زواج سوداناس

وداد درويش: انا لست خائنة ولا عميلة لجهاز الامن والمخابرات



شارك الموضوع :

سلام عليكم ورحمه الله الأعزاء والأعداء.. العزيزات والعدوات،،
سانتهج منشور مختلف هنا وأتحدث عن (وداد) ليس كسابق نهج في الكتابة وتبادل الأفكار، اسمحو لي مشكورين…
وأقسم بالله ليس لكسب شهرة عبر مجتمع الفيسبوك هنا ولكن لانه طفح الكيل وأستئت جدا جدا جدا من الصمت لأكثر من سنتين مع العلم باني اسمع واعرف كل شئ وكل فارغ حديث ومشين في حقي وسمعتي ولكني لثقتي الدائمة العظيقة في نفسي لم أحرك ساكنا او انبش حوارات او اشجع صديق/ة يلمح بذلك ولايدري كيف يناقشي واعين الاحباب تعبر وتفيض ألما ولكني دوما عن عمد أبتسم وأختصر الطريق عن اني افهم وانا بخير وأعلم ما يفعلون وماذا أريد…

باختصار… تدور أحاديث و( قوالات) عن أني متهمة بالتخابر واني اتبع لجهاز أمن الدولة ذات المؤسسه التي فرقتني عن أسرتي وذات الدولة التي ( طلعت ميتين ابو اهلي) باحتمالي السجن والاعتقال والتعرض ل ( كشف العذرية) بكامل المهانه في 2012 وكانني……

ذات جهاز امن الدولة الذي ينضم اليه بعض ابناء نهر النيل الذين هم اقربائي وارتضيت ان لا اذهب المناسبات واجامل لاني احاربهم من علي رأس الدولة،،، ذات المخابرات التي احتجزت اوراقي في اعتقال سبتمبر الآخير وانا راجعه من الجامعه لالتقي شباب قرفنا وهي التي تثبت انه يحق لي استخراج شهادة تفاصيل جزئيه من جامعه جوبا كلية الموارد ( للعلم شخصي الضعيف لم يكمل البكلاريوس حتي هذه اللحظة نسبه لفصلي فصلا سياسيا من الجامعه عقب احداث حريق ج جوبا الشهير وكنا 12،، 11 طالب وشخصي الضعيف، ونسبه لاننا اعضاء لجنه سداسية للتفاوض مع مدير الجامعه لاستعادة الاتحاد)، وذات جهاز الأمن الذي ارغمني علي التعاون معه وان لم اوافق سيغتال شخصيتي،
ما دعاني لقول كل ذلك :::

تمت اضافتي لقروب واتساب فقط من اجل التسلية والمرح.. وتم الترحاب بي والسلامات وجدت انني اعرف بعضهم وذكروني بانهم كانو يزوروني في سجن النساء امدرمان ايام المحاكمة بسبب الاتهام بالتظاهر ومس سيادة الدولة كحركة قرفنا، مايهم كان ذلك من ثلاثة ايام مضت وفي هذا المساء وجدت انه تم حذفي لم اسال ولم اهتم.. مشكورا الشخص الذي ارسل رقمي للاضافة وضح لي انه دار حوار مع الآدمن وهو (أكتشف) أنك تتبعي لجهاز الأمن والتخابر لصالحه ضد بعض جهات المعارضة الوطنية. ولذلك هو لا يسمح بوجود ( أمنجيه) حتي في مساحة للفرفشة والونسة، وبعد ان دافع عن بشدة وعن معرفته القديمة لي تمت ازالته ايضا، مافعلته شكرته وتأسفت.

وقررت أن اكتب عن نفسي هنا ولكل من يري أنني خائنه واتبع لجهاز أمن عمر البشير فليحذف صداقتي ودربنا غير موحد ( له فكره ولي فكري)، تساءل الكثيرون والكثيرات عن لماذا عادت وداد للوطن وهي كانت مطاردة وتعذبت كثيرا وملفها مع الأمن يمكن أذيتها في أي لحظة،،

عندما لم يجدوا الإجابه لانهم لم يسألوني مباشرة قررو ان يجيبوا انفسهم (لانها تتبع للكيزان ورجعت عشان تشتت شمل المعارضة وتفكك الأحزاب وتدمر الحركات الشبابية) ،، لست ملزمة بالتبرير لرجوعي ولكن لأحبتي أقول ( انا رجعت عشان امي بتبكي الليل والنهار لظروف مرضي في القاهرة وابي يلتزم الصمت والشرود وهما يظنان انهم ما حيشوفوني تاني للأبد وقررو يجوني مصر لو ماجيت.. انا قطعت العلاج ورجعت عشان ربنا بسألني عنهم ورضاهو في رضاهم، وعشان الظروف صعبة غالبا ما كان ح يقدرو يجوني هم .. فجيت ورجعت دا اول الاسباب..

ثانيا لاني تعبت في ال 6 شهور غربة فقدت تفاصيل بيتنا البسيط حلتنا لمة الناس في اتني ستات الشاي واتالمت هناك كتير لولا الجميلين القليلين حولي هنا منهم خالد عبدالله الشخص العزيز جدا والغالي علي وساعدني في الكتير وآخرين..) أكتب وهذا كتقرير عني.. واوجهه لكل مناضل/ة و سياسي/ة في هذا البلد انه ان كنت لا تري انني افيد لكل تحياتي وان تنأي عن طريقي فأنا لي أصدقاء وأحباب مضاعفة بعدد من يكرهوني وهم اعداء لي واعلم ذلك بان من لم يكن له أعداء فليراجع نفسه وهو غير ناجح وغير جدير ( يختوهو في راسهم) ،،

اقول قولي هذا (وانا زولة عادية وبسيطة لابعد حد تتوقعوهو واحب الحياة واحب الناس وما بحب احرج الناس وسكاتي الكتير وامشي الحاجات وافتراض النية السليمة في الناس ومعاماتهم بالشايفاهو جواي ضيعتني كتير وخسرت حاجات كتيرة من عمري وحياتي… اول التضحيات باني مفترض امش بعد دعوة امريكا شهر سبعه دا ابدا دراسة في جامعه بامريكا بعد الكورسات القريتها في الامريكية في القاهرة ولكن ما مشيت لانو المجتمع الحولي رافض امشي وترضية ليهم اتنازلت وضحيت للمرة المليار..

ومليت) اقول لكل من يجتهد ويكون فكرة عن وطنيتي انا افتخر باني انضم لحركة قرفنا ومن الفاعلين جدا فيها وجهاز أمنكم المزعوم يعلم ذلك ويقرأ هذا البوست بعناية ويعلم رائي الذي قلته في مكاتبه ( الموت واحد ولو قتلتم وداد درويش حيتبني ليها قبر واحد ما اتنين و في آلاف غيرها موجودين) ،

وحركة قرفنا هي الوحيدة من يحق لها ان رأت ما يمس نهجها وما يقف ضد الحقوق والوطن ان تصوبني وتنشر عني خلاف ما أنا عليه.
ارهقتكم بهذا الحديث المطول/التقرير ولكن لابد من فعل يوازي المرحلة وهذا بوضوح وتفاصيل دقيقة عن حياتي لمن لم يعرفني حتي.
لكل من يعرفونني عن قرب وللشرفاء في وطني…….
تحياتي ومودتي ومحبتي التي تعلمون.

التوقيع: وداد عبدالرحمن محمد درويش

شارك الموضوع :

تعليقات الفيسبوك

تعليقات


30 التعليقات

إنتقل إلى نموذج التعليقات

      1. 1
        امريكي

        مين وداد دي ،، نحنا بنعرف وداد واحده بس ، كمان جايه تتسلبطي

        الرد
      2. 2
        Aldabeib

        امشي امريكا واصلي الدراسة عشان بعدين ماتندمي

        الرد
      3. 3
        عطبراوي

        يا وداد هاجري لأمريكا و ما حتندمي . كل شي فيها أفضل و أحسن حتي الجامعات و هنا حتي لو اختلفت مع أوباما مافي جامعة تقدر تفصلك زي ما حصل ليكي و انا بتحديث عن تجربه

        الرد
      4. 4
        فهمي

        نصيحة سافري امريكا كملي دراستك وأحسن من ضياع عمرك واهلك والنضال والسياسية ما عندها حد وبعدين لا بنفعك زيد ولا عبيد

        الرد
      5. 5
        الرشيد

        يا بنيتي راحة البنية في السترة والسترة في بيتها دحين شوفي ليك ود حلال يسترك ويقدّرك وإنتي تستاهلي ومالك ومال الدردرة والخط المعلق وعيشي حياتك وخلي الملاوة والملاقطة لي أسيادها.

        الرد
      6. 6
        عزالدين

        احسنت يا رشيد وزي ما بقولو عز الحريم وليان

        الرد
      7. 7
        المعلم

        انا عندي قناعة في الشعب السوداني إذا قال شي يكون حقيقة بنسبة 100%

        الرد
      8. 8
        حيدر

        بالضبط كده انتى عايزه شنو يعنى
        اتكلى على الله واسمعى كلام الرشيد

        الرد
      9. 9
        بكري بقداش

        التحيه إليك أيتها المناضلة أولا أنا لا أعرفك من قبل .لكن من خلال سردك للماساءه التي عشتيها تأكدت تماما بأن الظلم قد لحق بك من زو القربي وهنالك عدد كبير من المظلومين أمثال صديقنا معاونيه تروتسكي الذي أصبح الميت الحي

        الرد
      10. 10
        بكري بقداش

        سكه النضال صعبه يا وداد

        الرد
      11. 11
        دارفوري

        أسمعي كلام الببكيك وكان إثنين قالوا ليك رأسك مافي ألمسوا والإخوان ماقصروا معاك واسمعي الكلام قبال الفأس يقع في الرأس وأضم صوتي للإخوان ديل .

        الرد
      12. 12
        سعيد

        التحيه لمناضلي حركة قرفنا الشبابيه

        الرد
      13. 13
        ابسروال

        وداد درويش دى واحدة قرت فى جوبا وكانت عاملة فيها شيوعية ههههه درست موارد فى جامعة جوبا وكانت مع محمد ابراهيم ود اخت مصطفى سيد احمد وواحد اسمو محمد توم ومايكل شلة كلللللللللها صايعة

        هوووووووووى يا وداد ماتعملى لينا فيها مناضلة وشريفة والحنك الببببببببببيش دا بالمناسبة انا قريت معاك فى جامعتك زااااااااااااتا
        وبعدين تتزكرى شجرة الليمونن بتاعة جامعة السودان ياليمونة انتى
        قومى لفى بالله
        الله ارحم ايام جامعة جوبا والكدرو شمال
        تحية للنور الجيلانى زاتو

        الرد
      14. 14
        ذات النطاقين

        اول مرة اسمع بي مناضلة اسمها وداود……احسن حاجة تتقي الله …وتتذكري …ذلك اليوم يوم لا ينفع مال ولا بنون الا من اتي الله بقلب سليم

        الرد
      15. 15
        فضل الله بله

        اول حاجه مرحبا
        النيلين اصبح موقع لخبطه
        انتي يا وداد الدنيا دي فيها فقط دفعتك وزملاء دراسه الدنيا عالم كبير فتحي وانسي واعتبريها تجربة
        بعدين مافي داعي لكلمة ميتين اهلي دي
        والزول يشوف تاريخو لو ما فيهو سمح الله كريم والبيهدي هو اعملي السمح المستقبل راجيكي
        واسمعي كلامي ده كويس نعارض تعارضي توالي نوالي دي الحياة هكذا يا تقبلي ياتقبلي لا احد يقدر يطلع من ارادة ربنا سبجان وتعالئ اقنعك عشان ما تزعلي وتكتبي هسي عمر البشير ده ليهو كم سنه حاكم منو الاعتصم خلئ الاكل يوم واحد منو الانتحر وفجر جه انسي يا بت وعيشي كلنا لنا فرد من امن عمر ومن قرفنا وفرقنا ومن انصار السنه ومن الشيعوعيه ومن الدواعش كمان بس الشعيه لا هكذا سنة الحياة وداد ولا تكوني عندك هدف تاني من وراء المقال هذا

        الرد
      16. 16
        Naser

        البلد دي ايي زول داير يشتهر ويقدنا بكلام خارم بارم.. واحدة هناك تختفي (وتناضل) مع منو مامعروف وتعمل دوشة وفي النهاية تتعصر وتجي تعتذر وتتجرس.. وهسي دي منو وجاية ناطه من وين في السخانة دي…يابتي مرض حامد دا عيبيهو لي.. خلي الكلام الفارغ واتستري

        الرد
      17. 17
        عارف

        كنت عاوز اقول نضم في حقك …لكن كلام ابسروال قنعني..طلعتي اي كلام يا بنية

        الرد
      18. 18
        Hamde ahmed

        لكي العتبي حتي ترضي

        الرد
      19. 19
        ali

        يا بنيه اقعدي في الواطه وخليك من الكلام الفارغ اللي بتعملي فيه ده لو كان ليك ناس يسالوك ما كان سافرت لوحدك في بلد غربه السودان ده مافيه رجال يقيفو وراء الحكومه الا انت من اسمك يظهر عليك اصولك مصريه خليك جالسه مع اهلك احسنلك واحسن لينا فكينا من شركم واحده كشفوا ليها عزريتها وواحده شردت وين الله اعلم وقالو امن قال واستغفر ربي

        الرد
      20. 20
        غصن الشوك

        و الله ابو سروال قطع لينا الطريق و ما خلانا نكتب تعليق ربنا العن شيطانك يا ابو سرال هههههههههههه هههههههههههه

        الرد
      21. 21
        ابسروال

        يا غصن الشوك ويا عارف البت دى بعرفه قسما بالله حقققققققققق المعرفة من زمن الكدرو شمال وبالمناسبة كيسا فاااااااضى جدا ماكان عندها اااااااااى نضال ولا بطيخ فقاعة بس
        خلو الطبق مستوووووووور يا جماعة لو كترتو تانى بجيب ليكم اخرا
        هووووووووووووووى انا لا كوز ولا امنجى لكن ماكل هلفوت اطلع اعمل لينا فيها مناضل حلو عن سمانا ما ناقصين قرف

        الرد
      22. 22
        ابسروال

        بعدي نسيتى تقولى حاجة يا مناضلة انتى اها نتيجة كشف العذرية الحصل فيها شنووووووووووووووووووووووووووووووووو؟ اووووووووووووووع تقولى لى دى الكان فى مستشفى حاج الصافى سنه 2003 ايام مشاكل الجامعة . ااااااااااااااااااااالله ارحم غازى سليمان

        الرد
      23. 23
        الباهي

        أول حاجة أنا ما بعرف وداد ولا عايز أدافع عنها لكن لفت نظري تعليق المدعو ابسروال أو أياً كان اسمه .. أولاً اسلوبك ما كريم ولا أسلوب رجال وكذلك تلميحاتك لأنو الرجال ما برمو الكلام زي الحريم بل بقولوه عديل كده وأنت لو راجل صحيح تدخل باسمك الحقيقي وتكتب كلامك الكتبتو .. لكن أن تدخل باسم حركي فهذا يدل على أنك جبان وممكن أي زول يدخل باسم حركي ويشوه سمعة الناس بكلام لا اساس له من الصحة .. فهل يعني انك بتعرفها وبتعرف قصتها يعني خلاص نصدقك كده من غير أي أدلة مقنعة؟؟؟ والأعجب منك الناس الصدقوك طوالي ..

        الرد
      24. 24
        دفع الله الشريف ابوقناية

        يا جماعة ابسروال هو الأسم الحركى للهندى عزالدين !!!

        الرد
      25. 25
        فارس عبدالرحمن

        ما فهمنا اى حاجه يا وداد

        الرد
      26. 26
        ابسروال

        يا البااااااهى لونك عايز اقوليك شئ وخلينى من اسلوب رجال وما اسلوب رجال يا حبيبنا بعدين كلام شنو البرميهو عديل كلامى واااااااااضح ارجع اقراهو تانى من جديد.
        بعدين ماااااااااااظنك تستفيد لو كتبت اسمى الحقيقى يا منقة خليينا من الحنك البيش دا. بعدين اشوه سمعتا لى انا الزولة دى بعرفها اكتر من جوع بطنا بعدين يا مان لو انت بتعرفها او عندك معرفة بيها أسلا من مارتن ود اخت مارتن ملوال ومحمد ابراهيم وداخت مصطفى سيد احمد الود العامل فيها مناضل ومشارك فى كورال جامعة السودان كلية الموسيقى والدراما.

        بعدين ياااااااااااحبة انا ماقلت ليك تصدق ولاتكذب دا برجع ليك يا حبيب
        لكن انا بعرف البت دى تماااااااااااااما لانى درست معاها ولعلمك انا لاكوز ولا عندى علاقة بيهم
        لكن انا ضد كل من هب ودب اجى اعمل لينا فيها مناضل ووجع راسنا حلو عن سمانا

        يا ود ابوقناية ههههه ضحتنى والله

        الرد
      27. 27
        محمد حسن

        ياما في السجن مظاليم …

        الرد
      28. 28
        محمد حسن

        يكون من فضلك انستي اذا عرفتيني علي شخصك اكتر …

        الرد
      29. 29
        نزار

        اخ اب سروال مهما كان القلتو في حقها صحيح لو ماشفته بي عينك ومعاك اربعه شهود وقع عليك حد القذف وحد القذف للعلم اذا لم ينفذ في الدنيا نفذ يوم الحساب بسياط من نار

        الرد
      30. 30
        widad derwish

        السلام عليكم جميعا،
        بالنسبة ليك ي ابسروال.. اسمك الحقيقي منو يالبتعرفني زي جوع بطنك، بعدين منو القاليك انا مناضلة ولآ غيرو،
        انا بت سودانية عادية مواطنه صالحة بس ما بقبل الظلم لاعلي روحي ولا غيري، وردي هذا ليس رفعا من قدرك لاني تعودت ان لا ارد علي اساليب امثالك ولكن لتثبت للاخوة المتسائلين من انت وكيف تعرفني وانت ماذكرت غير صحيح ي بتاع شجرة الليمون،
        اللهم لا تؤاخدنا بما يفعل / ويقول الجهلاء منا.

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *