عالمية

فيديو.. السيسي: فى كل حتة فيكى يامصر أنا بلاقى فيها أمور مش مظبوطة بس أنا مش عاوز أزعل المصريين


السيسى: كلنا مسئولون عن دماء أى مصرى”..ونواجه 50 سنة من التردى
الرئيس لـ”الألتراس”: شاركوا فى الاطلاع على ما تم إنجازه..
ليس لدينا أسرار لا أضيق على الشباب و”عارف إنى هاخد وقت لايجاد الثقة المتبادلة”
الرئيس عن الزيادة السكانية:”مش هينفع نمشى بيها كده”
السيسى عن رسام الكاريكاتير إسلام جاويش: “والله ما زعلان منه ولا من غيره”

وجه الرئيس المصري عبد الفتاح السيسى، مجموعة من الرسائل للشباب والألتراس، مطالباً إياهم بالمشاركة فى لجنة لبحث ملف “مذبحة بورسعيد”، مؤكداً أن ما يحدث الآن تداعيات 50 عاماً مضت من التردى، مشيراً إلى أن مصر كادت تنهار عام 2011، وكانت “أشلاء دولة”. وقال الرئيس، فى مداخلة هاتيفة مع الإعلامى عمرو أديب، ببرنامج “القاهرة اليوم” المذاع عبر فضائية “اليوم”،: “عمرى مازعلت من حد، وممكن ازعل على حالنا اللى بقى كدا”، مضيفاً: “ماخدناش بالنا من تعليق أحمد شوبيرعلى ظهورالألتراس.. المفروض كنا ناخد بالنا منها..لكن ماخدناش بالنا”. “كلنا مسئولون عن دماء أى مصرى”

وأكد الرئيس السيسى، أن الجميع مسئول عن دماء المصريين، قائلا:” كلنا مسئولون عن دماء أى مصرى، مشددا على ضرورة ألا يفكر الألتراس فى إخوته ببورسعيد فقط، وإنما جميع المصريين فى كل مكان”، مضيفاً أن لديه أمل كبير فى أن الله سيكون عونا للمصريين، قائلا:”بلدنا فوق الخيال، وعندى أمل كبير فى ربنا إن هيساعدنا، وهنعبر وهنبقى حاجة جميلة، وبكرة هتشوفوا العجب والتقدم اللى ربنا سبحانه وتعالى هيساعدنا عليه، لأن كل النوايا شريفة وآمنة، لأجل خاطر الناس الغلابة اللى فى مصر”.

السيسى: مايحدث الآن تداعيات 50 عاماً مضت..ومصر كانت أشلاء دولة عام 2011 وقال الرئيس، “فى كل حتة فيكى يامصر أنا بلاقى فيها أمور مش مظبوطة بس أنا مش عاوز أزعل المصريين واخليهم يشيلوا الهم “، مضيفاً: “البلد كانت بتنهار فى 2011، عارفين يعنى أيه بتنهار، يعنى بقايا دولة، انتوا عايشين جواها بس مش عارفين يعنى إيه دولة بجد بكل ما تحملة الدولة.. فضلت تتساب وتتساب، وبالمناسبة مش من 30 سنة عشان تكونوا عارفين..البلد دى اتسابت 50 سنة..وهذه تداعيات 50 سنة، منذ 67 حتى اليوم ..كانت أشلاء دولة فى 2011، وكادت تنهار تماما لولا ستر ربنا.. والآن نحاول إعادة بنائها مرة أخرى”.

السيسى لـ”الألتراس”: شاركوا فى الاطلاع على ما تم إنجازه.. ليس لدينا أسرار ودعا الرئيس عبد الفتاح السيسى، الألتراس للمشاركة فى لجنة مشكلة من جديد بكل موضوعية للإطلاع على ما تم إنجازه من قبل، مضيفاً : “شوفوا انتوا كمان عاوزين تعملوا إيه.. حققوا فى الموضوع..لا يوجد لدينا أسرار، ولكن فى حالة العدد الكبير ممكن تضيع حقائق كتير ولو حد ولع فى المدرج ده وحصل حاجة كانت ستخرج شائعات كثيرة”. وأضاف: “فى التجمعات الكبيرة من البشر يصعب الوصول إلى حقائق وهذا حدث كثيراً عام 2011 فى أحداث محمد محمود وماسبيرو والمجمع وأشياء كثيرة”، مستطرداً:”وسط الجمهور الكبير كثير من الحقائق تضيع والصورة التى نراها غير التفاصيل..هناك دول عرفت تفاصيل أعمال تعود لسنة 1967 قريبا”. لا أضيق على الشباب و”عارف إنى هاخد وقت لايجاد الثقة المتبادلة”

وأكد الرئيس السيسى، أنه لم “يضق” أبدًا بأبناء مصر، قائلا:”أنا عندى أولادى وعمرى ما ضقت بيهم فلماذ سأضيق بأبناء مصر!”، مضيفاً: “إحنا اللى مش عارفين نتواصل معاهم ومش عارفين نوجد مساحات تفاهم..ببذل جهد كبير فى هذا المجال، وعارف إنى هاخد وقت حتى نوجد حالة الثقة المتبادلة.. أنا أثق فيهم لكن يجب أن يثقوا فيما نقدمه لصالح مصر سياسيا واجتماعيا وأمنيا واقتصاديا هدفه كبير وهم جزء من هذا الهدف”.

واستنكر الرئيس السيسى، ما يتردد عن تضييقه على الشباب، قائلا:”هضيق إزاى عليهم. بمد إيدى فى كل حتة فى مصر وبلاقى حاجات لم يبذل فيها جهد..لكن هناك الكثير من الأمور التى لم تنجز فى السنوات الماضية مما أدى لما نحن نشاهده الآن”. وشدد على أن النقد الموجه ينقصه الكثير من المعلومات، لندرك إذا ما كانت القرارات الصادرة مناسبة أو غير ذلك. السيسى لـ”عمرو أديب”:” الفقراء عمرى كله.. وماحدش يوصينى عليهم”

ورفض الرئيس وصية الإعلامي عمرو أديب له عن الفقراء، قائلاً: “ماتقوليش على الفقراء.. دول عمرى كله على دول.. عمرى كله على الغلابة”|، موضحاً :”أقبل منك بتوصية حقوق الإنسان لكن لن أقبل بتوصيك لى عن الفقراء، لأن التوازن بين الإجراءت الأمنية وحقوق الإنسان أمر حساس وبحاجة لمتابعة دقيقة، أما الفقراء ماتقوليش عليهم…دا عمرى كله على دول..عمرى كله على الغلابة”. الرئيس السيسى عن الزيادة السكانية:”مش هينفع نمشى بيها كده”

وأوضح السيسى، أن الدولة كان لها شكل فى الفترة من 2011 إلى 30 يونيو، ومنذ 30 يونيو حتى الآن لها شكل آخر، مضيفا:”شوفوا تدرجها عامل إزاى، وكنت أتمنى إن حد يقول للناس إحنا الزيادة السكانية بتاعتنا دى مش هينفع نمشى بيها كده”،

مضيفاً: “كل حتة فيكى يا مصر ببص عليها وبحط إيدى عليها، ألاقيها مليانة، بس أنا مش عاوز أزعلكوا يا مصريين”، مشددا على أنه يكافح على قدر استطاعته هو ومن يعمل معه من أجل الدولة، داعيا الله عز وجل أن يعينه على إنقاذ مصر. الرئيس يدعو شباب الألتراس للمشاركة فى لجنة لبحث ملف “مذبحة بورسعيد”

وعلق الرئيس عبد الفتاح السيسى، على أحداث “مذبحة بورسعيد”،: قائلا:”أنا كنت موجود فى الموضوع ده، ومفيش حاجة تقدر تقول إيه اللى حصل، وبدقة تقدر تقول إنك تطمئن لها”، متسائلاً “حد خبا حاجة .. ممكن، وحد مش عارف حاجة برضو؟.. ممكن”، وممكن مجموعة من الألتراس تتشكل بيهم ومعاهم لجنة لبحث الموضوع، أصله مفيش حاجة عاوزين نخبيها”.

السيسى عن رسام الكاريكاتير إسلام جاويش: “والله ما زعلان منه ولا من غيره” وعلق الرئيس عبد الفتاح السيسى، على الأزمة الأخيرة مع رسام الكاريكاتير إسلام جاويش، بسبب الرسوم المسيئة له، بقوله “أنا والله ما بزعل من حد”، ومفيش حاجة اسمها بشر على قلب رجل واحد، ودى ما اتعملتش مع الأنبياء، وأنا والله ما زعلان من جاويش ولا من غيره”.

وتابع الرئيس، : “أنا رضيت على نفسى أتولى المسئولية دية، يبقى لازم أتحمل تبعاتها كلها”، مشيرا إلى أن ما يحدث حاليا بالدولة مسار طبيعى لدولة كانت فى حالة ثورة منذ 4 سنوات، لاسيما أن الأمور لم تستقر حتى الآن، “لسة الأمور ما اترتبتش، وما انضبطناش”، موضحاً: “إذا كانت الأمور بالدولة تسير بشكل متصاعد، فيتبين أننا نسير على الطريق السليم”.

السيسى: نواجه 50 سنة من التردى ورد الرئيس،
على سؤال الإعلامية رانيا بدوى حول التعليم، قائلاً: “يجب اتخاذ الخطوات بعد التأكد أنها مبنية على استراتجية واضحة بآليات وقدرات موارد موجودة”، مضيفاً :”لدينا مشكلة كبيرة فى كل المناحى، لأن تلك المشاكل تركت لسنوات طويلة، مما تسبب هذا الحجم من التردى الذى اتصل ببعضه فى التعليم والصناعة والزراعة وأشياء كثيرة جداً”.

واختتم الرئيس مداخلته، قائلاً :”لحل هذه المسائل.. لدينا هدف واحد وهو أن الدول دى ما تقعش أكتر من كدا..تثبت وتقف وتستقر وتتطور..الموضوع كبيراً جداً وبحاجة للحديث 10 سنوات، لتعلموا الفكرة جاية من أيه، ولا أقلل من أحد ولما أقول 50 سنة من التردى يبقى العدالة والإنصاف يقولوا إن اللى وقع فى 50 سنة يتعالج فى 50 سنة، لكننا ما بنعملش كدا وهتشوفوا وأؤكد لكم ذلك.. وإن شاء الله ربنا يقدرنا بيكم وبكل المصريين”.

كتب إبراهيم حسان – محسن البديوى
اليوم السابع
https://youtu.be/vqrWKaz9KRY


تعليق واحد