أبرز العناوينسياسية

السودان .. حميدتي يفجرها داوية ويكشف عن أسرار صادمة


فاجأ نائب المجلس العسكري الانتقالي الفريق أول محمد حمدان حميدتي الرأي العام السوداني بكشفه عن أسرار مدوية، تتعلق بشركات كبرى كانت تابعة للنظام أفصحت عن نفسها قائلة انهم كانوا مأمورين وسيعيدون أموالها للدولة، بحسب ما نقل محرر “كوش نيوز”.

وقال “حميدتي” اننا كمجلس عاهدنا الرئيس المعزول عمر البشير، أن يكون في الإقامة الجبرية إلا أنه خلف العهد، بعد ان قبضنا عنده مبالغ مهربة قدرها ٧ مليون يورو بالاضافة الى ٣٥٠ ألف دولار، بعدها رأينا أن يكون في كوبر.

وذكر أنه سبق أن قال لهم عايزين تحكموا .. المؤتمر الوطني حزب رائد عايز يحكم جيبو القروش السرقتوها القروش كلها طلعتوها بره جيبوها واحكموا تعالوا ندفع كفاية البلد لسنتين واحكموا بدل نشحد، لكن تلبدو القروش بره وعايزين الناس يكافحوا ليكم الكلام دا ما ببقى.

وأردف حميدتي في تسجيل مصور بحسب “كوش نيوز” ان الاخوان من الاسلاميين في المجلس ماقصروا وافقوا على التغيير وان كانوا مجبورين.

واردف حميدتي قائلا: برضو الناس تكون عارفه نحن اول ماتم التغيير خطينا خطوات، اول حاجة أمنا احتياجات الناس في السودان، والحكاية دي مستمرين فيها من بدري نحن لحدي اليوم دافعين لوزارة المالية وبنك السودان كدعم سريع مليار و٢٧ مليون دولار بالاثبات والورق موجود، بمافيها الاحتياجات القبل يومين من مشتقات بترولية ودواء وقمح واحتياجات مطبعة العملة. والتي سبق ان دفعت فيها للزبير ١٠ مليون دولار، سألته المطبعة عايزة كم عشان تشتغل قال ١٠ مليون دولار دفعتها ولم يتم اصلاحها.

واضاف : المصيبة التانية اليوم الليلة دي كشفنا حساب لرئاسة الجمهورية، والحساب دا ما اتحرك من ٢٠١٦ وجدنا فيه من السودان ١٤٢.٨٠٠ مليار جنيه سوداني، و٣١٥ مليون ريال ماتعادل ٨٥ مليون دولار، دا حساب مجنب منسي. وعشان الناس تكون عارفه البلد دي مقسمه كيمان واي زول ماسكلو كوم، وقد وردنا كل هذه المبالغ والقبلها في بنك السودان.

وعرف “حميدتي” على سجيته البدوية التي تتسم بالصراحة و الشفافية وعدم الكتمان، والأيام القادمة حبلى بكشفه عن المزيد من المفاجأت.
(كوش نيوز)


‫9 تعليقات

  1. دي كلها فكه وبرضو الحمد للله عليها

    عايزين المليارات الناس كلها اتكلمت عنها وجابتها بالحته ف مالزيا تركيا قكر الامارات تركيا وووووووو
    التحرك السريع جدا جدا جدا
    لانها ممكن تغسل او تحول او تصرف

  2. طيب انت كدعم سريع جبت القروش دي من وين؟
    طبعا من جبل عانر اللي هو حق الشعب
    يا حميدتي شغلانيتك دي بوديم انت زاتك كوبر و ما تغرك بكاسيك دي لو تم توزيع طبنجات و كلاشنات على شباب ام بدة بس او الحاجيوسف بس ببيدوكم

    1. اوريك ياسيدي حميدتي جاب القروش من وين
      الزول دا ورئيس المجلس الإنتقالي هم تجار
      المرتزقة لحرب اليمن ولهم نصيب مستقطع
      من دخل الجندي يُوخذ لصالح الدعم السريع
      عشان كدا عمال بطال الزول يذكركم بحرب
      اليمن واننا سنظل فى هذه المعركة التي هي فرع
      من فروع صفقة القرن لمصلحة اليهود

  3. سيبوا الفلسفه الفارغه والراجل طالما بقى بيسدد للدوله ومستعد يسدد اكتر الزموا حدودكم وهو بيعرف يتصرف مع الكيزان …خلوهو يقلع واحفظوا الجميل …الزول قال ليكم كلوا بالورق واظنوا جاهز للحساب

  4. كثرت تصريحات حميدتي وفي كل الأحوال دي محاولة لتلميع الصورة.
    انت زاتك ياعزيزي عندك شركة تحتكر جبال معادن في الغرب……من لك هذا؟ ؟ لو ماسرقة أو رشوة من الحكومة السابقة يبقي همبته وبلطجة ولا فرق بينها وبين السرقة والرشوة.
    اديها صنة واختفي شوية وخفف التصريحات الصحفية

  5. شكلك يا الصادق ولا أظن أنك صادق عندك تصفيه حسابات مع حميدتي ولكنك خايف لا تستطيع أن تعلق أو أن تقول شيئا سوي نقل تصريحات السيد حميدتي كما هي ودون لبس ..
    الحمدالله الإنقاذ كشفت لنا الوجه القبيح للمتسلقين
    امثالك انت والهندي عزالدين فمهما تقل ومهما تكتب لا يوجد من يصدقك اتمني أن تجد وظيفة أخري غير التي انت فيها الآن
    فانت تعلم جيدا لقد تم فرضك كي تمثل الشرفاء من صحفيي السودان وانت لا تجيد شيئا سوي تطبيلك لنظام القهر والظلم و الفساد
    والسرقة والنفاق كانك لم تكن تعرف شيئا من
    فساد وقتل و نهب الإنقاذ اتمني أن تجد وظيفة
    أخري أو تعيش باقي عمرك معزولا بمال السحت
    الذي جنيته من أولياء نعمتك والشعب يعرف جيدا
    تمثيلتك مدفوعة الأجر مقدما من قناة الجزيرة
    وانت ترتدي ثوب الوطنيه و تتصدي لاعلام
    السيسي وكل ذلك مقبوض الثمن من دولة قطر للتصفيه حسابات وليس عملا وطنيا كما تدعي

  6. التحية لقائد الدعم السريع الفريق اول محمد حمدان دقلو ، هذا الرجل صادق وعفيف وواضح وشجاع ، كل المليارات من الدولارات التي دفعها بسخاء من تلقاء نفسه كفيلة لنزاهته وصفاء نيته تجاه وطنه اذا كان شخص غيره لما دفع كل هذه المبالغ لانه غير ملزم بدفعها ومن الاولي له ان يستثمرها في اي دولة اجنبية كما فعل كل اغنياء بلادي بمافيهم الرئيس المخلوع فيا اخوتي من الاولي ان يدفع حميدتي هذه المبالغ الضخمة ولا البشير وحاشيته ؟ ارجو من الجميع انصاف هذا الرجل العفيف ، والله لو فعل كل شخص كمافعل حميدتي لاصبح السودام جنة الله في الارض .

  7. يا ناس هووووووي . اني اري شجرا يسير . هناك قوي اقليمية لن تسمح بقيام ديمقراطية في السودان . وقد اجهضت عدد من ثورات الشعوب بتوظيف المال وصناعة ابطال وهميين . التلميع الذي يتم لحميتي هذه الايام يدل علي انه حفتر المرحلة القادمة . الا هل بلغت .. اللهم فاشهد . دا اذا كان الموقع رضي ينشر الرسالة