تعرف على سبب رفض الراحل محمود ارتداء (الملابس الباهظة الثمن) ..!
أرفق الشاب محمد صديق أحد مؤسسي مجموعة محمود في القلب وأقمار الضواحي بوستاً على صفحته بموقع فيس بوك كشف خلاله عن سبب زهد الراحل محمود عبد العزيز في نعيم الدنيا، ورفضه إرتداء الملابس الباهظة الثمن، وكتب صديق عبر صفحته المتابعة: (بما أني الليلة فاقد محمود عبدالعزيز ربنا يرحمو ويغفر ليهو جداً ومشتاق ليهو جدا…ً
عاوز أحكي ليكم قدر شنو محمود ربنا يرحمو كان بحب الناس وبهموهو أكتر من همو لي نفسو.. في يوم جيت ليهو البيت بعد صلاة المغرب كالعادة ونسة وبزيانوس علي فيسبوك الساعة عملت 9 إلا عشرة مساء .. قال هوي أرح طالعين نحن.. كان سايق البوكس الطيب لبن وكان موجود حسن البليك .. المهم مشينا سوق بحري بوتيك ملابس واحد اسمو عدلان دكانو مقاصد سوق خضار بحري اسمو برشلونة… محمود ربنا يرحمو كورك ليهو جاب لي محمود ربنا يرحمو كيس فيهو بنطلون قماش أسود وقميص أبيض بي أسود…
المهم الملابس الجديدة دفع فيها 180 جنيهاً. اتكوت ومحمود ربنا يرحمو ويغفر ليهو غير وبرغم الحاجة الما قاسة ولا شيء طلع في قمة الأناقة وكان شغال حفلة في الثورة أمدرمان وكانت حفلة خيالية جداً … المهم خلصت الحفلة ورجعنا المزاد والحاج ربنا يرحمو ويغفر ليهو مبسوط قمت عكرت ليهو مزاجو بسؤال انت ي حاج لي م مهتمي بي نفسك في صحتك ولبسك… باستغراب عاين لي قال لي قلته كدة لي شنو… قلت ليه عشان قبيل انت عندك حفلة وم مجهز ليها لبس… قلت ليه اسي ناس شريف الفحيل واولاد الصادق الواحد بجهز لبستو من وقت حفلتو تنتهي للتانية…
ربنا يرحمو ضحك وقال لي حاقول ليك كلام م مفروض اقولو ليك … انتو بتحبوني شديد واي شيء اعملو انتوا بتعملوا لما البس بدلة بي 10 ملايين الحواتة حيلبسوها من وين .. لمن اعمل تذكرتي بـ 100جنيه الناس حتخش كيف وسكت.. ربنا يرحمو ويغفر ليهو بكيت من غير احس أقسم بالله).
صحيفة السوداني
