جنيه بنزين حتي توصلك مدينة الابيض او ركبت البص انت مثلا وعائلتك عاوز ليك 2000 جنية دا كلو عشان البنزين غالي يا غالي انت وممكن لمن تصل ما تشرب شاي لان ما ضروري لكن البنزين غصب عنك
ده حساب غلط ..
تكفيني في اليوم ثلاث كبايات شاي و قيمتها 15 جنية و كميتها 125 مم × 3 = 375 مم = 0.375 لتر
يلزم لسيارتي للذهاب للشغل و العودة بدون أي مشاوير جانبية جالون و بعض الناس جالونين أقل تقدير 5 لترات × 4.6 ج = 23 ج
أيهما أرخص
في تقديري في السودان الأنسان هو الأرخص
(في تقديري في السودان الأنسان هو الأرخص)
دة ملخص الحال في السودان
مستوى دخل الفرد متدني جداً
لذلك ببساطة ورغم أنه رخيص جداً بالنسبة للمغترب إلا أنه غالي جداً بالنسبة للمقيم في السودان على حسب متوسط الدخل في اليوم
ففي أمريكا اللتر بـ 70 سنت ومتوسط دخل الفرد في السنة هو 50 الف دولار
وفي السودان معلوم ما هو متوسط دخل الفرد
المسالة نسبية
اما بخصوص مقارنتة بالشاي لا مقارنة خصوصا تاثير المكان ( شارع النيل ) على السلعة لان سعره في الاماكن العامة يختلف