رأي ومقالاتأبرز العناوين

الحكومة جوعتكم وطبقت عليكم نظرية الصدمة وحولتكم لشحاذين ومتسولين بقروشكم.. افسد نظام مر على السودان


الحكومة دي عندها مشكلة في الأولويات .. شالت المبالغ المخصصة للقمح والخبز و الدواء لثلاثة شهور ودفعتها لأمريكا بلا طائل .. وخلقت أزمة خبز غير مسبوقة في القرن الواحد عشرين ..

الليلة نحن قاعدين في بلد دربات ملح ما فيها .. اصحاب الامراض المزمنة محرومين من علاج الضغط و السكر و الأزمة و الحساسيات .. بل الناس في نهاية خريف و السودان مليان بالباعوض و انت لا يمكن تجد علاج ملاريا .. الناس بتتفقع بالحمى النزفية في الشمالية و الحكومة بتدفع ليها ٢٠ مليون دولار فنادق و نثريات و خمور في جوبا ..
الحكومة بتدفع ليها تذاكر لأكثر من ٥٠٠ شخص قيمة التذكرة ١٤٤ الف جنيه غير الخمسمية غرفة في الفنادق و الوجبات و نثريات توت .. عشان يمشو يرقصو ليهم رقصة رقصتين و يغنوا مع الفرقة الموسيقية .. عشان يغطو على التحالف السياسي الدارفوي التم في جوبا .. و بعد ذلك أول يرجعوا يسلموا حركات الكفاح المسلح ١٠٠ مليون دولار (حارة) ..
قاعدين في بلد الناس بتشيل (عجين ني ) من فرط يأسها و قنعها ..
الحكومة دي حولت الشعب لمتسولين و محرومين ..
عندي صديق استاذ جامعي و دكتور و من الأشخاص المبرزين بيركب المواصلات الشحيحة و بيكابد الأمرين عشان يقدر يحاضر في الجامعة .. أساتذة الجامعات ديل ترحيل ما عندهم .. و الأن اعلنوا عن اضراب لأنهم ما استلموا مرتباتهم ليهم شهر و نص ..
خليك عارف أنه في نفس اللحظة الحكومة دفعت ٥٠ مليون دولار لشركة الجنيد نظير تنازلها عن مربع دهب .. لجنة وجدي و المافيا المعاها ما بتتجرأ تدخل تشوف المربعات دي أمتلكتها شركة حمدان دقلو ده كيفن .. بل أنها الليلة حتدفع ليها مبلغ من المال على مربعات ملك للدولة اصلآ .. و لا في أي شخص بيتكلم ..
النظام ده افسد نظام مر على السودان .. ما تقول لي لا لا .. حأقول ليك حمدوك رفع الدعم عن دولار الدواء و شاف بعيونو الأزمة دي كل يوم بتكبر يحدي ما وصلنا النقطة دي .. ما تقول لي ما عارف أمجد فريد ده كل الأشخاص و الاجسام المهتمة بالموضوع و المشتغلة فيه بلغتو و ناقشتو و هو بدورو بلغ حمدوك .. الراجل ده اشرف على خلق اكبر ازمة دواء في تاريخ السودان ..
الحكومة دي جوعتكم و صادرت حقكم في الكلام .. و طبقت عليكم نظرية الصدمة الأقتصادية .. و حولتكم لشحاذين و متسولين بقروشكم .. و ما زالت بتمكن في ناسها و في حزبييها .. و ما زالت بتمارس النفاق بالترويج لفيديو مطاعنات بين حميدتي و مدني و الحقيقة ان حميدتي هو اس البلاوي و رأس الأزمة و هو من يجب أن يذهب و فورا ..
#وهكذا

عبد الرحمن عمسيب



‫6 تعليقات

  1. و الله ما ندمان على حاجة الا انو طاوعت اولادي في البيت و طلعت معاهم زي الاهبل تسقط بس تسقط بس. الليلة لا قادر اكسيهم و لا اعلمهم و لا حتى اوكلهم رغيف حاف.
    و الله بعد كده اسمع واحد يقول شكراً حمدوك الا اندمو على حياتو.

  2. ههههههههههههههه .. عندما تتحدث العاهرة عن الشرف.

    مافي أوسخ من الكيزان حتى ولو متنا من الجوع. ياخي انتي لعبتوا بالدين.

    والله تشموا قدحة ويسمكم يا بطالة تاني ما بترجعوا وحتفضلوا منبوذين من المجتمع مهما يحصل.

    قوم لف يا عاطل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *